بۇگىندە قوعامعا تابىستى يدەيالاردى قالىپتاستىرا الاتىن, كرەاتيۆتى ويلايتىن جاستار كەرەك. بۇل ورايدا تاراز قالاسىندا تۇراتىن تالانتتى جاس عالىم يسااك مۋستوپۋلو ءوزىنىڭ قارىم-قابىلەتىمەن ەرەكشە دارالانىپ كورىنەدى.
جاس عالىم عارىشقا ۇشۋ ءۇشىن بالاما ەنەرگيا كوزدەرىن الۋ جولىن زەرتتەپ, وزىندىك تەورياسىن جاساپ شىققان بولاتىن. مۇمكىندىگى شەكتەۋلى ەكەنىنە قاراماستان ون جەتى جاسار عالىم عىلىم جولىندا بۇدان دا باسقا ىزدەنىستەرگە بارىپ ءجۇر. ونىڭ لوندون قالاسىندا الەمگە ايگىلى فيزيك ستيۆەن حوكينگپەن كەزدەسكەنى دە تالايدىڭ قىزىعۋشىلىعىن تۋدىردى. جاس عالىم وسى ۋاقىتقا دەيىن مۇمكىندىگى شەكتەۋلى ادامدارعا ارنالعان STEM يننوۆاتسيالارى ۇلتتىق كونكۋرسىنىڭ لاۋرەاتى اتانىپ ۇلگەردى. سونداي-اق بىلتىر قاراشا ايىندا كورەيا ەلىندە الەمنىڭ 23 ەلىنىڭ وكىلدەرى قاتىسقان اقپاراتتىق تەحنولوگيالار بايقاۋىندا دا ۇزدىك دەپ تانىلىپ, جەڭىسكە جەتتى.
«بۇگىندە ءبىزدىڭ قوعامدا مۇمكىندىگى شەكتەۋلى ادامدارعا بارىنشا جاعداي جاسالۋدا. ارينە, بۇل قۋانارلىق جاعداي. شىندىعىندا, الەمدەگى بارلىق سالا قارقىندى دامۋ ۇستىندە. مۇنداي ۇدەرىستەن تاراز قالاسى دا قالىس قالماي كەلەدى», دەيدى ي.مۋستوپۋلو. يسااك جۋىردا وبلىس اكىمى اسقار مىرزاحمەتوۆپەن كەزدەسىپ, عىلىم جولىنداعى جاڭالىقتارىمەن بولىسكەن ەدى. ا.مىرزاحمەتوۆ ي.مۋستوپۋلوعا جاقىندا اشىلعان شەرحان مۇرتازا اتىنداعى «رۋحانيات جانە تاريحتانۋ» ورتالىعىندا عىلىم جولىندا ىزدەنىپ جۇرگەن جاستار ءۇشىن ۇيىرمە نەمەسە كلۋب ۇيىمداستىرۋ تۋرالى ۇسىنىسىن ايتقان بولاتىن. يسااك بۇل باستامانى قۋانا قولدادى. سەبەبى, ول دا ءوزى وقيتىن مەكتەپتىڭ قابىرعاسىندا وسى ىسپەتتى شارۋا ۇيىمداستىرۋعا ارەكەتتەنىپ ءجۇر ەكەن. ماقساتى – عىلىمنىڭ شىڭىنا شىعۋ, قوعام يگىلىگىنە جارايتىن جاڭالىقتار اشۋ. «ەگەر كلۋبتى وبلىس كولەمىندە ۇيىمداستىراتىن بولسا, وندا جاستار ءۇشىن كەڭ پەرسپەكتيۆالارعا جول اشىلاتىن بولادى», دەيدى جاس عالىم.
بۇگىنگى تاڭدا وڭىردە 166 بالاباقشا مەن 331 مەكتەپتە ينكليۋزيۆتى ءبىلىم بەرۋدى دامىتۋعا بارلىق مۇمكىندىك قاراستىرىلعان. اتالعان ءبىلىم نىساندارىندا پاندۋستار, تۇتقالار, كەڭ ەسىكتەر, دەمالىس بۇرىشتارى, تاكتيلدى جولدار جانە دەنە مۇمكىندىكتەرى شەكتەۋلى ادامدار ءۇشىن باسقا دا قولايلى جاعدايلار جاسالعان. بۇدان وزگە 46 ورتا جانە ارناۋلى وقۋ ورىندارىنىڭ 20-سىندا ەرەكشە ءبىلىم بەرۋ قاجەتتىلىكتەرى بار ستۋدەنتتەردىڭ ەش كەدەرگىسىز ءبىلىم الۋى قامتاماسىز ەتىلگەن. بۇل جەرلەردە دە يسااك مۋستوپۋلو سياقتى شەكتەۋلى مۇمكىندىگى ارمان جولىنا كەدەرگى بولا المايتىن ءبىلىمدى جاستار ءوسىپ كەلەدى.
جامبىل وبلىسى