اسقار ءماميننىڭ توراعالىعىمەن وتكەن ۇكىمەت وتىرىسىندا ازىق-ت ۇلىك باعاسىنىڭ ءوسۋى ماسەلەسى قارالدى. بۇل تۋرالى primeminister.kz حابارلادى.
«14 قاراشادا اقمولا وبلىسىن دامىتۋ جونىندەگى كەڭەستە مەملەكەت باسشىسى ازىق-ت ۇلىك باعاسىنىڭ نەگىزسىز وسۋىنە جانە بۇل ماسەلەدە ءتيىستى ورتالىق جانە جەرگىلىكتى مەملەكەتتىك ورگاندار تاراپىنان دۇرىس باقىلاۋ مەن ۇيلەستىرۋدىڭ جوقتىعىنا نازار اۋداردى», — دەدى ا. مامين.
ۇكىمەت باسشىسى جىل باسىنان بەرى الەۋمەتتىك ماڭىزى بار ازىق-ت ۇلىك تاۋارلارىنا شەكتى باعالار بارلىق وڭىرلەردە 15%-دان استام وسكەنىن اتاپ ءوتتى. قاراقۇمىق جارماسى (+62,9%), كۇرىش (+32,3%), ۇن (+27,8%) بارىنەن قىمباتتاعانى بايقالادى. وڭىرلەر تۇرعىسىنان باعانىڭ ەڭ كوپ ءوسۋى شىمكەنت پەن قىزىلوردا, تۇركىستان, الماتى, كوكشەتاۋ, پەتروپاۆل, اقتوبە جانە تارازدا بايقالادى.
«بۇل وڭىرلەر اكىمدىكتەرى مەن اۋىل شارۋاشىلىعى, ۇلتتىق ەكونوميكا, ساۋدا جانە ينتەگراتسيا مينيسترلىكتەرىنىڭ جەتكىلىكتى جۇمىس جۇرگىزبەي وتىرعانىن كورسەتەدى», — دەدى ا. مامين.
پرەمەر-مينيستر ءبىر اپتا ىشىندە الەۋمەتتىك ماڭىزى بار تاۋارلاردىڭ باعاسىن تۇراقتاندىرۋ بويىنشا قىسقا جانە ورتا مەرزىمگە ارنالعان ناقتى شارالار پاكەتىن ازىرلەيتىن جۇمىس توبىن قۇرۋدى تاپسىردى.
ۇكىمەت باسشىسىنىڭ تاپسىرماسى بويىنشا ازىق-ت ۇلىك تاۋارلارىنا باعا ءوسۋىنىڭ الدىن الۋ ماسەلەسىنە جاۋاپ بەرەتىن اۋىل شارۋاشىلىعى, ۇلتتىق ەكونوميكا, ساۋدا جانە ينتەگراتسيا ۆيتسە-مينيسترلەرى جانە شىمكەنت جانە الماتى قالالارىنىڭ, قىزىلوردا, تۇركىستان, اقمولا, سولتۇستىك قازاقستان, اقتوبە, جامبىل وبلىستارىنىڭ اكىمدەرىنىڭ ورىنباسارلارى تارتىپتىك جاۋاپكەرشىلىككە تارتىلاتىن بولادى.