بۇگىن اقوردادا پرەزيدەنت جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ وتىرىسى ءوتتى. وندا «رۋحاني جاڭعىرۋ» باعدارلاماسىن ىسكە اسىرۋدىڭ ناتيجەلەرى مەن الدا اتقارىلاتىن جۇمىستىڭ جاڭا باسىم باعىتتارى قارالدى.
«وزدەرىڭىزگە بەلگىلى, تۇڭعىش پرەزيدەنت – ەلباسى نۇرسۇلتان ءابىش ۇلى نازارباەۆتىڭ باستاماسىمەن «رۋحاني جاڭعىرۋ» باعدارلاماسىن ىسكە اسىرىلىپ جاتقانىنا بيىل ءۇش جىل تولادى. ءۇش جىلعا جۋىق ۋاقىتتا ەلەۋلى جۇمىستار اتقارىلىپ, ناقتى جوبالار جۇزەگە اسىرىلدى. سونىمەن بىرگە مەملەكەت باسشىسى قاسىم-جومارت كەمەل ۇلى توقاەۆتىڭ جاقىندا جارىق كورگەن «اباي جانە ءححى عاسىرداعى قازاقستان» ماقالاسىنداعى ويشىلدىڭ ەڭبەكتەرى ارقىلى تارالعان رۋحاني باعىتتارى وسى باعدارلامامەن تابيعي ساباقتاستىق تاۋىپ وتىرعانىن قوعامدىق پىكىر قولداپ وتىر. سونىڭ ناتيجەسىندە بۇگىندە باعدارلاما زاماناۋي قازاقستاندىق مادەنيەت, وزىق ءبىلىم, عىلىمي زەرتتەۋ, ارحەولوگيا جانە باسقا دا ءتۇرلى باعىتتاردىڭ دامۋىنا ەداۋىر سەرپىلىس بەرۋدە», - دەدى قىرىمبەك كوشەرباەۆ.
مەملەكەتتىك حاتشىنىڭ ايتۋىنشا, قازىرگى تاڭدا باعدارلاما اياسىندا 6 باعىت بويىنشا 13 ارنايى جوبا ىسكە اسىرىلۋدا.
«جاسىراتىنى جوق بىرقاتار جوبا ناتيجەلى جۇرگىزىلسە, كەيبىرى كوزدەگەن مەجەدەن شىعا الماي وتىر. «تۋعان جەر» جوباسى اياسىندا مەتسەناتتاردىڭ ارقاسىندا دەمەۋشىلىك قاراجات ەسەبىنەن 2019 جىلى 60 ملرد تەڭگەگە جۋىق قاراجات تارتىلدى. ونىڭ ىشىندە 889 نىسان جاڭادان سالىندى. 631 نىسان كۇردەلى جوندەۋدەن ءوتتى. اتاپ ءوتۋ كەرەك, قارجىلاندىرۋدىڭ ەڭ كوپ كولەمى ماڭعىستاۋ, الماتى, اتىراۋ, قىزىلوردا جانە اقمولا وبلىستارىنىڭ ۇلەسىندە. بۇل كورسەتكىشتەر قازاقستانداعى بيزنەس وكىلدەردىڭ الەۋمەتتىك جاۋاپكەرشىلىگىن كورسەتەتەىن بايقاتادى. سونداي-اق «اۋىل – ەل بەسىگى» جوباسى بويىنشا الداعى ءۇش جىلداعى ءىس-شارالاردى ىسكە اسىرۋعا ۇكىمەت رەسپۋبليكالىق بيۋدجەتتەن 90 ملرد تەڭگە قاراستىردى. ونىڭ ىشىندە 2019 جىلى 30 ملرد تەڭگە ءبولىنىپ, 711 جوبادان تۇراتىن 53 اۋىلدىق ەلدىمەكەندە 452 ينفراقۇرىلىمدىق جوبا ىسكە اسىرىلدى», - دەدى ق.كوشەرباەۆ.