بۇگىن اقوردادا پرەزيدەنت جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ وتىرىسى ءوتتى. جيىندا اقپارات جانە قوعامدىق دامۋ ءمينيسترى داۋرەن اباەۆ «رۋحاني جاڭعىرۋ» باعدارلاماسىنىڭ 2020 جىلعا ارنالعان جاڭا جوبالارىن تانىستىردى.
«وڭىرلەردە جوبالاردى ساپاسىز جوسپارلاۋ پروبلەماسى بار. باستاپقىدا قويىلعان ماقسات كۇتكەن ناتيجەگە ساي كەلمەي قالعان تۇستار كەزدەستى. 2020 جىلعا ارنالعان جاڭا جوسپار اتالعان پروبلەمالاردى ەسكەرە وتىرىپ جاسالدى. مەملەكەتتىك حاتشىمەن بەكىتىلگەن ول 122 بولىمنەن تۇرادى», - دەدى داۋرەن اباەۆ.
ءمينيستردىڭ ايتۋىنشا, جوسپار نەگىزگى ءۇش باعىتتا جۇزەگە اسىرىلادى.
«ساپا كوتەرىلەر دەگەن سەنىمدەمىز. بولىمدەردىڭ سانىن ەكى ەسە قىسقارتتىق. جوسپار نەگىزگى ءۇش باعىتتا جۇزەگە اسىرۋدى كوزدەيدى. ءبىرىنشىسى – جەكە دامۋ. ەكىنشىسى – ۇلتتىق بىرەگەيلىك پەن حالىقارالىق تانىستىرىلىم. ءۇشىنشىسى – مەملەكەتتىڭ, ازاماتتىق قوعام مەن جەرگىلىكتى قوعامداستىقتاردىڭ دامۋى. بۇعان دەيىن ايتقانىمداي, بيىل قۇجات بويىنشا شارالار لەگى ەكى ەسە قىسقاردى. وسى شارالاردىڭ ۇشتەن ءبىرى عانا فورۋمدار مەن فەستيۆالداردان, سايىستار مەن كونفەرەنتسيالاردان تۇرادى», - دەدى داۋرەن اباەۆ.