سەنات بيۋروسىنىڭ وتىرىسى ءوتتى

د.نازارباەۆا ءوز سوزىندە پارلامەنت جوعارعى پالاتاسىنىڭ جۇمىس جوسپارى تۋرالى ايتتى – دەپۋتاتتاردىڭ قاتىسۋىمەن ءبىر جىل ىشىندە 80-گە جۋىق ماڭىزدى شارالار وتەدى. ونىڭ ىشىندە سەناتتا العاش رەت ايماقتار كۇندەرى وتەتىن بولادى.

سەنات باسشىسى سونىمەن قاتار ءبىلىم بەرۋ مەن دەنساۋلىق ساقتاۋدى دامىتۋ جونىندەگى مەملەكەتتىك جاڭا باعدارلامالاردىڭ ورىندالۋىنا مونيتورينگ جۇرگىزۋ مىندەتىن ەرەكشە اتاپ ءوتتى. «ولاردىڭ تولىق ءارى ءتيىمدى جۇزەگە اسۋى سەناتورلاردىڭ نازارىندا بولۋى كەرەك دەپ سانايمىن. حالىقتى الاڭداتاتىن وزەكتى ماسەلەلەر بويىنشا ۇكىمەتكە ناقتى ۇسىنىستار بەرىپ, زاڭدارعا  تۇزەتۋلەر ەنگىزۋىمىز كەرەك», - دەدى د.نازارباەۆا.

سەنات بيۋروسىندا دەپۋتاتتاردىڭ قاڭتار ايىنىڭ باسىنداعى ايماقتارعا ساپارلارىنىڭ قورىتىندىلارى تۋرالى اقپارات تىڭدالدى.

پالاتا توراعاسىنىڭ ورىنباسارى بەكتاس بەكنازاروۆ سەناتورلاردىڭ جۇمىس ساپارلارىن قورىتىندىلاي كەلىپ, پارلامەنتشىلەر ەلىمىزدىڭ ەڭ شالعاي اۋىلدارىندا 460-تان استام كەزدەسۋ وتكىزگەنىن ايتتى. ەلىمىزدىڭ ايماقتارىنداعى تۇرعىندار پارلامەنت قابىلداعان زاڭدار تۋرالى ەگجەي-تەگجەيلى حاباردار بولدى.

كەزدەسۋ بارىسىندا الەۋمەتتىك قامسىزداندىرۋ جانە مىندەتتى مەديتسينالىق ساقتاندىرۋ ماسەلەلەرىنە باسا نازار اۋدارىلدى. ولاردىڭ قاتارىندا وتباسىنداعى بالالار سانىنا قاراي كوپ بالالى وتباسىلارعا سارالانعان جاڭا مەملەكەتتىك جاردەماقى ەنگىزۋ; اتاۋلى الەۋمەتتىك كومەكتىڭ قولدانىستاعى جۇيەسىن وزگەرتۋ جانە از قامتىلعان وتباسىلارداعى بالالارعا ارنالعان اتاۋلى الەۋمەتتىك كومەكتى كەپىلدى الەۋمەتتىك پاكەتپەن تولىقتىرۋ بار.

جۇرتشىلىق تاراپىنان قىلمىستىق, قىلمىستىق ءىس جۇرگىزۋ زاڭناماسىن جەتىلدىرۋ جانە جەكە ادامنىڭ قۇقىقتارىن قورعاۋدى كۇشەيتۋ, بيۋدجەت جانە سالىق زاڭناماسى, وڭالتۋ جانە بانكروتتىق راسىمدەرى, تۇرعىن ءۇي-كوممۋنالدىق شارۋاشىلىق ماسەلەلەرى كوتەرىلگەن بولاتىن.

سەناتورلار ساپارلار قورىتىندىسى بويىنشا سالىق دەمالىسىن ەنگىزۋگە وراي اۋىلدارداعى بيۋدجەتتىڭ ءتورتىنشى دەڭگەيىنە قاتىستى بىرقاتار ماسەلەلەر تۋىنداعانىن اتاپ ءوتتى.

سەنات باسشىسى د.نازارباەۆا تالقىلاۋ بارىسىندا ءۇش جىلدىق سالىق دەمالىسىن ەسكەرە وتىرىپ, تۇسەتىن تابىستاردى وتەۋ تەتىگىن پىسىقتاۋدى ۇسىندى: «جەرگىلىكتى ءوزىن-ءوزى باسقارۋدا كەمىپ قالعان قاراجات ورنىن تولتىرۋ ءۇشىن وسى ءۇش جىلعا وتپەلى ءتارتىپ ۇسىنۋ قاجەت. ءارى قاراي دا, ارينە, ءوزىن-ءوزى باسقارۋعا ۇيرەتۋ, جەرگىلىكتى كادرلاردى دايىنداۋ, جەرگىلىكتى حالىقپەن جۇمىس ىستەۋ ءۇشىن قاراجات قاراستىرۋ قاجەت».

داريعا نازارباەۆا سونداي-اق سەناتورلارعا جەرگىلىكتى جەرلەردەگى ءىستىڭ جاي-كۇيى تۋرالى اقپاراتتى جيناپ قانا قويماي جانە دەپۋتاتتىق ساۋالدارمەن شەكتەلمەي, قولدا بار دەپۋتاتتىق وكىلەتتىكتەردى پايدالانۋ جانە وڭىرلەردەگى ازاماتتاردىڭ پروبلەمالارىن شەشۋگە تىكەلەي اتسالىسۋ قاجەتتىگىنە بيۋرو مۇشەلەرىنىڭ نازارىن اۋداردى.

بيۋرو وتىرىسىندا پالاتانىڭ 23 قاڭتارعا بەلگىلەنگەن جالپى وتىرىسىنىڭ كۇن ءتارتىبى بەكىتىلدى. سەنات دەپۋتاتتارى سەناتورلاردىڭ ايماقتارعا ساپارلارىنىڭ قورىتىندىلارى تۋرالى اقپاراتتى تىڭدايدى جانە «2004 جىلعى 22 جەلتوقسانداعى قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى «بايقوڭىر» عارىش ايلاعىندا «بايتەرەك» عارىش زىمىران كەشەنىن قۇرۋ تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسىن قارايتىن بولادى.

بيۋرودا ماجىلىستە ماقۇلدانعان زاڭ جوباسى كوميتەتكە بەرىلدى.  ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنە «قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى «بايقوڭىر» كەشەنىن گازبەن جابدىقتاۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى ءبولىندى.