پرەمەر-مينيستر اسقار ءماميننىڭ توراعالىعىمەن وتكەن ۇكىمەتتىڭ سەلەكتورلىق وتىرىسىندا «نۇرلى جەر» مەملەكەتتىك تۇرعىن ءۇي قۇرىلىسى باعدارلاماسىن ىسكە اسىرۋ بارىسى جانە 2020-2025 جىلدارعا ارنالعان جوباسى قارالدى. بۇل تۋرالى primeminister.kz حابارلادى.
اتقارىلىپ جاتقان جۇمىستار تۋرالى قر يندۋستريا جانە ينفراقۇرىلىمدىق دامۋ ءمينيسترى ب.اتامقۇلوۆ, «بايتەرەك» ۇبح» اق توراعاسى ا.ءارىپحانوۆ, قىزىلوردا وبلىسىنىڭ اكىمى ق. ىسقاقوۆ, اقتوبە وبلىسىنىڭ اكىمى و.ورازالين, اتىراۋ وبلىسىنىڭ اكىمى ن.نوعاەۆ جانە نۇر-سۇلتان قالاسى اكىمىنىڭ ورىنباسارى ن.نۇركەنوۆ باياندادى.
مەملەكەتتىك باعدارلاما جۇزەگە اسقان 2017 جىلدان باستاپ تۇرعىن ءۇي قۇرىلىسى سالاسىنا 3,3 ترلن تەڭگەدەن استام ينۆەستيتسيا سالىندى, ونىڭ 85% — جەكە ينۆەستورلاردىڭ قاراجاتى. 300 مىڭعا جۋىق وتباسىنى باسپانامەن قامتاماسىز ەتۋگە مۇمكىندىك بەرگەن 33,5 ملن شارشى مەتر تۇرعىن ءۇي سالىندى.
باعدارلامادا العاش رەت كوپ بالالى وتباسىلار مەن جۇمىس ىستەيتىن جاستارعا ارناپ جالدامالى تۇرعىن ءۇي سالۋ, تابىسى تومەن وتباسىلارعا جەڭىلدىكتى يپوتەكا, جەكە قۇرىلىس سالۋشىلارعا سۋبسيديا بەرۋ سياقتى جاڭا مەحانيزمدەر ىسكە اسىرىلدى.
قىزىلوردا, اقتوبە جانە تۇركىستان وبلىستارى تۇرعىن ءۇي قۇرىلىسى بويىنشا كوشباسشى وڭىرلەر, پاۆلودار, اتىراۋ, ماڭعىستاۋ وبلىستارى جانە نۇر-سۇلتان قالاسى ارتتا قالۋشى جانە قاراجاتتى يگەرۋدە پروبلەمالارى بار وڭىرلەر.
«قر تۇڭعىش پرەزيدەنتى – ەلباسى ن. نازارباەۆ «نۇرلى جەر» باعدارلاماسىن ىسكە اسىرۋدىڭ ماڭىزدىلىعىن, ونىڭ تۇرعىن ءۇي قۇرىلىسىنا مىقتى سەرپىن بەرەتىنىن ەرەكشە اتاپ ءوتتى», — دەدى ا. مامين.
پرەمەر-مينيستر وسى جىلدىڭ جوسپارلى كورسەتكىشى — 13 ملن شارشى مەتر تۇرعىن ءۇيدى پايدالانۋعا بەرۋدى قامتاماسىز ەتۋدى تاپسىردى.
«مەملەكەت باسشىسى قاسىم-جومارت توقاەۆ ءوزىنىڭ سايلاۋالدى باعدارلاماسى مەن قازاقستان حالقىنا ارناعان جولداۋىندا قولدانىستاعى تۇرعىن ءۇي باعدارلامالارىن بىرىڭعاي تۇرعىن ءۇي ساياساتى اياسىندا بىرىكتىرىپ, 2025 جىلعا دەيىنگى «نۇرلى جەر» مەملەكەتتىك باعدارلاماسىن ازىرلەۋدى تاپسىردى», — دەدى ا. مامين.
«نۇرلى جەر» تۇرعىن ءۇي-كوممۋنالدىق دامىتۋدىڭ جاڭا مەملەكەتتىك باعدارلاماسى جىلۋ جانە سۋمەن جابدىقتاۋ, سۋ تارتۋ, كوممۋنالدىق سەكتوردى جاڭعىرتۋ, 2015-2019 جىلدارعا ارنالعان «نۇرلى جول» مەملەكەتتىك ينفراقۇرىلىمدى دامىتۋ جانە 2020 جىلعا دەيىن وڭىرلەردى دامىتۋ باعدارلامالارىنىڭ اياسىندا ۇيلەردى جوندەۋ ماسەلەلەرىن بىرىكتىرەدى.
پرەمەر-مينيستر جاڭا «نۇرلى جەر» مەملەكەتتىك باعدارلاماسى ءاربىر قازاقستاندىققا تۇرعىن ءۇي ماسەلەسىن ءوزىنىڭ تابىس دەڭگەيىنە قاراي شەشۋگە مۇمكىندىك بەرەتىنىن اتاپ ءوتتى.
جوبادا تۇرعىن ءۇي پروبلەماسىن شەشۋمەن قاتار, حالىقتى ساپالى اۋىز سۋمەن قامتاماسىز ەتۋ, تۇرعىن ءۇي-كوممۋنالدىق شارۋاشىلىق ينفراقۇرىلىمىن جاڭعىرتۋ, تۇرعىن ءۇي قورىن جوندەۋ دە كوزدەلگەن.
ا. مامين مەملەكەتتىك باعدارلامانى وسى جىلدىڭ سوڭىنا دەيىن قابىلداۋدى قامتاماسىز ەتۋدى تاپسىردى.