باتىس قازاقستان وبلىسىنداعى اۋدان ورتالىعى ءارى ءىرى تەمىر جول بەكەتى – شىڭعىرلاۋ اۋىلىندا جاياۋ جۇرگىنشىلەر ءۇشىن تەمىر جول كوپىرى سالىندى. قۇنى 75 ملن تەڭگەگە باعالانعان قۇرىلىس 4 اي ىشىندە جەكە دەمەۋشىلەردىڭ كۇشىمەن بوي كوتەرگەن.
شىڭعىرلاۋ اۋىلىن شويىن جول ەكىگە ءبولىپ جاتىر: ەل اراسىندا «استىق قابىلداۋ بەكەتى» دەپ اتالىپ كەتكەن شاعىن اۋداندا 127 ءۇي, 500-گە جۋىق تۇرعىن بار. اۋىلدىڭ نەگىزگى بولىگىنەن – اكىمشىلىك جانە الەۋمەتتىك عيماراتتاردان اجىراتىپ جاتقان ءۇش قاتار رەلستەن شاعىن اۋداننىڭ حالقى شىبىن جانىن شۇبەرەككە ءتۇيىپ, اتتاپ وتەتىن. ەرتەرەكتە پويىز ادام قاعىپ وتكەن وقىس وقيعالار دا بولعان. ويتكەنى كۇن سايىن اعىلىپ جاتاتىن جۇك كەرۋەندەرىنەن بولەك, باتىس قازاقستان وبلىسىن «ۇلكەن جەرمەن» جالعايتىن «نۇر-سۇلتان-ورال», «الماتى-ورال» باعىتىنداعى پويىزدار دا ءدال وسى جولمەن وتەدى. مەملەكەتتىك شەكاراداعى بەكەت بولعاندىقتان, جولاۋشى پويىزدارى ساعاتتاپ كىدىرىپ, شەكارالىق-كەدەندىك باقىلاۋدان وتكىزىلەدى. سول كەزدە شىڭعىرلاۋلىقتار ۇزىن-شۇباق كەرۋەندى اينالىپ وتۋگە ەرىنىپ, ۆاگون استىنان ەڭبەكتەپ ءوتىپ جاتادى. بۇل ارينە, وتە قاۋىپتى بولاتىن.
بۇگىندە شىڭعىرلاۋ اۋىلىندا 8 مىڭداي حالىق بار. اۋىلدىڭ ساۋلەتى كۇن ساناپ ارتىپ, جول توسەلىپ, جاڭا عيماراتتار, ەڭسەلى ەسكەرتكىشتەر تۇرعىزىلۋدا. شاعىن اۋدان تۇرعىندارىنىڭ كوپتەن كۇتكەن تەمىر جول كوپىرىن وسى اۋىلدىڭ ەڭبەك ارداگەرى, قادىرمەندى ازاماتى بولعان داۋىن بەكقۇلوۆتىڭ 100 جىلدىعىنا وراي ونىڭ تۋىستارى كوتەرىپتى. تيپتىك ۇلگىگە ساي, التى قانات ساتىلى, جارىقتاندىرىلعان, زاماناۋي كوپىر قاۋىپسىزدىكتى قامتاماسىز ەتىپ قويماي, اۋىلدىڭ كوركىنە كورىك قوسىپتى. اسىرەسە شەتكى اۋىلدان قاتىناپ وقيتىن 70-تەن اسا وقۋشى بالانىڭ قۋانىشىندا شەك جوق ەكەن.
- تەمىر جول بەكەتىندە مۇنداي كوپىر وتە قاجەت. باتىس قازاقستان وبلىسىنىڭ جانىبەك, سايحىن اۋىلدارىنان دا رەسەيلىك جۇردەك پويىزدار ءجيى ءوتىپ جاتادى. ولار قازاقستاندىق بەكەتتەرگە ءتىپتى توقتامايدى دا. مىنە, اتالعان اۋىلدارعا وسىنداي كوپىر سالىنسا دەپ ارماندايمىن. ويتكەنى, اتالعان ەكى اۋىلدا دا تالاي مارتە وقىس وقيعا بولدى, پويىزعا سوعىلىپ بىرنەشە ادام قازا تاپتى, - دەيدى قوعام بەلسەندىسى ايبولات قۇرىمباەۆ.
باتىس قازاقستان