ماحامبەت دوسمۇحامبەتوۆ: ءبىزدىڭ تابىسىمىز – اسسامبلەيانىڭ بارلىق مۇشەلەرىنىڭ جۇمىسىنىڭ جەمىسى

سەسسيا جۇمىسىنا اتىراۋ وبلىسى قازاقستان حالقى اسسامبلەياسىنىڭ توراعاسى, وبلىس اكىمى ماحامبەت دوسمۇحامبەتوۆ قاتىستى.

ايماق باسشىسى قازاقستان حالقى اسسامبلەياسى 2020 جىلى شيرەك عاسىرلىق مەرەيتويىن اتاپ وتەتىن ايتتى. اسسامبلەيا ەلىمىزدەگى بارلىق ۇلت وكىلدەرىن ءبىر شاڭىراق استىنا بىرىكتىرىپ, تاۋەلسىز ەلىمىزدىڭ دامۋىنا زور ۇلەس قوسىپ كەلەدى.

-ەلباسى, قازاقستان حالقى اسسامبلەياسىنىڭ توراعاسى نۇرسۇلتان نازارباەۆ ءبىزدىڭ حالىقتىق يگىلىگىمىز - قازاقستاندىق تابىستىڭ ماڭىزدى ءۇش كىلتىن انىقتاپ بەردى. ءبىرىنشىسى – تىلىنە, دىنىنە بولىنبەستەن, بارلىق قازاقستاندىقتاردىڭ بىرلىگى. ەكىنشىسى – بارلىعىمىزعا جانە ارقايسىمىزعا ءتان تاعاتتىلىق. ەتنوستىق جانە ءدىني ايىرماشىلىقتى بايىپپەن ءتۇسىنۋ جانە قۇرمەتپەن قابىلداۋ. ءۇشىنشى – تاريحي تاعدىرىمىزدىڭ ورتاقتىعى, دەدى ماحامبەت دوسمۇحامبەتوۆ.

اسسامبلەيا جۇمىسى ەتنيكالىق ماسەلەلەر شەڭبەرىنەن شىقتى. قازىر باستى نازاردا تۇراقتىلىق پەن دامۋدى قولداۋعا بارلىق قوعامدىق كۇشتەردى بىرىكتىرۋ, ازاماتتاردى, ازاماتتىق قوعام, عىلىم مەن مادەنيەت ينستيتۋتتارىن تارتۋ ماسەلەسى تۇر.

وبلىستا قوعامدىق كەلىسىم, انالار كەڭەسى, «جاڭعىرۋ جولى» جاستار شتابى, عىلىمي-ساراپتاما توبى, جۋرناليستەر كلۋبى تابىستى جۇمىس ىستەۋدە. ەتنومادەني بىرلەستىكتەردىڭ شىعارماشىلىق ۇجىمدارى وبلىس اسسامبلەياسىن رەسپۋبليكالىق, حالىقارالىق شارالاردا لايىقتى كورسەتىپ ءجۇر.

-كەلەر جىلى ەلىمىزدە بىرقاتار ماڭىزدى شارالار اتالىپ وتەدى – عالىم, فيلوسوف ءابۋ ناسىر ءال-ءفارابيدىڭ 1150 جىلدىعى, ۇلى ابايدىڭ 175 جىلدىعى, اتا زاڭنىڭ, قازاقستان حالقى اسسامبلەياسىنىڭ 25 جىلدىعى. اتىراۋلىقتار ەلىمىزدەگى وسى ماڭىزدى شارالارعا بەلسەندىلىكپەن قاتىسادى دەگەن سەنىمدەمىن, دەدى ماحامبەت دوسمۇحامبەتوۆ.

وبلىس اكىمى ءبىزدىڭ تابىسىمىز اسسامبلەيانىڭ بارلىق مۇشەلەرىنىڭ بىرلەسە اتقارعان جۇمىستارىنىڭ جەمىسى ەكەنىن اتاپ ءوتتى. سەسسيا بارىسىندا اسسامبلەيانىڭ قوعامدىق كەلىسىم مەن ۇلتارالىق تاتۋلىقتى نىعايتۋعا ۇلەس قوسىپ جۇرگەن بەلسەندى مۇشەلەرى ماراپاتتالدى.

شارا وبلىستاعى ەتنومادەني بىرلەستىكتەردىڭ وكىلدەرى ونەر كورسەتكەن كونتسەرتپەن اياقتالدى.