سەمەيدە ەرتىس وزەنىنىڭ سۋ دەڭگەيى شەكتى مولشەردەن استى

12 قاڭتاردا سەمەي قالاسى اۋماعىنداعى ەرتىس وزەنىندە مۇز كەپتەلىسى پايدا بولىپ, از ۋاقىتتا سۋ دەڭگەيى 380 مەتردەن 450 مەترگە دەيىن كوتەرىلىپتى. وبلىس اكىمى دانيال احمەتوۆ قازىرگى ۋاقىتتا جاعداي ءبىرشاما تۇراقتالعانىن, 12 قاڭتار كۇنى تۇندە سەمەيگە ءوزىنىڭ ورىنباسارى باقىتجان باياحمەتوۆ, «شىعىسجارىلىسوندىرىس» كومپانياسىنىڭ وكىلدەرى بارىپ, جۇمىس ىستەپ جاتقانىن, بۇگىن تىكۇشاق ارقىلى وزەنگە اۋەدەن باقىلاۋ جۇرگىزىلەتىنىن جەتكىزدى. «قازىر سۋ دەڭگەيى 470 مەتر شاماسىندا. وتكەن جىلى سۋ دەڭگەيى 502 مەترگە دەيىن جەتكەن كەزدە دە سۋ باسۋ جاعدايلارى تىركەلگەن جوق. دەگەنمەن, ساقتىقتا قورلىق جوق. ەگەر سۋ دەڭگەيى ودان ارى كوتەرىلگەن جاعدايدا تۇرعىنداردى كوشىرۋگە دايىنبىز» دەدى ايماق باسشىسى.

مامانداردىڭ سوزىنە سەنسەك, وزەندەگى سۋ دەڭگەيىنىڭ كوتەرىلۋىنىڭ شەكتى مولشەرى – 450 سانتيمەتر. «قازگيدرومەت» ماماندارى كەشە ەرتىس وزەنى كۇندىز ءار ساعات سايىن 5,3 سانتيمەترگە كوتەرىلىپ, كەشكە جاقىن 1,6 سانتيمەترگە تومەندەگەنىن, ال 13 قاڭتار كۇنى تاڭەرتەڭ سۋ دەڭگەيى 1 سانتيمەترگە جوعارىلاعانىن ايتادى. ءشۇلبى سۋ ەلەكتر ستانساسىنىڭ تەحنيكالىق ديرەكتورى يۆان دولگوپياتوۆ 2019 جىلدىڭ جەلتوقسان ايىنىڭ ورتاسىنان بەرى ەرتىسكە سۋ جىبەرىلۋ كولەمى سەكۋندىنا 620 تەكشە مەتردى قۇرايتىنىن, بۇل كولەم ازىرگە ساقتالاتىنىن جەتكىزدى. «مۇزدىڭ كەپتەلۋىنە كۇننىڭ جىلىنعانى دا اسەر ەتتى. ەگەر ءبىز سەس-تەن جىبەرىلەتىن سۋ كولەمىن ازايتساق, مۇز كەپتەلىسى كوبەيۋى مۇمكىن. ال ەگەر سۋدىڭ جىبەرىلۋ كولەمىن ۇلعايتساق, وندا سۋ مۇزدىڭ ۇستىمەن كەتىپ, ەرتىس جاعالاۋىنداعى ۇيلەردى سۋ باسۋى مۇمكىن. ءبىزدىڭ ويىمىزشا, قازىرگى جاعدايدا ەشتەڭە ىستەۋدىڭ قاجەتى جوق. بارلىعى تابيعي جولمەن رەتتەلۋگە ءتيىس. وزەندە مۇز جارۋ جۇمىستارىن جۇرگىزۋدىڭ دە قاجەتى جوق» دەيدى «ەرتىس باسسەينى ينسپەكتسياسى» رمك سەمەي اۋماقتىق ءبولىمىنىڭ مامانى ۆالەنتينا پەسچاننيكوۆا.

وبلىستىق توتەنشە جاعدايلار دەپارتامەنتى باسشىسىنىڭ مىندەتىن اتقارۋشى قانات ءابدىلوۆتىڭ ايتۋىنشا, 12 قاڭتاردان بەرى ەرتىس وزەنىنىڭ جاعالاۋى باقىلاۋعا الىنعان. جەكە قۇرامنىڭ 224 ادامى مەن 13 تەحنيكا تاۋلىك بويى كەزەكشىلىك جاساۋدا.

بۇگىن سەمەيدە جۋرناليستەرگە ارناپ بريفينگ وتكىزگەن قالا اكىمى ەرماك ءسالىموۆ اكىمدىك ورىن الۋى مۇمكىن كوشىرۋ جۇمىستارىنا ازىرلەنىپ جاتقانىن, بۇل رەتتە Semey Bus اۆتوبۋس پاركىمەن كەلىسىم جاسالعانىن جانە شاھارداعى ەكى قوناقۇيدە ىستىق تاماعىمەن قوسا ورىن دايىندالعانىن ايتتى.

«كەشە ءبىز ۇيلەرىن سۋ باسۋ قاۋپى بار اۋدان تۇرعىندارىمەن كەزدەسىپ, ەسكەرتتىك. ولار قاجەتتى زاتتارى مەن قۇجاتتارىن ازىرلەپ قويدى. قازىرگى ۋاقىتتا سۋ باسۋ قاۋپى بار بولعانىمەن, جاعداي تۇراقتى. وزەندەگى سۋ دەڭگەيى ساعات سايىن باقىلانۋدا» دەيدى ول.

سەمەي

سۋرەتتەر سەمەي قالاسىنىڭ اقپاراتتىق ورتالىعىنان الىندى