اپتا باسىندا داۆوستا دۇنيەجۇزىلىك ساۋدا ۇيىمىنا (دسۇ) نەگىزگى مۇشە-ەلدەردىڭ ساۋدا مينيسترلەرى ينۆەستيتسيالارعا جاردەمدەسۋ سالاسىنداعى جاڭا جاھاندىق ەرەجەلەر بويىنشا كەلىسسوزدەردى ىسكە قوسۋدى قولدادى.
بۇل باستامانى 100-گە جۋىق مۇشەسى قولدايدى جانە جاڭا كەلىسىمنىڭ ءماتىنىن قاراۋ نۇر-سۇلتانداعى دسۇ-نىڭ 12-ءشى مينيسترلىك كونفەرەنتسياسىنىڭ كۇن تارتىبىندەگى نەگىزگى ماسەلەلەردىڭ ءبىرى بولۋى ابدەن مۇمكىن.
قازاقستاننىڭ جەنەۆاداعى بۇۇ بولىمشەسى مەن باسقا دا حالىقارالىق ۇيىمدار جانىنداعى تۇراقتى وكىلى, ەلشى ج. ايتجانوۆا جالپى ۇستانىمعا قولداۋ كورسەتىپ, الەمدىك نارىقتاعى سىن-قاتەرلەردى ەڭسەرۋ جانە ينۆەستورلار مەن بيزنەستىڭ سەنىمىن قالپىنا كەلتىرۋ ءۇشىن ينۆەستيتسيالارعا قولايلى جاھاندىق رەتتەۋشى ورتانى قۇرۋ ماڭىزدى شەشىم بولاتىنىن اتاپ ءوتتى. 12-ءشى مينيسترلىك كونفەرەنتسيانى قابىلدايتىن ەل رەتىندە قازاقستان جاڭا جاھاندىق ەرەجەلەردى كوپجاقتى دەڭگەيدە تالقىلاۋدى قولدايدى.
كەشە دسۇ-عا مۇشە ەلدەر ارنايى وتىرىستا ەلەكتروندىق ساۋدانى رەتتەيتىن جاھاندىق ەرەجەلەر جونىندەگى پروگرەستى تالقىلادى, سونداي-اق بارلىق مۇشە ەلدەردىڭ مۇددەسىندە وسى سالادان پايدا الۋ مۇمكىندىگىن اتاپ ءوتتى. بۇگىنگى كۇنى كەلىسسوزدەرگە دسۇ-عا مۇشە 82 ەل قاتىسۋدا.
كەلىسسوزدەرگە قاتىسقان قازاقستان رەسپۋبليكاسى دسۇ-عا مۇشە ەلدەردى ەكونوميكالىق دامۋ دەڭگەيىنە, سونداي-اق ينستيتۋتسيونالدىق جانە ادامي الەۋەتتىڭ قول جەتىمدىلىگىنە سايكەس كەلىسىمنىڭ ءتۇرلى ەرەجەلەرىنە ەلدەردىڭ كەزەڭ-كەزەڭىمەن قوسىلۋىن قامتاماسىز ەتەتىن يكەمدى تەتىكتى قولدانۋ مۇمكىندىگىن قاراستىرۋعا شاقىردى.
بۇل تۇرعىدا الەمدىك ساۋدا مەن حالىقارالىق ساۋداداعى ەلەكتروندى ساۋدانىڭ سەرپىندى ءوسىپ كەلە جاتقان ءرولىن اتاپ ءوتۋ قاجەت. سونىمەن, Alibaba مالىمەتى بويىنشا بيىل ەلەكتروندى ساۋدا ارقىلى ترانسشەكارالىق ساۋدا 7 ترلن اقش دوللارىن قۇرادى.
سول كۇنى دسۇ-عا مۇشە نەگىزگى ەلدەردىڭ ساۋدا مينيسترلەرىنىڭ قاتىسۋىمەن بەيرەسمي كەزدەسۋ ءوتتى, وندا دسۇ-نى رەفورمالاۋ, كەلىسسوز كۇن ءتارتىبىن ىلگەرىلەتۋ جانە ۇيىمعا مۇشە بارلىق ەلدەر ءۇشىن كوپجاقتى ساۋدا جۇيەسىنىڭ وزەكتىلىگى مەن بەدەلىن ساقتاۋ يدەيالارى تالقىلاندى.
ءىس-شارا بارىسىندا تۇراقتى وكىل ايتجانوۆا دسۇ مۇشەلەرى اراسىندا ۇيىم قىزمەتىندە جۇيەلى رەفورمالار جۇرگىزۋ قاجەتتىلىگى تۋرالى كونسەنسۋس بار ەكەنىن اتاپ ءوتتى. ول سونداي-اق كەزدەسۋگە قاتىسۋشىلارعا داۋلاردى شەشۋ جونىندەگى دسۇ ورگانىنىڭ رەفورمالارى, كەلىسسوز قىزمەتى بويىنشا نەگىزگى تاسىلدەردى قامتيتىن جول كارتاسى بويىنشا جۇمىستى باستاۋدى ۇسىندى.
بۇدان باسقا, قازاقستان وكىلى دسۇ مينيسترلىك كونفەرەنتسياسىنا بالىق اۋلاۋدى سۋبسيديالاۋ كەلىسسوزدەرى مەن قىزمەتتەر ساۋداسىن ىشكى رەتتەۋ جونىندەگى پليۋريلاتەرالدى كەلىسىمنىڭ تابىستى اياقتالۋىنا ءۇمىت ءبىلدىردى.
ەلەكتروندىق ساۋدا, ينۆەستيتسيالارعا جاردەمدەسۋ جانە دسۇ-نى رەفورمالاۋعا جاردەمدەسۋ ماسەلەلەرى 2020 جىلى 8-11 ماۋسىمدا نۇر-سۇلتاندا جوسپارلانعان دسۇ-نىڭ 12-ءشى مينيسترلىك كونفەرەنتسياسىنا دايىندىق پروتسەسى شەڭبەرىندە نەعۇرلىم تالقىلاناتىن بولادى دەپ كۇتىلۋدە.
الماتى