كەسەلدىڭ كەرى اسەرى

العاشىندا قاۋىپ پەن توتەنشە جاعدايعا نەگىز جوعىن ايتىپ سەندىرگەن قىتاي بۇگىن­دە اۋرۋحانالار سالىپ, بىرنەشە قالا­لارىن جابۋعا ءماجبۇر بولىپ وتىر. ۆيرۋس جۇقتىرعاندار ەۋروپادان, بىرىككەن اراب امىرلىكتەرىنەن دە تابىلدى. ماروككو كورولى مۇحاممەد VI ەل ۇكىمەتىنە قىتايداعى ماروككولىقتاردى ەۆاكۋاتسيالاۋ جولىن تابۋدى تاپسىردى. ال اقش 230 ازاماتىن الىپ شىعۋدى قولعا الدى. سونىمەن قاتار ۋحانداعى ديپلوماتيالىق وكىلدىگىنىڭ جۇمىسىن توقتاتتى. قازاقستان دا ۋحاندا وقىپ جاتقان 61 ستۋدەنتىن ەلگە قايتارماق. ولار 14 كۇن بويى اۋرۋحانادا باقىلاۋدا بولادى. الايدا دۇنيەجۇزىلىك دەنساۋلىق ساقتاۋ ۇيىمىنىڭ باسشىسى تەدروس ادان گەبرەيەسۋس قىتايداعى شەتەلدىك ازاماتتاردى ەلدەرىنە قايتارۋدىڭ قاۋىپتى ەكەنىن ايتتى. سينحۋا اگەنتتىگى حالىقارالىق ۇيىم باسشىسى قىتاي سىرتقى ىستەر ءمينيسترى ۆان يمەن كەزدەسۋدە الەم جۇرتشىلىعىن سابىرعا شاقىرعانىن دا جازادى.

كوروناۆيرۋستىڭ تارالۋى كوپتەگەن كومپانيا مەن حالىقارالىق دارەجەدەگى شارالاردىڭ جۇمىسىنا كەدەرگى كەلتىرگەنى ءسوزسىز. ماسەلەن, اقپاننىڭ 20-22 كۇندەرىنە گۋاڭجۋدا جوسپارلانعان ازيا تۋريزم كورمەسى وتكىزىلمەيتىن بولدى. بۇل – 1993 جىل­دان بەرى وتكىزىلىپ تۇراتىن ۇلكەن كور­مەلەردىڭ ءبىرى. حالىقارالىق تەننيس فەدەراتسياسى قىتايدىڭ دۋنگۋان قالاسىندا جوسپارلانعان فەدەراتسيا كۋبوگىنىڭ ىرىكتەۋ ويىندارىنىڭ وتكىزۋ ورنى وزگەرەتىنىن مالىمدەدى. فيليپپين ۇكىمەتى بولسا قىتاي ازاماتتارىنا ۆيزا بەرۋدى ۋاقىتشا توقتاتتى. فيليپپين يمميگراتسيا بيۋروسىنىڭ وكىلى حايمە مورەنتە بۇل قىتايلىقتارعا ديسكريميناتسيا ەمەس, قاۋىپسىزدىك شارالارى ەكەنىن ءتۇسىندىردى.

ال گونكونگتە مەملەكەتتىك قىزمەتكەر­لەرگە ۇيدەن جۇمىس ىستەۋگە رۇقسات بەرىلدى. بۇل شەشىم ىندەتتىڭ اكىمشىلىك اۋداندا تارالۋىنان ساقتاماق دەيدى. رۇقسات تەك 2 اقپانعا دەيىن جارامدى. ودان كەيىن ساراپشىلار قايتا باقىلاۋ جاساپ, جاڭا شەشىم قابىلدايدى. جاعداي تۇزەلمەسە, گونكونگتىڭ اكىمشىلىك اۋدانى تاعى دا بىرنەشە اپتاعا جابىلۋى مۇمكىن. وعان قوسا گونكونگ ۇكىمەتى سوڭعى 14 كۇندە قىتايدىڭ حۋبەي پروۆينتسياسىندا بولعان ازاماتتارىنا ەلگە قايتۋعا تىيىم سالدى.

ال كەشە تانىمال Starbucks كومپانيا­سى قىتاي اۋماعىندا ورنالاسقان 2 مىڭ ءدامحاناسىن جاباتىنىن مالىمدەدى. Starbucks-تىڭ اقش-تان كەيىنگى ەكىنشى ۇلكەن نا­رىعى – قىتاي. كومپانيا باسشىسى كە­ۆين دجونسون قىتايمەن سەرىكتەستىكتىڭ توقت­ا­ماي­تىنىن, الدا ۇلكەن جوسپارلاردىڭ بار ەكەنىن مالىمدەدى.

قىتاي ۇكىمەتى دە كوروناۆيرۋسپەن بار مۇمكىندىگىنشە كۇرەسۋدە. Stemirna كومپانياسى تۋنتسزي ۋنيۆەرسيتەتىنە قاراستى دۋنفان اۋرۋحاناسىندا ۆيرۋسقا قارسى مرنك-ۆاكتسينا جوباسىنا رۇقسات الدى. عالىمداردىڭ ايتۋىنشا, ۆاكتسينانىڭ بۇل ءتۇرى ادەتتەگىلەردەن تەز دايىندالادى. جوبا جەتەكشىسى لي حانۆەن توبىنداعى زەرتتەۋشىلەر 40 كۇننىڭ ىشىندە جاڭا ۆاكتسينانى ازىرلەۋگە دايىن ەكەنىن حابارلادى.