جامبىل وبلىستىق كاسىپكەرلىك جانە يندۋستريالدى-يننوۆاتسيالىق دامىتۋ باسقارماسىنىڭ باسشىسى جەڭىس ساريەۆ اعىمداعى جىلى 1 اقپان كۇنى ەكى اي مەرزىمگە ۋاقىتشا ۇستاۋ يزولياتورىنا قامالعان بولاتىن. باسقارما باسشىسى بيۋدجەت قاراجاتىن جىمقىردى دەگەن كۇدىككە ىلىنگەن.
تاراز قالاسى مامانداندىرىلعان تەرگەۋ سوتىنىڭ مالىمەتىنشە, مەكەمە باسشىسىنا قازاقستان رەسپۋبليكاسى قىلمىستىق كودەكسىنىڭ 189-بابى, ياعني «سەنiپ تاپسىرىلعان بوتەن مۇلiكتi يەمدەنiپ الۋ نەمەسە تالان-تاراجعا سالۋ» دەگەن ايىپ تاعىلىپ وتىر.
قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتى بۇل ماسەلەگە قاتىستى سوتقا دەيىنگى تەرگەۋدى باستادى. جەڭىس ساريەۆ كورسەتىلمەگەن قىزمەت ءۇشىن جەكە كاسىپكەرلىك ارقىلى جۇيەلى تۇردە قارجىنى اۋدارىپ, كەيىن ول اقشانى قولما-قول اقشاعا اۋىستىرۋ ارقىلى, سونداي-اق, ءىس جۇزىندە جۇمىس ىستەمەگەن تۇلعاعا جالاقىنى زاڭسىز ەسەپتەۋ جانە تولەۋ ارقىلى بيۋدجەت قاراجاتىن جىمقىردى دەگەن كۇدىككە ءىلىندى. ەندى كۇدىكتىگە قاتىستى تۇپكىلىكتى شەشىمدى سوت قابىلدايتىن بولادى.
ايتا كەتەيىك, سوڭعى كەزدە جامبىل وبلىسى اكىمى اپپاراتى ينفراقۇرىلىمدى دامىتۋ ءبولىمىنىڭ باسشىسى قىزمەتىن اتقارىپ جۇرگەن جەڭىس ساريەۆ 2019 جىلى 24 شىلدە كۇنى جامبىل وبلىستىق كاسىپكەرلىك جانە يندۋستريالدى-يننوۆاتسيالىق دامىتۋ باسقارماسىنىڭ باسشىسى لاۋازىمىنا تاعايىندالعان بولاتىن.
جامبىل وبلىسى