قازاقستاندا اتاۋلى الەۋمەتتىك كومەك (ااك) تاعايىنداۋدىڭ جاڭا فورماتى ەنگىزىلدى. ول بويىنشا ەلوردانىڭ 4 اۋداندىق اكىمدىگىندە حالىققا ءتۇسىندىرۋ جۇمىستارى جۇرگىزىلىپ جاتىر. بۇل تۋرالى قالا اكىمدىگىنىڭ رەسمي سايتى حابارلادى.
بۇگىننەن باستاپ ااك تاعايىنداۋ بويىنشا ازاماتتاردى قابىلداۋ «جانۇيا» وتباسى ينستيتۋتىن قولداۋ ورتالىعىندا, قالالىق جۇمىسپەن قامتۋ جانە الەۋمەتتىك قورعاۋ باسقارماسىندا جانە 4 اۋداندىق اكىمدىكتە جۇزەگە اسىپ جاتىر. جۇمىسپەن قامتۋ جانە الەۋمەتتىك قامتۋ باسقارماسى ماماندارىنىڭ ايتۋىنشا, حالىققا قىزمەت كورسەتۋ تەرەزەلەرى جەتكىلىكتى, ازاماتتار كەزەك بويىنشا قابىلدانۋدا.
«ااك تاعايىنداۋ جۇيەسىنە 2020 جىلدىڭ قاڭتار ايىنان باستاپ وزگەرىس ەنگىزىلدى. ماسەلەن, وتكەن جىلى ءار وتباسىعا ناقتى ءبىر دەڭگەيدە قارجى تولەنىپ كەلگەن. ەندى سول جانۇيانىڭ ءبىر ايلىق ورتا تابىسىنىڭ كەدەيلىك شەگىنىڭ ايىرماسى عانا تولەنەدى. وسى جىلدىڭ العاشقى توقسانىنداعى كەدەيلىك شەك 24 258 تەڭگەنى قۇرايدى. مىسالعا ءبىر وتباسىنىڭ ءتورت بالاسى بولسا, ونىڭ ارقايسىسىنا وتكەن جىلدىڭ سوڭعى توقسانىندا 23 389 تەڭگە تاعايىندالىپ كەلگەن. ەندى وتباسىنىڭ تابىسى ايىنا ءبىر ادامعا 12 مىڭ تەڭگەنى قۇرايتىن بولسا, جوعارىدا اتالعان 24 258 تەڭگەدەن وسى 12 مىڭ تەڭگە الىنىپ تاستالادى. سول سياقتى جانۇيادا جۇمىس ىستەۋگە قابىلەتتى ازاماتتار بولىپ, الايدا وتباسىن اسىراۋدان باس تارتسا, ااك وزگەلەرىنە دە تاعايىندالمايدى. ال وسىدان كەيىن ااك-كە قايتا قۇجات تاپسىرۋ ءۇشىن التى اي كۇتۋىنە تۋرا كەلەدى», دەدى ەسىل اۋدانى جۇمىسپەن قامتۋ جانە الەۋمەتتىك قامتۋ باسقارماسىنىڭ باس مامانى اينۇر اۋباكىروۆا.
باسقارما قىزمەتكەرى ءسوز اراسىندا ءبىر ۇيدەن نەمەسە ءبىر كولىكتەن كوبىرەك دۇنيە-مۇلكى بار وتباسىلارعا ااك تاعايىنداۋ جۇيەسى قالاي جۇرگىزىلەتىنىن ءتۇسىندىرىپ ءوتتى.
«جاڭا فورمات بويىنشا بيىلدان باستاپ وتباسىنىڭ مەنشىگىندە ءبىر ۇيدەن نەمەسە ءبىر اۆتوكولىكتەن كوپ مۇلكى, سونداي-اق ولاردا جەر تەلىمى, تابىس اكەلەتىن بولمەلەرى بولسا, ۋچاسكەلىك كوميسسيانىڭ قورىتىندىسى بويىنشا ولارعا اتاۋلى الەۋمەتتىك كومەك تاعايىندالمايدى. الايدا بۇل وتباسىنىڭ مۇگەدەك بالاسى بولسا نەمەسە كوپبالالىلار ساناتىنا جاتسا بۇل كريتەري ولارعا قولدانىلمايدى», دەدى ول.
ايتا كەتەيىك, 2020 جىلعى 1 قاڭتاردان باستاپ كامەلەتكە تولماعان 4 جانە ودان دا كوپ بالاسى بار وتباسىلارعا ارنايى مەملەكەتتىك جاردەماقى تولەنەدى. ەسىل اۋدانى جۇمىسپەن قامتۋ جانە الەۋمەتتىك قامتۋ باسقارماسىنىڭ حابارلاۋىنشا, اۋداندىق اكىمدىككە كۇنىنە 30-40 ادام جۇگىنەدى. 2019 جىلدىڭ جەلتوقسان ايىنداعى جاعداي بويىنشا ەسىل اۋدانىندا 696 ازامات ااك الىپ, 250 وتباسى شارتسىز اقشالاي كومەكپەن قامتاماسىز ەتىلدى.