ىرعىن قار ىرىق بەرەر ەمەس

شىنىن ايتقاندا, قارا­عاندى وبلىسىندا قار ارشۋ ءىسىنىڭ ماشاقاتى كوبەيىپ تۇر. قاردىڭ مۇنشا كوپ ءتۇسۋى قول­داعى تەحنيكا قورىنىڭ جەتكى­لىكسىز ەكەنىن كوزگە شۇقىپ كور­سەتتى. وبلىس ورتالىعى ءوز الدىنا, قالالار مەن اۋدان ور­تالىقتارى, اۋىلدار, سو­دان سوڭ اۆتوموبيل جولدا­رى ومبى قاردىڭ استىندا قالدى. ءتىپتى ەل اراسىنا «قاراعاندىنىڭ قار تازالايتىن تەحنيكالارىن استاناعا الىپ كەتىپتى» دەگەن قاۋەسەت تە تاراپ كەتكەن بولاتىن. الايدا مۇنى وبلىس اكىمىنىڭ ءباسپاسوز قىزمەتى رەسمي تۇردە جوققا شىعاردى.

وبلىستىق جولاۋشىلار كو­لىگى جانە اۆتوموبيل جولدارى باسقارماسىنىڭ باسشىسى اسكەربەك حالتونوۆتىڭ ايتۋىنشا, وڭىردەگى جولداردىڭ قارىن  تازالاۋمەن 52 مەردىگەر ۇيىم اينالىسىپ ءجۇر. ولار­دىڭ يەلىگىندە 800 بىرلىك تەحنيكا بار.

وكىنىشكە قاراي, كۇنى-ءتۇنى ەسكەرتكەنگە قاراماستان, ادامدار الىس ساپارعا شىعۋىن توق­تاتپاي وتىر. مۇنىڭ ءوزى وبلىس قۇتقارۋشىلارىن ابدەن دىڭكەلەتىپ, ۋاقىتپەن ساناسپاي جۇ­مىس ىستەۋگە, قۇتقارۋ وپەرا­تسيالارىن كۇنى-ءتۇنى جۇزەگە اسى­رۋعا ءماجبۇر ەتىپ وتىر. سوڭ­عى تاۋلىكتىڭ وزىندە قار قۇر­ساۋىندا قالىپ قويعان 300-گە تاياۋ ادام قۇتقارىلىپ, قاۋىپ­سىز جەرگە كوشىرىلدى.

قازىرگى تاڭدا الىس اۋىلدار مەن اۋداندارعا اپاراتىن جولداردىڭ باسىم بولىگىن قار باسىپ قالعان. قولداعى تەح­نيكانىڭ ءبارىن سالعانمەن, الاپات قاردىڭ جەڭىستىك بەرەر ءتۇرى جوق.

تاياۋدا قۇتقارۋشىلار وبلىس­تاعى اقتوعاي اۋدانى­نىڭ جيدەباي اۋىلدىق وكرۋ­گىنە قاراستى سابىرباي قىس­تاعىنداعى جۇكتى ايەلگە «ترەكەل» دەگەن كولىكتىڭ كۇشى­مەن جەتىپ, ايى-كۇنى جەتكەن كەلىن­شەكتى اۋرۋحاناعا امان-ەسەن جەتكىزدى. مۇنداي مىسالدار كوپ-اق.

جولدا قالعان اۆتو جۇر­گىزۋشىلەرگە وبلىستىق پو­لي­تسيا قىزمەتكەرلەرى زور كو­مەك كورسەتىپ ءجۇر. وڭىردەگى بار­لىق اۆتوجولدارعا 27 بەكەت قويى­لىپ, وندا 100-دەن استام ءتار­تىپ ساقشىسى كۇن دەمەي, ءتۇن دەمەي كەزەكشىلىك ەتۋدە.

وبلىستاعى قازىرگى جاع­دايدىڭ وتە كۇردەلى ەكەنىن ءوڭىر باسشىسى جەڭىس قاسىم­بەك تە مويىنداپ وتىر. قار­دان تا­زارتۋ جۇمىستارىن تالقى­لاعان اپپارات كەڭەسىندە ول تۇر­عىن­دار تاراپىنان ءتۇسىپ جاتقان شا­عىمداردىڭ كوپتىگىن اتاپ ءوتتى.

– الداعى كۇندەرگە دەگەن بول­جام ءماز ەمەس. بىرنەشە كۇن قار جاۋىپ, بوران سوعۋى مۇم­كىن دەگەن مالىمەت بار. سوندىقتان رەسپۋبليكالىق جانە وبلىستىق ماڭىزى بار قالالار مەن جولداردا بىلەك سىبانا جۇمىس ىستەۋ كەرەكتىگىن ماڭىزدى ماسەلەلەردىڭ ءبىرى دەپ سانايمىن. قار تازالاۋ تۋرالى كۇن سايىن سەلەكتورلىق رەجىمدە ءار اكىمدى تىڭدايتىن بولامىن, دەدى ول.

سونىمەن قاتار وبلىس اكىمى قار جيناۋعا جانە شى­عارۋعا قوسىمشا تەحنيكا تارتۋدى تاپسىردى. «ول تەحنيكا بار ما, بار بولسا ونى قايدان الادى؟» دەگەن سۇراقتارعا جاۋاپتى ءبىز الداعى كۇندەرى الاتىن بولامىز.

قازىر قار كۇرەۋدەن كوز اشپاي ءجۇرىپ, الداعى كوكتەمدە بولۋى مۇمكىن اپاتتى جاعدايدى ەستەن مۇلدەم شىعارىپ العان­دايمىز. ماسەلەن, قالالاردان تىس­قا تاۋ-تاۋ بولىپ شىعا­رىلعان, كۇرە جولداردىڭ ەكى قاپتالىندا جال-جال بولىپ ءۇيىلىپ جاتقان قار كۇنى ەرتەڭ ەرىگەندە نە بولماق؟ تاپ سول كەزدە قارعىن سۋعا قارسى تۇ­رار امال-ارەكەتىمىز قايسى؟ وكىنىشكە قاراي, ازىرگە مۇنى ويلاپ باس قاتىرىپ جاتقان ادام از. ويتكەنى بار كۇش-قۋات تولاس­سىز جاۋعان قاردى كۇرەۋگە جۇ­مىلدىرىلعان.

قاراعاندى وبلىسى