اباي اتىنداعى قازۇپۋ-دا ۋنيۆەرسيتەتتىڭ 2018-2025 جىلدارعا ارنالعان «ستراتەگيالىق دامۋ جوسپارىن» جۇزەگە اسىرۋ بويىنشا سەمينار-ترەنينگتەر ءوتىپ, ونى كاسىبي مەنەدجەر, مەنەدجمەنت بويىنشا زەرتتەۋشى جانە بيزنەس كەڭەسشى وزات بايسەركەەۆ جۇرگىزدى.
سەمينار-ترەنينگ بارىسىندا ستراتەگيالىق دامۋ جوسپارىنىڭ باسىم باعىتتارى مەن مەحانيزمدەرى تالداندى. ءىس-شاراعا قاتىسقان ۋنيۆەرسيتەت رەكتورى تاكير بالىقباەۆ, پرورەكتورلار, قۇرىلىمدىق ءبولىم باسشىلارى, قىزمەتكەرلەر مەن پروفەسسور-وقىتۋشىلار قۇرامى ستراتەگيالىق دامۋ جوسپارى بويىنشا ءوز پىكىرلەرىمەن ءبولىستى.
ستراتەگيالىق دامۋ جوسپارىنىڭ نەگىزگى مىندەتتەرىنىڭ ءبىرى - باسقارۋدىڭ جاڭا ۇلگىسىنە كوشۋ - بەيىندى كوشباسشىلىق (بك) جانە كولدەنەڭ تسيكلدىق ۇيىمدىق قۇرىلىمدى ەنگىزۋ (كتسۇق). بەيىندى كوشباسشىلىق باعىتى بويىنشا وقۋ ورنى نارىقتىق جانە سالالىق دامۋ جولىندا ۇجىم پىكىرىمەن ساناسا وتىرىپ, ۇنەمى العا قاراي ۇمتىلۋى قاجەت. ونىڭ بارىسىندا سالانى دامىتۋ, باسقارۋ, پروبلەمالاردى انىقتاۋ جانە ولاردى شەشۋ جولدارىن ىزدەستىرۋ ماسەلەسى, قىزمەتكەرلەر مەن بولىمشەلەردىڭ الەۋەتىن بارىنشا ارتتىرۋ, بارلىق قۇرامدى پروتسەسكە جۇمىلدىرۋ ارقىلى جۇزەگە اسىرىلادى.
كولدەنەڭ تسيكلدىق ۇيىمدىق قۇرىلىم – كومپانيانى ۇيىمداستىرۋدىڭ جاڭا ءتاسىلى, وعان قاراپ وقۋ ورنىنىڭ قالاي ۇيىمداستىرىلعانىن انىق كورۋگە بولادى. باسقارۋدىڭ جاڭا ۇلگىسىن ەنگىزۋدىڭ سوڭعى ناتيجەسى بيۋروكراتيانى جويۋ, باسقارۋ ىسىنە شىن مانىندە بولىمدەر مەن ولاردىڭ قىزمەتكەرلەرىن تارتۋمەن ايقىندالادى.
ەڭ وزىق ادىستەر مەن باعدارلامالارعا سۇيەنە وتىرىپ, ءححى عاسىردىڭ پەداگوگىن دايىنداۋدى ماقسات ەتەتىن ۋنيۆەرسيتەت ستۋدەنتتەردىڭ قاجەتتىلىكتەرىن بولجاي وتىرىپ, مۇمكىندىكتەرىن اشۋعا ىقپال ەتۋمەن قاتار بۇگىنگى قوعامعا بەيىم ماماندار دايارلايدى.
الماتى