قىزىلوردا قالاسىنا كەلە قالساڭىز, قايناعان تىرشىلىككە كۋا بولاسىز. كوشەلەر كۇردەلى جوندەلىپ, جارىق باعانالارى جاڭارتىلىپ, سۋ جاڭا ايالدامالار قويىلىپ جاتقانىن كورەسىز. بۇرىن دا قالا كورىكسىز ەمەس ەدى. دەگەنمەن, سوڭعى ايلاردا قالانىڭ دامۋى جاڭاشا سيپاتقا ەنگەنىن بايقايمىز.
قىزىلوردانىڭ كوشەلەرى قالاي جوندەلىپ جاتىر؟ وعان قانشا قارجى ءبولىندى؟ جارىق باعانالارىن بارلىق كوشەلەرگە ورناتا ما؟ قالا ورتالىعىنداعى ايالدامالاردىڭ قانشاسى جاڭارتىلادى؟
«ەگەمەن قازاقستان» گازەتىنىڭ قىزىلوردا وبلىسىنداعى مەنشىكتى ءتىلشىسى ەرجان بايتىلەس قالا اكىمى نۇرلىبەك نالىباەۆقا:
– ءسىز بۇعان نە دەيسىز؟
– جالپى, قىزىلوردا قالاسىندا ۇزىندىعى 612 شاقىرىمدى قۇرايتىن 765 كوشەنىڭ 535-ءى اسفالتتانعان. ال 138 كوشەگە تاس جول توسەلسە, قالعان 92-ءسى قارا جول ساناتىندا. بيىل قالا كوشەلەرىنىڭ جولدارى جاڭاشا سيپاتقا يە بولىپ وتىر. ايماق باسشىسى قىرىمبەك ەلەۋ ۇلىنىڭ تىكەلەي قولداۋىمەن رەسپۋبليكالىق جانە جەرگىلىكتى بيۋدجەتتەن 5 ميلليارد 241,8 ميلليون تەڭگە ءبولىنىپ, وعان جالپى ۇزىندىعى 89,5 شاقىرىمدى قۇرايتىن 73 كوشەگە قايتا جاڭعىرتۋ, كۇردەلى جانە ورتاشا جوندەۋ جۇمىستارى جۇرگىزىلۋدە. سونىمەن قاتار, قالالىق بيۋدجەتتەن بولىنگەن 95 ميلليون 167 مىڭ تەڭگەگە 70 كوشەنىڭ جولدارى اعىمداعى جوندەۋدەن وتكىزىلمەك. بۇگىنگى كۇنگە دەيىن ۇزىندىعى 27,5 شاقىرىم بولاتىن 24 كوشەگە كۇردەلى, قايتا جاڭعىرتۋ جانە ورتاشا جوندەۋدەن ءوتتى. سونداي-اق, 46 كوشەگە اعىمداعى جوندەۋ جۇمىستارى جۇرگىزىلدى. بۇدان بولەك, اۋەجايدان قالاعا دەيىنگى جولدار كۇردەلى جوندەۋدەن وتكىزىلىپ, جارىقتاندىرىلىپ جاتىر. ال قالاداعى ورتالىق جول بولىپ سانالاتىن جىبەك جولى كوشەسى التى جولاقتى داڭعىلعا اينالىپ, كەڭەيتىلۋ ۇستىندە. قازىر بۇل جولداردا ەۋروپالىق ستاندارتقا ساي قيىرشىق تاستى-ماستيكالىق اسفالت-بەتون دەپ اتالاتىن سوڭعى قاباتى سالىنىپ جاتىر.
بيىل قالالىق بيۋدجەتتەن باعدارشامداردىڭ جوبا-سمەتالىق قۇجاتتارىن قاراۋعا ءتيىستى قارجى بەرىلىپ, بۇگىنگى كۇنى جاڭا ۇلگىدەگى 31 باعدارشام ورناتۋعا قالالىق بيۋدجەتتەن 417 ميلليون 300 مىڭ تەڭگە ءبولىندى. سونىمەن قاتار, جول بەلگىلەرىنە 8 ميلليون 600 مىڭ تەڭگە جانە جول سىزىقتارىنا 20 ميلليون 694 مىڭ تەڭگە قاراستىرىلدى.
قالادا اباتتاندىرۋ جۇمىستارى قارقىن الدى. وسى جىلى قالالىقتاردىڭ وزەكتى ماسەلەلەرىنىڭ ءبىرى – جاياۋ جۇرگىنشىلەر جولىن سالۋعا وبلىستىق, قالالىق بيۋدجەتتەن 923 ميلليون تەڭگە ءبولىندى. اتالعان قارجىعا 24,3 شاقىرىمدى قۇرايتىن 20 كوشەگە جاياۋ جۇرگىنشىلەر جولى سالىنىپ, 37 كوپ قاباتتى تۇرعىن ءۇيدىڭ اۋلاىشىلىك جاياۋ جۇرگىنشى جولدارى مەن اۆتوتۇراقتارى جوندەۋدەن وتكىزىلۋدە. قازىرگى ۋاقىتتا بۇل جۇمىستار 50 پايىزعا ورىندالدى. سونىمەن قاتار, رەسپۋبليكالىق جانە جەرگىلىكتى بيۋدجەتتەردەن بولىنگەن 537 ميلليون 900 مىڭ تەڭگەگە قالادا ۇزىندىعى 52,2 شاقىرىمدى قۇرايتىن 43 كوشە جارىقتاندىرىلىپ وتىر. بۇل ءىس تەك قالامەن شەكتەلمەيدى. قالاعا قارايتىن اۋىلداردا دا 37 كوشەگە جاڭا جارىق باعانالارى ورناتىلىپ جاتىر.
اباتتاندىرۋ جۇمىستارىندا كوپقاباتتى تۇرعىن ءۇي اۋلالارىندا 23 بالالار سپورت الاڭى سالىنىپ, قازىرگى زامان تالابىنا ساي 50 جەرگە اۆتوبۋس ايالدامالارى ورناتىلۋدا.
قىزىلوردا.