قازاقستان جاھاندىق تەڭىزگە شىعار جولى جوق دامۋشى ەلدەردىڭ توبىن باسقاردى

توراعالىق تابىستاۋ ءراسىمى بۇۇ جانىنداعى توپقا مۇشە مەملەكەتتەردىڭ ەلشىلەرى مەن ساراپشىلارى جانە ەڭ دامىماعان ەلدەر, تەڭىزگە شىعار جولى جوق دامۋشى ەلدەر مەن كىشى ارالدىق دامۋشى مەملەكەتتەر ماسەلەلەرى جونىندەگى بۇۇ جوعارى وكىلى فەكيتاموەلوا ۋتويكامانۋ قاتىسۋىمەن ءوتتى.

تشجدە توبىنا 32 ەل, ونىڭ ىشىندە 16 ەل افريكا كونتينەنتىنەن, 10 - ازيادان (ورتالىق ازيا بارلىق بەس ەلى مەن اۋعانستان دا), 4 - ەۋروپادان جانە 2 - وڭتۇستىك امەريكادان كىرەدى. قازاقستان تەڭىزگە شىعار جولى جوق ەڭ ءىرى ەل, مۇحيتتاردان ەڭ الىس قاشىقتىقتا (شامامەن 3750 شاقىرىم) ورنالاسقان.

توراعالىق ەتۋ كەزىندە قازاقستان 2014-2024 جىلدارعا ارنالعان تەڭىزگە شىعار جولى جوق ەلدەر ءۇشىن ۆەنا ءىس-قيمىل باعدارلاماسىن جانە بۇۇ ورنىقتى دامۋ ماقساتتارىن جۇزەگە اسىرۋعا ترانزيت ەلدەرى, بۇۇ اگەنتتىكتەرى جانە باسقا دا مۇددەلى تاراپتارمەن ىنتىماقتاستىقتى كەڭەيتۋ ارقىلى وڭىرلىك نەگىزدە بەلسەندى تۇردە جاردەمدەسەدى.

«توراعا رەتىندە قازاقستان ءبىزدىڭ توبىمىز جانە بارلىق مۇددەلى تاراپتارمەن, ونىڭ ىشىندە بۇۇ مەكەمەلەرى, حالىقارالىق قارجى ينستيتۋتتارى, جەكە سەكتور مەن عىلىمي وكىلدەرى اراسىنداعى ىنتىماقتاستىقتى قارقىنداتۋ ماقساتىندا بارلىق كۇش-جىگەرلەردى سالادى», - دەپ قازاقستاننىڭ بۇۇ جانىنداعى تۇراقتى وكىلى قايرات وماروۆ ءىس-شارا بارىسىندا اتاپ ءوتتى. سونىمەن قاتار, ول توپتى الدىڭعى ەكى جىلداعى كەزىندە باسقارعان پاراگۆايدىڭ بۇۇ جانىنداعى تۇراقتى وكىلى حۋليو سەسار ارريولاعا وسى لاۋازىمداعى اتقارعان ايتارلىقتاي جۇمىس ءۇشىن العىسىن ءبىلدىردى.

فەكيتاموەلوا ۋتويكامانۋ ءوز سوزىندە قازاقستان تشجدە توبىنىڭ مۇددەلەرىن ىلگەرىلەتۋ مەن قورعاۋعا ءاردايىم بەلسەندى ۇستانىمدى ۇستانعانىن اتاپ ءوتتى. سونىمەن بىرگە, ول ساۋدا ماسەلەلەرى جونىندەگى تشجدە مينيسترلىك كەزدەسۋى دۇنيەجۇزىلىك ساۋدا ۇيىمى 12-ءشى مينيسترلىك كونفەرەنتسياسىنىڭ شەڭبەرىندە 2020 جىلى ماۋسىمدا نۇر-سۇلتان قالاسىندا  قازاقستان ۇكىمەتىنىڭ ارقىسىندا ۇيىمداستىرىلاتىنىن حابارلادى.

قازاقستان 2019 جىلعى 25 قىركۇيەكتە نيۋ-يورك قالاسىندا وتكەن تشجدە-ءنىڭ مينيسترلىك جىل سايىن كەزدەسۋى بارىسىندا توپتىڭ توراعاسى بولىپ سايلاندى.

تەڭىزگە اۋماقتىق قول جەتىمدىلىكتىڭ بولماۋى, الەمدىك نارىقتاردان الىستاۋ پەن وقشاۋلانۋ جانە جوعارى ترانزيتتىك شىعىندار تەڭىزگە شىعار جولى جوق ەلدەردىڭ جالپى الەۋمەتتىك-ەكونوميكالىق دامۋىنا ايتارلىقتاي كەدەرگى كەلتىرۋدە. ولاردىڭ تەڭىزدەگى ساۋداسى باسقا ەلدەر ارقىلى ترانزيتكە بايلانىستى. قوسىمشا شەكارالار ءوتۋ جانە جاھاندىق نارىقتاردان قاشىقتىق كولىك قىزمەتتەرىنىڭ قۇنىن ايتارلىقتاي ارتتىرادى. تشجدە-ءنىڭ الدىندا تۇرعان باسقا نەگىزگى سىن-تەگەۋرىندەرىنىڭ ءبىرى - ءالسىز ينفراقۇرىلىم, ەكونوميكالىق شاعىن نارىقتار, كليماتتىڭ وزگەرۋىنە وسالدىق, اقپاراتتىق-كوممۋنيكاتسيالىق تەحنولوگيالارعا قول جەتىمدىلىكتىڭ بولماۋى جانە ت.ب.