ەلوردانىڭ جۇمىسپەن قامتۋ جانە حالىقتى الەۋمەتتىك قورعاۋ باسقارماسى از قامتىلعان ازاماتتارعا جاڭا فورماتتاعى اتاۋلى الەۋمەتتىك كومەك كورسەتۋ بويىنشا ءتۇسىندىرۋ جۇمىستارى جۇرگىزىلۋدە. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.
جىل باسىنان بەرى 7 579 وتباسىعا ااك كەڭەس بەرىلىپ, 2 367 ءوتىنىش قابىلداندى, ونىڭ ىشىندە كوپ بالالى وتباسىلاردان تۇسكەن ءوتىنىش سانى – 864. 1 421 وتباسىنا ااك تاعايىندالدى, ال 125 وتباسىنا تاعايىنداۋدان باس تارتىلدى.
ااك الۋعا قۇقىلى وتباسىنىڭ جان باسىنا شاققانداعى ورتاشا ايلىق كىرىسى كۇنكورىس قۇنىنىڭ 70% -ىنان اسپاۋى قاجەت. نۇر-سۇلتان قالاسى ءۇشىن ەڭ تومەنگى كۇنكورىس دەڭگەيى 2020 جىلدىڭ 1 توقسانىندا 34 654 تەڭگەنى كورسەتسە, كەدەيلىك شەگى 24 258 تەڭگەنى قۇرادى.
جان باسىنا شاققانداعى ورتاشا تابىسى ااك تاعايىنداۋدا ءوتىنىش جاساعان وتباسى مۇشەلەرىنىڭ سانىنا قاراي جانە 3 ايعا ءبولۋ ارقىلى ەسەپتەلەدى. ااك مولشەرى جان باسىنا شاققانداعى ورتاشا كىرىس مەن كەدەيلىك شەگىنىڭ اراسىنداعى ايىرما رەتىندە انىقتالادى.
سونداي-اق الەۋمەتتىك كومەك اي سايىن تولەنەدى. ااك الاتىن از قامتاماسىز ەتىلگەن وتباسىلاردىڭ بالالارىنا كەپىلدەندىرىلگەن الەۋمەتتىك پاكەت ۇسىنۋ قاراستىرىلعان. جاسىنا بايلانىستى ەكى سانات: ءبىرىنشى - 1 جاستان 6 جاسقا دەيىنگى بالالارعا ارنالعان كەپىلدەمە پاكەتى, ەكىنشىسى - 6 جاستان 18 جاسقا دەيىنگى بالالارعا ارنالعان كەپىلدەندىرىلگەن جيىنتىق.
پاكەت شەڭبەرىندە ورتا ءبىلىم بەرۋ ۇيىمدارىندا ءبىلىم الاتىن وقيتىن وقۋشىلار ءۇشىن كۇندەلىكتى مەكتەپ اسى, مەكتەپ فورماسى (جىلىنا ءبىر رەت), وقۋ قۇرالدارى (جىلىنا ءبىر رەت), قوعامدىق كولىكتەردەگى ساپارلاردىڭ 50% -ىن وتەۋ جەڭىلدىكتەرى قاراستىرىلعان. مەكتەپ فورماسى مەن وقۋ قۇرالدارىن ساتىپ الۋعا سەرتيفيكاتتار تامىز ايىندا وقۋ جىلى باستالعانعا دەيىن بەرىلەدى دەپ جوسپارلانۋدا.
ااك-گە قۇجاتتاردى قابىلداۋ كەلەسى مەكەنجايلاردا جۇزەگە اسىرىلادى: جۇمىسپەن قامتۋ ورتالىعى (بەيبىتشىلىك, 25), «جانۇيا» وتباسىن قولداۋ ورتالىعى (بەيبىتشىلىك, 14), الماتى اۋدانىنىڭ اكىمدىگى (تاۋەلسىزدىك داڭعىلى 7), بايقوڭىر اۋدانىنىڭ اكىمدىگى (وتىرار كوشەسى, 5), ەسىل اۋدانىنىڭ اكىمدىگى (قابانباي باتىر داڭعىلى, 33), سارىارقا اۋدانىنىڭ اكىمدىگى (سارىارقا داڭعىلى, 13).