قازاقستان رەسپۋبليكاسىنىڭ ەلشىسى ساتىبالدى بۇرشاقوۆ يزرايل مەملەكەتىنىڭ پرەزيدەنتى رەۋۆەن ريۆلينگە «Beit Hanassi» رەزيدەنتسياسىندا سەنىم گراموتالارىن تاپسىردى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
سالتاناتتى ءراسىم باراسىندا يزرايل پرەزيدەنتى مەن قازاقستان ەلشىسى ەكىجاقتى قارىم-قاتىناستار مەن ولاردىڭ دامۋ پەرسپەكتيۆالارىن, سونداي-اق حالىقارالىق فورماتتار اياسىنداعى ءوزارا ءىس-قيمىلداردى تالقىلادى.
ەكىنشى دۇنيەجۇزىلىك سوعىس كەزىندە ەۆرەيلەرگە باسپانا بەرگەنى ءۇشىن العىس بىلدىرە وتىرىپ, ر.ريۆلين قازاق حالقىنا دەگەن العىس سەزىمى يزرايلدىقتاردىڭ جۇرەگىندە ماڭگى ساقتالادى دەپ سەندىردى.
يزرايل مەملەكەتىنىڭ باسشىسى كوپۇلتتى قازاقستانداعى تولەرانتتىلىق پەن كونفەسسياارالىق كەلىسىم ساياساتى جوعارى قۇرمەتكە لايىق جانە ءىس جۇزىندە كسەنوفوبياعا, انتيسەميتيزمگە جانە باسقا دا توزىمسىزدىك كورىنىستەرىنە قارسى تۇرۋ قاجەتتىلىگىنىڭ ايقىن ۇلگىسى بولىپ تابىلاتىنىن اتاپ ءوتتى.
دەنساۋلىق ساقتاۋ, يندۋستريا, جوعارى تەحنولوگيالار جانە نوۋ-حاۋ سالاسىنداعى سىندارلى جانە ءوزارا ءتيىمدى ەكىجاقتى ىنتىماقتاستىق دەڭگەيىن جوعارى باعالاي وتىرىپ, يزرايل پرەزيدەنتى قازاق ەلشىسىنە بىرلەسكەن جوسپارلار مەن جوبالاردى ىسكە اسىرۋدا تابىس تىلەدى.
قازاقستان حالقى مەن پرەزيدەنتىنە تاۋەلسىزدىك كۇنىنە وراي قۇتتىقتاۋ جولداعانى ۇشىن يزرايل مەملەكەتىنىڭ باسشىسىنا العىسىن بىلدىرە وتىرىپ, س.بۇرشاقوۆ دوستىق بايلانىستاردى ودان ارى نىعايتۋ, اتاپ ايتقاندا ەكى ەل اراسىنداعى ساۋدا جانە ەكونوميكالىق كووپەراتسياعا قارقىن بەرۋ ۇشىن بارلىق كۇش-جىگەرىن جۇمسايتىنىنا كامىل سەندىردى.
ءسوز سوڭىندا ر.ريۆلين پرەزيدەنت قاسىم-جومارت توقاەۆقا ەڭ ىزگى تىلەكتەرىن جولداپ, يزرايلگە رەسمي ساپارمەن كەلۋگە شاقىردى.