بۇل تۋرالى ەلباسىنىڭ ءباسپاسوز قىزمەتى حابارلادى.
كەزدەسۋ بارىسىندا ەلباسىنا قازاقستانداعى قازىرگى الەۋمەتتىك-ەكونوميكالىق احۋال جانە حالىقتىڭ ءال-اۋقاتىن ارتتىرۋ بويىنشا قابىلدانعان شارالار تۋرالى اقپارات ۇسىنىلدى.
قازاقستاننىڭ تۇڭعىش پرەزيدەنتى بەس ينستيتۋتسيونالدىق رەفورمانى ىسكە اسىرۋعا باعىتتالعان «100 ناقتى قادام» ۇلت جوسپارى تارماقتارىن ساپالى ورىنداۋدىڭ ماڭىزدىلىعىنا نازار اۋداردى.
«ەكونوميكاداعى احۋال جامان ەمەس. قازىر "100 ناقتى قادام" ۇلت جوسپارىن مۇقيات جۇزەگە اسىرۋ ماڭىزدى. ورىندالعان مىندەتتەر بار, بىراق ەرەكشە ءمان بەرۋدى قاجەت ەتەتىن ورىندالماعان تارماقتار دا قالىپ وتىر» دەدى نۇرسۇلتان نازارباەۆ.
ءوز كەزەگىندە اسقار مامين 2019 جىلدىڭ قورىتىندىسى بويىنشا قول جەتكىزگەن ەكونوميكالىق دامۋدىڭ نەگىزگى كورسەتكىشتەرى جانە ۇلتتىق ەكونوميكانى ودان ءارى نىعايتۋ جونىندەگى جوسپارلارى تۋرالى مالىمەت بەردى.
«ەل ەكونوميكاسى تۇراقتى دامىپ كەلەدى. ءبىز جوعارى ەكونوميكالىق كورسەتكىشتەرگە قول جەتكىزدىك. 2019 جىلدىڭ ناتيجەسى بويىنشا ءجىو ءوسىمى 4,5% قۇرادى. نەگىزگى درايۆەرلەر – قۇرىلىس, كولىك, ساۋدا, بايلانىس سالالارى» دەدى پرەمەر-مينيستر.
ا. ءماميننىڭ بايانداماسىنا سايكەس قۇرىلىس سالاسىنىڭ دامۋ قارقىنى 12,9%, ساۋدا – 7,6%, بايلانىس – 5,2%, كولىك – 5,1%, وڭدەۋ سالاسى – 4,4%, تاۋ-كەن ونەركاسىبى – 3,7% قۇرادى. ال حالىقتىڭ تابىسى 5,5%, نەگىزگى كاپيتالعا ينۆەستيتسيالار 8,5% ءوسىپ, ساۋدا اينالىمى $97 ملرد قۇرادى.