22 قاراشادا قازاق ۇلتتىق ونەر ۋنيۆەرسيتەتىندە بەلگىلى ەتنوگراف, قازاقستاندىق مۋزىكاتانۋ جانە كومپوزيتورلىق مەكتەپتىڭ نەگىزىن قالاۋشىلاردىڭ ءبىرى الەكساندر ۆيكتوروۆيچ زاتاەۆيچتىڭ 150 جىلدىعىن مەرەكەلەۋ اياسىندا قازاقستان رەسپۋبليكاسى مادەنيەت جانە سپورت مينيسترلىگى «ا. ۆ. زاتاەۆيچ. حاتتار. قولجازبالار. فوتوسۋرەتتەر», «ا. ۆ. زاتاەۆيچ. حالىق اندەرى مەن كۇيلەرى» اتتى بۇرىن جارىققا شىقپاعان تۋىندىلارىنىڭ پرەزەنتاتسياسىن جانە مەرەكەلىك كونتسەرتتى ۇيىمداستىرادى. بۇل تۋرالى مينيسترلىكتىڭ ءباسپاسوز قىزمەتى حابارلادى.
قازاقتىڭ ءداستۇرلى مۋزىكا ۇلگىلەرىن جيناۋشىلار اراسىندا اندەر مەن اسپاپتىق پەسالار-كۇيلەردىڭ ەداۋىر قوماقتى جيناعى ورىس-پولياك كومپوزيتورى, ەتنولوگ, مۋزىكاتانۋشى ا.ۆ. زاتاەۆيچتىڭ ەنشىسىندە. ونىڭ مۋزىكالىق ەتنوگرافيا سالاسىنداعى ەڭبەگى قازاقستاندا مۋزىكا تۋرالى عىلىمنىڭ دامۋى ءۇشىن بەرىك تۇعىر رەتىندە, كوپتەگەن ودان كەيىنگى زەرتتەۋلەر ءۇشىن ادىستەمەلىك نەگىز جانە زەرتتەۋشىلىك بازا رەتىندە قالىپتاستى. كومپوزيتور رەتىندە ول ۇلتتىق كومپوزيتورلىق مەكتەپتىڭ دامۋىنا سەرپىن بەرىپ, ەۋروپالىق اسپاپتار ءۇشىن قازاق اۋەندەرىن نوتاعا جازۋ ءادىسىن ازىرلەدى.
2019 جىلى ا.ۆ. زاتاەۆيچتىڭ 150 جىلدىعىن اتاپ وتۋگە, ونىڭ مۇراسىن تانىمال ەتۋگە, قازاقستان مەن رەسەي اراسىنداعى شىعارماشىلىق بايلانىستاردى نىعايتۋ ماقساتىندا قازاقستان رەسپۋبليكاسى مادەنيەت جانە سپورت مينيسترلىگى بىرقاتار مەرەيتويلىق ءىس-شارالار ۇيىمداستىرىپ, وتكىزدى.
بيىلعى جىلدىڭ 6-7 ماۋسىمىندا الماتى قالاسىندا «تۇلعا, ءداستۇر, مۋزىكالىق ەتنوگرافياداعى مادەنيەت» اتتى حالىقارالىق عىلىمي-تاجىريبەلىك كونفەرەنتسيا ءوتتى. كونفەرەنتسياعا قازاقستان, رەسەي, قىرعىزستان, وزبەكستان, ءازىربايجان, بولگاريا جانە ۆەنگريا ەلدەرىنەن 55 زەرتتەۋشى قاتىستى, ولاردىڭ اراسىندا الەمگە تانىمال عالىمدار مەن جاس عالىمدار دا بار.
11-12 قازاندا پ. ي. چايكوۆسكي اتىنداعى ماسكەۋ مەملەكەتتىك كونسەرۆاتورياسىندا «الەم حالىقتارىنىڭ مۋزىكاسى. زەردەلەۋ پروبلەمالارى: مادەني مۇرانى ساقتاۋ (ا. ۆ. زاتاەۆيچتىڭ 150 جىلدىعىنا ارنالعان)» اتتى حالىقارالىق عىلىمي كونفەرەنتسيا ۇيىمداستىرىلدى. كونفەرەنتسياعا قازاقستان, رەسەي, اقش, ۇلىبريتانيا, بولگاريا جانە وزبەكستان ەلدەرىنەن عالىم-ەتنومۋزىكاتانۋشىلار جانە شىعىستانۋشىلار قاتىستى.
12 قازاندا گنەسسيندەر اتىنداعى رەسەي مۋزىكا اكادەمياسىنىڭ ۇلكەن كونتسەرت زالىندا ن. تىلەنديەۆ اتىنداعى «وتىرار سازى» اكادەميالىق فولكلورلىق-ەتنوگرافيالىق وركەسترىنىڭ كونتسەرتى ۇيىمداستىرىلدى.
قازاقستان رەسپۋبليكاسى مادەنيەت جانە سپورت مينيسترلىگى ا. ۆ. زاتاەۆيچتىڭ 150 جىلدىعىن مەرەكەلەۋدىڭ بىرقاتار ءىس-شارالار قورىتىندىسى رەتىندە ەتنوگرافتىڭ بۇدان بۇرىن جاريالانباعان مۇراسىنىڭ پرەزەنتاتسياسىن ۇيىمداستىرىپ وتىر.
شىندىعىندا ا. ۆ. زاتاەۆيچ حح عاسىردىڭ ءبىرىنشى جارتىسىنداعى قازاق ءداستۇرلى مۋزىكاسىنىڭ پورترەتىن قالىپتاستىرعان ءىرى تۇلعا. كىتاپتا بۇدان بۇرىن جاريالانباعان نوتالىق جازبالار, وڭدەۋلەر, جەكە جازعان حاتتارى جينالعان. قولجازبالاردىڭ جانە فوتوماتەريالداردىڭ ەلەكتروندىق كوشىرمەسىن الۋعا سۇرانىس بەرىپ, جۇمىستى جۇيەلى تۇردە جۇرگىزگەن قازاقستان رەسپۋبليكاسى مادەنيەت جانە سپورت مينيسترلىگى.