نيۋ-يوركتەگى دجون كەننەدي اتىنداعى حالىقارالىق اۋەجايىندا ديماش قۇدايبەرگەندى الەمنىڭ تۇكپىر-تۇكپىرىنەن كەلگەن 150-گە تارتا جانكۇيەرى قازاقستاننىڭ تۋىمەن جانە گۇل شوقتارىمەن كۇتىپ الدى. بۇل تۋرالى dimashnews.com حابارلادى.
ءارتۇرلى مەملەكەتتەن جينالعان كوپشىلىكتىڭ اراسىندا جاسى دا, كارىسى دە بار. ديماشتى قارسى الۋشىلاردىڭ كوپشىلىگىنىڭ قولدارىندا قازاقستاننىڭ كوك تۋى جەلبىرەيدى. سونىمەن قاتار سۇيىكتى انشىلەرىنىڭ پورترەتتىك سۋرەتتەرىن دە ۇستاپ شىققاندار كەزدەسەدى.
جانكۇيەرلەرى قازاقستاندىق تانىمال ءانشىنىڭ كونتسەرتىنە ساتتىلىك تىلەدى. بىرنەشە ساعاتتىق ۇشۋدان كەيىن شارشاعان ديماش ولارعا ادەتتەگىدەي العىسىن ايتىپ, بىرگە ەستەلىك فوتولارعا ءتۇستى.
ەسكە سالا كەتەيىك, نيۋ-يوركتەگى 19 مىڭ كورەرمەنگە ارنالعان Barclays Center-دە بولاتىن ديماشتىڭ كونتسەرتى جەرگىلىكتى ۋاقىتپەن 9 جەلتوقسان كۇنى, نۇر-سۇلتان قالاسىنىڭ ۋاقىتىمەن 10 جەلتوقسان كۇنى وتەدى.
ديماش «Arnau tour ENVOY» اياسىنداعى ساپارىنىڭ جاڭا باعدارلاماسىمەن ونەر كورسەتەدى دەپ كۇتىلۋدە. ءانشىنىڭ ءوزى بۇرىن ايتقانداي, كونتسەرتتىك باعدارلاما كورەرمەندەرگە قازاقتىڭ ءتول ونەرىن قازىرگى زامانعى ينتەرپرەتاتسيامەن تانىستىرادى.
ديماشتىڭ بارلىق قويىلىمدارىنان ۇلتتىق ناقىشتار بايقالىپ تۇرادى. وسىدان جانكۇيەرلەردىڭ ءانشىنى بۇكىل الەمگە قازاق مادەنيەتى مەن مۋزىكاسىنىڭ حابارشىسى دەپ بەكەر اتامايتىنىن ۇعامىز.نيۋ-يوركتەگى شوۋدىڭ نەگىزگى تاقىرىبى – «كوسموس جانە الەمنىڭ شەكسىزدىگى». ارينە, بۇل شارانىڭ ازىرگە ايتىلمايتىن اقپاراتتارى دا بار, ولار قۇپيا تۇردە ساقتالادى.
باعدارلامادا قازاقستاننىڭ استاناسى – نۇر-سۇلتاندا وتكەن جازعى كونتسەرتتىڭ دە ەڭ جاقسى ساتتەرى قامتىلعان. سونىمەن قاتار وسى باعدارلاما ءۇشىن ارنايى جاسالعان جاڭا تۋىندىلار دا بار.ديماش اندەردى قازاق, اعىلشىن, ورىس جانە قىتاي تىلدەرىندە شىرقايدى.