جامبىل وبلىسىندا جۇمىس ساپارىمەن جۇرگەن سەناتورلار مۇراتباي جولداسباەۆ, قايرات قوجامجاروۆ جانە ابدالى نۇراليەۆ وبلىستىق كاسىپوداق ۇيىمىنىڭ مۇشەلەرىمەن كەزدەستى.
كەزدەسۋدە ۇجىمدىق شارتتار, قىزمەتكەرلەردىڭ قاۋىپسىزدىگى, ەڭبەكتى قورعاۋ, شاعىن جانە ورتا بيزنەستى قولداۋ مەن جالاقى ماسەلەلەرى تالقىلاندى. پارلامەنتشىلەر دەنساۋلىق ساقتاۋ, ءبىلىم جانە عىلىم سالاسىن دامىتۋدىڭ 2020-2025 جىلدارعا ارنالعان مەملەكەتتىك باعدارلامالارىنىڭ نەگىزگى ەرەجەلەرىن ءتۇسىندىردى.
بۇگىندە وبلىستىق كاسىپوداقتار بىرلەستىگىنە 120 مىڭنان اسا ادام مۇشە بولىپ وتىر. ايماقتاعى 15 سالالىق كاسىپوداق ۇيىمدارىندا 1300-دەن اسا باستاۋىش ۇيىم جۇمىس ىستەيدى.
سونىمەن قاتار دەپۋتاتتار «Talas Investment Company» سەرىكتەستىگىنىڭ قىزمەتىمەن دە تانىستى. كاسىپورىندا 570 ادام جۇمىس ىستەيدى. ولاردىڭ نەگىزگى بولىگى – جەرگىلىكتى تۇرعىندار. وسىنداي كەزدەسۋ تالاس اۋداندىق ورتالىق اۋرۋحاناسى مەن «قازفوسفات» زاۋىتىندا دا ءوتتى.
* * *
پارلامەنت سەناتىنىڭ دەپۋتاتتارى نۇرتورە ءجۇسىپ پەن دينار نوكەتاەۆا الماتى قالاسى اۆتوبۋس پاركتەرىنىڭ باسشىلارىمەن كەزدەستى.
بۇل ءىس-شاراعا قالالىق ءماسليحات دەپۋتاتتارى مەن جەرگىلىكتى اتقارۋشى ورگانداردىڭ باسشىلارى قاتىستى. دەپۋتاتتار كوپشىلىكپەن بىرگە قالالىق جولاۋشىلار كولىگى جۇرگىزۋشىلەرىن دايارلاۋ, قوعامدىق كولىككە قاتىستى حالىقتىڭ مادەنيەتىن ارتتىرۋ, جول اپاتتارىنىڭ الدىن الۋ سياقتى ماسەلەلەردى كەڭىنەن تالقىلادى.
دينار نوكەتاەۆا كولىك ماماندارىنىڭ بىلىكتىلىگىن ارتتىرۋ ورتالىعىنىڭ اۆتوبۋس جۇرگىزۋشىلەرىن قايتا دايارلاۋ مەن كاسىبي شەبەرلىكتەرىن ارتتىرۋعا باعىتتالعان جۇمىستارى ماڭىزدى ەكەنىن اتاپ ءوتتى. اۆتوبۋس پاركتەرىنىڭ باسشىلارى وقۋدان كەيىن جۇرگىزۋشىلەردىڭ جۇمىس ساپاسى جاقسارعانىن, جولاۋشىلار تاسىمالىنا جاۋاپكەرشىلىك كۇشەيگەنىن ايتتى.
ال سەناتور نۇرتورە ءجۇسىپ ورتالىق قىزمەتكەرلەرىن الەۋمەتتىك ساقتاندىرۋ بويىنشا قابىلدانعان زاڭدارمەن تانىستىردى. مىندەتتى الەۋمەتتىك مەديتسينالىق ساقتاندىرۋدىڭ نەگىزگى پرينتسيپتەرى ءتۇسىندىرىلدى.
الماتىدا 2020 جىلدىڭ سوڭىنا دەيىن 100-گە جۋىق ەلەكتروبۋستاردى ىسكە قوسۋ جوسپارلانۋدا.
