جيىن بارىسىندا ەلدەگى تراكتورلار پاركىنىڭ 85 پايىزىن جانە كومبايندار پاركىنىڭ 68 پايىزىن پايدالانۋ مەرزىمى 10 جىلدان اسىپ كەتكەن تەحنيكالار قۇرايتىنى ايتىلدى. جالپى, اۋىل شارۋاشىلىعى تەحنيكاسىنىڭ بارلىق پاركىنىڭ ورتاشا توزۋ دەڭگەيى 76 پايىزدى قۇراپ وتىر.
«2014 جىلدان باستاپ مەملەكەت اۋىل شارۋاشىلىعى تەحنيكاسى پاركىن جاڭارتۋ ءۇشىن ءتۇرلى شارالار قابىلداۋدا. اگروونەركاسىپتىك كەشەندى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسىندا اۋىل شارۋاشىلىعى تاۋار وندىرۋشىلەرىنىڭ ينۆەستيتسيالىق شىعىندارىن جانە اۋىل شارۋاشىلىعى تەحنيكاسى مەن جابدىقتارىن ليزينگكە ساتىپ الۋ كەزىندەگى پايىزدىق مولشەرلەمەلەرىن سۋبسيديالاۋ, سونداي-اق «قازاگرو» ۇبح» اق جەلىسى بويىنشا كرەديت جانە ليزينگ جۇيلەرى قاراستىرىلعان. الايدا ەسكى تراكتورلار مەن كومباينداردىڭ ۇلەسى ازايعان جوق, كەرىسىنشە, ءوسىپ وتىر», دەدى مينيستر ساپارحان وماروۆ.
وسىمدىك شارۋاشىلىعى ونىمدەرىن ءوندىرۋ جانە قايتا وڭدەۋ دەپارتامەنتىنىڭ ديرەكتورى ازات سۇلتانوۆ, 2018 جىلى اۋىل شارۋاشىلىعى تەحنيكاسىن جاڭارتۋدىڭ ورتاشا دەڭگەيى 3,5 پايىزدى قۇراعانىن, 1 جىل بۇرىن بۇل كورسەتكىش ەكى ەسە از بولعانىن ءتۇسىندىردى. ونىڭ ايتۋىنشا, بۇل جەتكىلىكسىز, سەبەبى وڭتايلى دەڭگەي 10 پايىزدى قۇراۋ قاجەت. اۋىل شارۋاشىلىعى تەحنيكاسىن جاڭارتۋ اگروونەركاسىپتەردىڭ قارجىلىق جاعدايلارىمەن, سونداي-اق جوعارى لوكاليزاتسياعا ساي وتاندىق ماشينا ءوندىرىسىنىڭ دامىماعاندىعىنىڭ سالدارىنان تەجەلۋدە.
سونىمەن قاتار مينيسترلىكتە اتاپ وتكەندەي, بۇگىنگى تاڭدا رەسپۋبليكادا 147 مىڭ تراكتور, 38 مىڭنان استام كومباين, 4 مىڭعا جۋىق ەگىستىك كەشەنى, 78 مىڭ تۇقىم سەپكىش جانە 300 مىڭ بىرلىك مال ازىعىن دايىنداۋ جانە توپىراق وڭدەۋ تەحنيكالارى پايدالانىلۋدا. تەحنيكالاردىڭ ەسكىرگەندىكتەن جيىم-تەرىم ماۋسىمىنىڭ مەرزىمى 2 ەسەگە سوزىلادى. ياعني شىققان ەگىستىك ونىمدەرىنىڭ تومەندەۋىنە, جانار-جاعارماي جانە ت. ب. شىعىنداردىڭ كوبەيۋىنە اكەلىپ سوعادى.
جيىن قورىتىندىسى بويىنشا قر اۋىل شارۋاشىلىعى ءمينيسترى ساپارحان وماروۆ ەلىمىزدەگى بارلىق اۋىل شارۋاشىلىعى تەحنيكالارىنا تۇگەندەۋ جۇرگىزۋدى تاپسىردى. ال, وبلىس اكىمدىكتەرىنە ەسكىرگەن تەحنيكالاردى ۋاقىتىلى ەسەپتەن شىعارۋ جانە جاڭارتۋدى قامتاماسىز ەتۋ قاجەتتىلىگى ايتىلدى.