ەلورداداعى «Qazaqstan» ورتالىق كونتسەرت زالىندا «قازاقكونتسەرت» مەملەكەتتىك كونتسەرتتىك ۇيىمى مەن مادەنيەت جانە سپورت مينيسترلىگىنىڭ ۇيىمداستىرۋىمەن «TURAN» توبىنىڭ ەسەپ بەرۋ كونتسەرتى ءوتتى.
«TURAN» ەتنو-فولكلورلىق ءانسامبلى – ەلىمىزدىڭ ۇلتتىق مۋزىكالىق مۇراسىن جاڭعىرتىپ, ۇمىت بولا باستاعان ءتول اسپاپتاردىڭ سۇيەمەلدەۋىمەن كونە كۇي-جىرلاردى ناسيحاتتاپ جۇرگەن بىرەگەي توپ. ونجىلدىق تاريحى بار ونەر ۇجىمى قازاق مۋزىكاسىن الەمگە ايگىلەپ, 70-تەن استام شەت مەملەكەتتە 600-دەن استام جەكە كونتسەرت بەرگەن. ءانسامبلدىڭ الەمنىڭ ەڭ اتاقتى «كارنەگي حولل», «كەننەدي ورتالىعى», «كونتسەرت حاۋس», «كرەمل سارايى», «ساللە كورتو» زالدارىندا ونەر كورسەتكەنىن ايتۋىمىز كەرەك.
فولكلورعا قىزىقپايتىن كورەرمەننىڭ ءوزى «TURAN» دەسە ەلەڭدەپ تۇراتىنى بار. سەبەبى ولار مۋزىكالىق اسپاپتاردىڭ دىبىسىن قازىرگى زامانعا ساي لايىقتاپ, جاڭا فورماتتا ۇسىنادى. ۇلى دالانى دۇبىرگە تولتىرعان بارلىق كورىنىستى كورەرمەننىڭ كوز الدىنا كەلتىرىپ, زامانا رۋحىن سەزىندىرەدى. ولار – ماقسات مەدەۋبەك, سەرىك نۇرمولداەۆ, باۋىرجان بەكمۇحانبەتوۆ, ەرجىگىت اليەۆ جانە جانتۋ داداباەۆ سىندى تالانتتى مۋلتي ينسترۋمەنتاليست مۋزىكانتتار. حالقىمىزدا وتىزدان استام ۇلتتىق مۋزىكالىق اسپاپ بولسا, مۋزىكانتتاردىڭ ارقايسىسى سولاردىڭ بىرنەشەۋىندە ويناۋدى مەڭگەرگەن.
كەشەگى ەسەپ بەرۋ كونتسەرتتەرىندە دە «TURAN» وزدەرىنە ءتان ستيلمەن, مازمۇنمەن زالدى ونەر نۇرىنا بولەدى. ولار ورىنداعان «ورتەكە», «اقساق قۇلان», «كەرۋەن», «كوروعلى», «باقسى» كۇيلەرى كورەرمەندەرگە ساحنا ارتىندا تۇرعان ۇلكەن ەكران ارقىلى كورىنىستەرمەن ادىپتەلىپ, ارلەنىپ, جاڭا پىشىنمەن تۇرلەنىپ جەتتى. تانىمال بەس جىگىت جاي عانا ورىنداي سالمايدى. كەيدە ۇلكەن, كەيدە كىشىگىرىم تەاترلاندىرىلعان كورىنىس جاسايدى. سول زاماننىڭ رۋحىن تىرىلتكەندەي بولادى.
«TURAN» توبىن تەك قانا فولكلورلىق شىعارمالاردى ورىنداۋشىلار دەسەك, قاتە بولار ەدى. ولار جاڭا زامان كومپوزيتورلارىنىڭ دا شىعارمالارىن ورىندايدى, وزدەرى دە مۋزىكا جازادى, ارلەيدى. شىعارماشىلىق كەشتەرىندە ولار ن.تىلەنديەۆتىڭ «اققۋ», ا.رايىمقۇلوۆانىڭ «شابىت» شىعارمالارىمەن قاتار وزدەرىنىڭ ءتول تۋىندىلارىن دا قالىڭ جۇرتشىلىققا ۇسىندى.
كونتسەرتتە توپتان بولەك نۇر-سۇلتان قالاسى اكىمدىگى مەملەكەتتىك اكادەميالىق فيلارمونياسىنىڭ سيمفونيالىق وركەسترى, Astana musical مەملەكەتتىك تەاترى, قازاق ۇلتتىق حورەوگرافيا اكادەمياسىنىڭ ارتىستەرى دە ونەر كورسەتتى.