* * *
پارلامەنت سەناتى اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ توراعاسى ءالي بەكتاەۆ تۇركىستان وبلىسىنىڭ كەلەس اۋدانىندا جۇمىس بابىنداعى ساپارمەن بولدى.
سەناتور وبلىستىق جانە اۋداندىق ءماسليحات دەپۋتاتتارىمەن, مەديتسينا, اۋىل شارۋاشىلىعى جانە سۋ شارۋاشىلىعى قىزمەتكەرلەرىمەن, الەۋمەتتىك-مادەني سالا, شاعىن جانە ورتا بيزنەس وكىلدەرىمەن كەزدەسىپ, پارلامەنت قابىلداعان زاڭداردىڭ نەگىزگى ەرەجەلەرى تۋرالى حاباردار ەتتى.
كەزدەسۋدە مەملەكەت باسشىسىنىڭ قازاقستان حالقىنا جولداۋىنىڭ نەگىزگى باسىمدىقتارىن ىسكە اسىرۋ ماسەلەلەرى تالقىلاندى. سونداي-اق ەلىمىزدە جۇزەگە اسىپ جاتقان رەفورمالار ەگجەي-تەگجەيلى ءتۇسىندىرىلدى.
قاتىسۋشىلار وزدەرىن تولعاندىرعان ماسەلەلەرمەن ءبولىسىپ, ءوڭىردىڭ الەۋمەتتىك-ەكونوميكالىق دامۋى, ءبىلىم بەرۋ, از قامتىلعان وتباسىلاردى قامتاماسىز ەتۋ ماسەلەلەرىن كوتەردى. ءالي بەكتاەۆ بارلىق وزەكتى ماسەلە بويىنشا ءتيىستى ورگاندارعا دەپۋتاتتىق ساۋال جولداناتىنىن جانە جەكە باقىلاۋىنا الاتىنىن اتاپ ءوتتى.
* * *
اتىراۋ وبلىسىندا بىرقاتار كەزدەسۋ وتكىزگەن سەناتور سارسەنباي ەڭسەگەنوۆ الدىمەن پرەزيدەنت جانىنداعى مەملەكەتتىك باسقارۋ اكادەمياسىنىڭ ايماقتىق فيليالىندا بولدى.
جيىنعا اكادەميانىڭ جانە مەملەكەتتىك قىزمەت ىستەرى اگەنتتىگى وبلىستىق دەپارتامەنتى قىزمەتكەرلەرى, وبلىستىق جانە قالالىق ءماسليحاتتاردىڭ دەپۋتاتتارى قاتىستى. سەنات دەپۋتاتى جينالعان قاۋىمعا پارلامەنت قابىلداعان زاڭداردى تانىستىرىپ, حالىقتىڭ ءال-اۋقاتىن ارتتىرۋعا ارنالعان الەۋمەتتىك ماسەلەلەردى شەشۋ زاڭنىڭ ماڭىزدى اسپەكتىلەرى ەكەنىن جەتكىزدى. دەپۋتاتقا اكادەميا فيليالىنىڭ جاڭا عيماراتىنداعى وزىق تەحنولوگيالارمەن جابدىقتالعان وقۋ اۋديتوريالارى كورسەتىلدى.
سونىمەن قاتار سارسەنباي ەڭسەگەنوۆ جۇمىس ساپارى بارىسىندا يساتاي اۋدانىنداعى قامىسقالا اۋىلدىق وكرۋگى تۇرعىندارىمەن كەزدەستى. ول ءىس-شاراعا قاتىسۋشىلارعا 2019 جىلعى زاڭ شىعارۋ جۇمىستارى جونىندە ايتىپ بەردى. كەزدەسۋگە كەلگەن كاسىپكەرلەر دەپۋتاتقا بىلتىر شارۋا قوجالىقتارىن سۋمەن قامتاماسىز ەتۋ ءۇشىن سۋبسيديا بەرىلمەگەنىن ايتتى. وسىعان بايلانىستى «قازسۋشار» مەكەمەسى شارۋا قوجالىقتارىنىڭ باسشىلارىن سوتقا بەرۋدى كوزدەپ وتىر. بۇل ماسەلەنىڭ وڭ شەشىلۋى ءۇشىن شارۋالار دەپۋتاتقا وتىنىشتەرىن ءبىلدىردى.