سىرتقى ىستەر مينيسترلىگىنىڭ ءباسپاسوز حاتشىسى ايبەك سمادياروۆتىڭ حابارلاۋىنشا, يراندا اپاتقا ۇشىراعان ۋكراينا ۇشاعىندا قازاقستان ازاماتتارى جوق.
«يران سىرتقى ىستەر مينيسترلىگىنىڭ قازاقستاننىڭ تەگەرانداعى ەلشىلىگىنە بەرگەن الدىن-الا اقپاراتى بويىنشا, ۋكراينا اۋە اكومپانياسىنىڭ قۇلاعان ۇشاعىنىڭ جولاۋشىلارى اراسىندا قازاقستاندىقتار جوق. سونىمەن قاتار, قازاقستاندىق كونسۋل كونسۋلدىق ەسەپتە تۇرعان قازاقستان رەسپۋبليكاسىنىڭ بارلىق ازاماتتارىمەن بايلانىسىپ جاتىر»,-دەدى ايبەك سمادياروۆ.
سونداي-اق, يراندا ەسەپتە تۇرعان قازاقستان رەسپۋبليكاسىنىڭ بارلىق ازاماتتارىمەن بايلانىسىپ جاتقاندىعى حابارلاندى. ەلدە قازاقستان رەسپۋبليكاسىنىڭ 174 ازاماتى تىركەلگەن.
وسىعان دەيىن بورتىندا 180 جولاۋشى مەن ەكيپاج مۇشەسى بار Boeing 737 ۇشاعى تاڭەرتەڭ تەگەراندا يمام حومەيني اتىنداعى اۋەجايىنان ۇشقاننان كەيىن كوپ ۇزاماي اپاتقا ۇشىراعانىن حابارلاعان ەدىك.
جەرگىلىكتى باق تاراتقان مالىمەتكە سايكەس, اپاتتان امان قالعاندار بولماۋى مۇمكىن.