بۇگىنگى تاڭدا كوپ بالالى وتباسىلارعا مەملەكەت تاراپىنان ەرەكشە كوڭىل بولىنۋدە. اسىرەسە, بۇل باستاما وبلىس ورتالىقتارىندا جانە شالعاي اۋىلداردا ءتيىمدى جۇزەگە اسىرىلۋدا.
وتكەن جىلدىڭ باسىندا جامبىل وبلىسىنىڭ اكىمى اسقار مىرزاحمەتوۆ كوپ بالالى انالارمەن كەزدەسىپ, جامبىلدىق كوپ بالالى جانە از قامتىلعان وتباسىلار ءۇشىن 8 جاتاقحانا سالىناتىنىن ايتقان ەدى. بۇل باستاما تەك تاراز قالاسىندا عانا ەمەس, وبلىستىڭ بىرقاتار اۋداندىق ماڭىزى بار قالالارىندا دا جۇزەگە اسقان بولاتىن.
جاڭا جىل قارساڭىندا جامبىل وبلىسىنىڭ 80 جىلدىعىنا وراي تالاس اۋدانىنىڭ ورتالىعى قاراتاۋ قالاسىندا 44 پاتەرلى جاتاقحانا پايدالانۋعا بەرىلدى. جاڭادان بوي كوتەرگەن بۇل №3 جاتاقحانا بارلىق تالاپقا ساي جاراقتاندىرىلعان. تۇرعىنداردىڭ ىڭعايىنا قاراي بارلىق مۇمكىندىك قاراستىرىلعان. پاتەرگە نەگىزىنەن كوپ بالالى جانە از قامتىلعان وتباسىلار يە بولدى. يگىلىكتى شاراعا تالاس اۋدانىنىڭ اكىمى باقىت قازانباسوۆ ارنايى قاتىسىپ, جاڭا قونىسقا يە بولعان ازاماتتارعا پاتەر كىلتتەرىن تاپسىردى.
ءوز سوزىندە اكىم بۇل يگىلىكتىڭ ءبارى دە مەملەكەتتىڭ قولداۋىنىڭ ناتيجەسىندە بولىپ وتىرعانىن, الداعى ۋاقىتتاردا دا كوپ بالالى جانە از قامتىلعان وتباسىلارعا ءتيىستى قولداۋلار بولاتىنىن جەتكىزدى. سونىمەن قاتار پاتەر ساتىپ الۋ ماقساتىندا بەكىتىلگەن الگوريتمگە سايكەس, بۇل ماقساتقا اۋداندىق بيۋدجەتتەن 74,2 ميلليون تەڭگە قارالىپ, ناتيجەسىندە 65,65 ميلليون تەڭگەگە 17 پاتەر ساتىپ الىنعان. مەرەكە قارساڭىندا باقىت قازانباسوۆ وسىنداي بىرقاتار پاتەر كىلتتەرىن دە ءوز يەلەرىنە تاپسىردى.
جامبىل وبلىسى