سولتۇستىكتىڭ كورسەتكىشتەرى ءسال عانا وسكەن

2018 جىلى وبلىستا جۇمىسقا جارامدى 311,3 مىڭ ادام بولسا, 2019 جىلى بۇل ءسال عانا وزگەرىپ, 312,2 مىڭعا دەيىن ارتقان. جۇمىسسىزدىق دەڭگەيى بىلتىر 2018 جىلمەن سالىستىرعاندا 0,1 پا­يىزعا تومەندەپ, 4,8 پايىز­دى قۇراعان. بۇل كورسەتكىشكە جۇ­مىسسىزداردىڭ رەسپۋبليكادان تىس, سىرتقا كەتكەندىگى دە اسەر ەتكەن.

جۇمىسقا ورنالاسقاندار سانى 2018 جىلى 29692 بولسا, بىلتىر ءبىرشاما ازايىپ, 28246 ادام بولعان. جاڭادان اشىلعان جۇمىس ورىندارى دا 2018 جىلمەن سالىستىرعاندا ازداۋ.

2018 جىلى «ەڭبەك» ناتيجە­لى جۇمىسپەن قامتۋدى جانە جاپپاي كاسىپكەرلىكتى دامىتۋ» باعدارلاماسىنا 26,3 مىڭ ادام قاتىسقان بولسا, بىلتىر ونىڭ سانى 23,7 مىڭ ادامعا دەيىن ازايعان. سونىڭ ىشىندە 44,8 پا­يىزى جۇمىسسىزدار, 55,2 پايىزى ءوزىن-ءوزى قامتىعاندار. كاسىبي وقۋمەن قامتىلعاندار سانى 1800 ادام, 727 ادام جەڭىلدەتىلگەن نەسيە العان. 

بىلتىر وبلىسقا رەسپۋب­ليكانىڭ باسقا وڭىرلەرىنەن كوشىپ كەلگەندەر سانى ارتقان. 2018 جىلى ولاردىڭ سانى 1396 ادام بولسا, 2019 جىلى 2223 ادامعا جەتتى. 2020 جىلدىڭ 1 قاڭتارىنا دەيىنگى مالىمەتكە قاراعاندا كوشىپ كەلگەن بارلىق 736 وتباسى «كوشىپ كەلۋشىلەردىڭ كۆوتاسىنا» ەنگىزىلگەن. كوشىپ كەلۋشىلەردىڭ نەگىزگى بولىگى, ياعني 288 وتباسى تۇركىستان وب­لىسىنان كەلگەن. ەكىنشى ورىن­دا نۇر-سۇلتان قالاسى, ودان كەلگەندەر 117 وتباسى, قال­عاندارى الماتى, جامبىل, قىزىلوردا, ماڭعىستاۋ وبلىس­تارى مەن شىمكەنت قالاسىنان كەلگەن. 

كوشىپ كەلگەندەردىڭ ىشىندە 1107 ادام جۇمىسقا قابىلەتتى جاستاعى ادامدار. سونىڭ ىشىندە 616 ادام تۇراقتى جۇمىسقا ور­نا­لاستىرىلعان.

بىلتىر سولتۇستىك قازاق­ستان وبلىسىنا كەلگەن ورالمان­دار­دىڭ سانى – 189 ادام. ولار 83 وتباسىن قۇرايدى. ورالمانداردىڭ كوبى, ياعني 83 ادام (34 وتباسى) قىتايدان كەلگەن. موڭعوليادان كەلگەندەر سانى 60 ادام, ولار 16 وتباسىن قۇرادى. سونىمەن قاتار رەسەيدەن 29, وزبەكستاننان 15 ادام كوشىپ كەلگەن. وسىلاردىڭ ىشىندە كۆوتاعا ەنگىزىلگەندەر سانى 110 ادام, ولار 47 وتباسىن قۇرايدى.   

كوشىپ كەلۋشىلەر ءۇشىن رەس­پۋب­ليكالىق بيۋدجەتتەن 503,7 ملن تەڭگە بولىنگەن, سونىڭ ىشىن­دە كوشىپ كەلۋ شىعىندارى – 193,2 ملن, تۇرعىن ءۇيدى جالداۋ شىعىندارى – 218,5 ملن, جۇمىس بەرۋشىگە بەرىلگەن سۋبسيديا – 92  ملن تەڭگە. 

2020 جىلدىڭ باسىنا دەيىنگى مالىمەتكە قاراعاندا وبلىستا اتاۋلى الەۋمەتتىك كومەك 27774 ادامدى قامتىعان 5897 وتباسىنا بەرىلگەن. بۇل ماقساتقا 2,4 ملرد تەڭگە جۇمسالعان.  سونىمەن قاتار كوپ بالالى جانە از قامتىلعان وتباسىلارعا جەرگىلىكتى بيۋدجەت, بيزنەس قاۋىمداستىعى تارا­پىنان دەمەۋشىلىك جانە قايى­رىم­دىلىق كومەكتەر ۇيىمداس­تىرىلىپ, بارلىعى 1,4 ملرد تەڭگە بولىنگەن.

ارينە كوشىپ كەتۋشىلەر سانى جالعاسىپ, جالپى حالىق سانىنىڭ ازايۋى توقتاماي تۇر­­عانىمەن ءوڭىر حالقىنىڭ الەۋ­­مەتتىك قورعالۋى جالپى رەسپۋب­ليكالىق دەڭگەيدەن ءسال عانا تومەن ەكەندىگى كورىنىپ تۇر. ەگەر «سولتۇستىك كوەففيتسيەنتى» سياق­تى تولعاعى جەتكەن قوسىمشا تولەمدەر بەرىلسە, تەرىستىكتىڭ جان­دانا تۇسەرى ءسوزسىز.

سولتۇستىك قازاقستان وبلىسى