كوروناۆيرۋستان قازا بولعانداردىڭ سانى 170-كە جەتتى. ال تيبەتتە راستالعان تاعى ءبىر ناۋقاسپەن ۆيرۋستىڭ قىتايدىڭ بارلىق ايماعىنا تارالعانى ءمالىم بولدى.
قىتايدىڭ دەنساۋلىق ساقتاۋ وكىلدەرى 29 قاڭتاردا ەلدە جالپى 7711 ۆيرۋس جۇقتىرعان جاعداي تىركەلگەنىن ايتتى. سونداي-اق ىندەت الەمنىڭ 16 ەلىنە تاراعان.
حالىقارالىق دەنساۋلىق ساقتاۋ ۇيىمى (WHO) بۇگىن تاعى ءبىر وتىرىس وتكىزىپ, بەلگىسىز ۆيرۋستىڭ جاھاندىق توتەنشە جاعداي تۋعىزۋ مۇمكىندىگىن تالقىلايدى.
ۇيىمنىڭ باس ديرەكتورى تەدروس ادحان گەبرەيەسۋس سوڭعى كۇندەرى گەرمانيا, ۆەتنام, جاپونيا سەكىلدى كەيبىر ەلدەردە ۆيرۋستىڭ ادامنان ادامعا جۇعۋ جاعدايلارىنىڭ كوبەيۋى الاڭداتاتىنىن جەتكىزگەن ەدى. ونىڭ ايتۋىنشا, قىتايدان وزگە ەلدەردە ىندەتكە شالدىققاندار سانى ءالى دە از بولعانىمەن, كوپ ادامنىڭ جۇقتىرۋ قاۋپى بار.
ماماندار اۋرۋدىڭ ارنايى ەمى نە ۆاكتسيناسى جوق ەكەنىن, دەگەنمەن ۆيرۋستى جۇقتىرعانداردىڭ سيمپتومدارى اسا اۋىر ەمەس جانە قولدا بار مۇمكىندىكتەرمەن ەمدەلىپ كەتەتىنىن ايتىپ وتىر.
دەسە دە ۆيرۋستىڭ جاڭا ءتۇرى اۋىر رەسپيراتورلىق ينفەكتسياعا ۇلاسىپ, ولىمگە الىپ كەلۋى دە مۇمكىن.
اتيپتىك پنەۆمونيا مەن تۇماۋدىڭ ۇقساس ۆيرۋستارى سياقتى بۇل كوروناۆيرۋس تا ەگدە ادامدار مەن سىرقاتقا قارسى تۇرا المايتىن ءالسىز اعزالار ءۇشىن اسا قاۋىپتى.
ىندەتتەن قايتىس بولعاندار مەن جۇقتىرعانداردىڭ كوبىسى ۆيرۋس شىققان قىتايدىڭ حۋبەي پروۆينتسياسى مەن استاناسى ۋحاننىڭ تۇرعىندارى. وسىعان دەيىن قىتاي بيلىگى ىندەتتىڭ تارالۋىن بولدىرماس ءۇشىن ۋحان قالاسىنداعى بارلىق قوزعالىسقا تىيىم سالعانىن ايتقان ەدىك.