بوليۆيا پرەزيدەنتى ەۆو مورالەس ەلدەگى توقتاۋسىز كوتەرىلىس ناتيجەسىندە قىزمەتىنەن كەتىپ, مەكسيكادا بوي تاسالاپ ءجۇر. ال بيلىك سەناتتاعى وپپوزيتسيالىق توپتىڭ قولىنا ءوتتى. ەۆو مورالەس بۇل جاعدايدى توڭكەرىسپەن تەڭەستىرىپ وتىر.
ەلدەگى نارازىلىق بيىلعى پرەزيدەنت سايلاۋىنان كەيىن ورشىگەن ەدى. 20 قازاندا باستالعان ميتينگىلەردىڭ ءالى كۇنگە دەيىن نۇكتەسى قويىلماي تۇر. ەۆو مورالەس بۇعان دەيىن دە ءۇش رەت سايلاۋعا تۇسكەن. 2005, 2009, 2014 جىلدارى پرەزيدەنت بولىپ سايلانعان ەدى. ال بيىلعى 20 قازاندا وتكەن سايلاۋدا 47,1 پايىز ناتيجەمەن قارسىلاسى كارلوس مەسانى 10,6 ۇلەسىمەن ارتتا قالدىردى. ال حالىق بولسا سايلاۋدىڭ ءادىل وتكەنىنە كۇماندانىپ, نارازىلىق تانىتتى. 31 قازاندا جاعداي ۋشىعا ءتۇستى. بەيبىت شەرۋلەر قاقتىعىسقا ۇلاسىپ, سانتا-كرۋس پروۆينتسياسىندا ەكى ادام قازا تاپسا, التى ادام جارالاندى. ال قاراشادا مەملەكەتتىڭ قۇقىق قورعاۋ ورگاندارى نارازىلاردىڭ قاتارىن تولىقتىرعانى حابارلاندى. سايلاۋ ناتيجەسىنىڭ كۇماندى بولۋىنا جاۋاپتاردىڭ ەكى كۇننەن سوڭ جاريالانۋى سەبەپ. سايلاۋ ورتالىعى العاشقى كۇنى داۋىستىڭ 80 پايىزىن ساناپ, ودان كەيىن اقپارات بەرۋدى توقتاتقان. بۇل ايىپپەن امەريكا مەملەكەتتەرىنىڭ ۇيىمى دا كەلىسىپ وتىر. ولار ءتىپتى ارنايى اۋديت جاساپ, سايلاۋ ناتيجەسىنىڭ جالعان ەكەنىن دالەلدەپ ۇلگەرگەن.
وتكەن جەكسەنبىدە مەملەكەتتىڭ قارۋلى كۇشتەر قولباسشىسى ۋيليامي كاليمان مورالەستى قىزمەتىنەن ءوز ەركىمەن كەتۋگە شاقىردى. سونىمەن قاتار قارۋلى قاقتىعىستارعا توقتاۋ سالاتىنىنا ءسوز بەردى. ال بۇل ۇسىنىستان كەيىن بارسەلونا ۋنيۆەرسيتەتىنىڭ پروفەسسورى پۋمپەۋ فابرا مەملەكەتتە توڭكەرىس بولدى دەۋگە تولىق نەگىز بار دەگەن ويىن ايتتى. بۇل ويمەن كۋبا, ۆەنەسۋەلا, ارگەنتينا مەن نيكاراگۋا مەملەكەتتەرى دە كەلىسىپ وتىر. ءتىپتى ونى قولداۋشىلار دا تابىلا كەتتى. ۆەنەسۋەلا پرەزيدەنتى نيكولاس مادۋرو Twitter جەلىسىندەگى پاراقشاسىندا مورالەسكە «باۋىرىم» دەپ ءتىل قاتىپ, بوليۆيانىڭ نەگىزگى حالقى ناسىلشىلدىكتىڭ قۇربانى بولىپ وتىرعانىن جازعان. كۋبا كوشباسشىسى ميگال دياس-كانەل مەملەكەتتەگى وڭشىلداردى ايىپتاپ, پرەزيدەنتتى ورنىنان الۋ بوليۆياداعى دەموكراتياعا قارسى ارەكەت ەكەنىن ايتادى.
كوپ ۇزاماي مەكسيكانىڭ مورالەسكە پانا بەرۋگە كەلىسكەنى بەلگىلى بولدى. بۇل حاباردى مەكسيكا سىرتقى ىستەر ءمينيسترى مارسەلو ەبرارد راستاپ وتىر. ونىڭ ايتۋىنشا, بۇل ءوتىنىشتى ەۆر مورالەستىڭ ءوزى بىلدىرگەن.
قازىرگى كەزدە بوليۆيادا ساياسي ۆاكۋم پايدا بولعان. ويتكەنى مەملەكەت زاڭىنا ساي پرەزيدەنت قىزمەتىنەن كەتسە, بيلىك ۆيتسە-پرەزيدەنتتىڭ نە سەنات توراعاسىنىڭ قولىنا وتەدى. دەگەنمەن بوليۆيا ۆيتسە-پرەزيدەنتى الۆارو گارسيا لينەرا دا مەملەكەتتەن كەتەتىنىن مالىمدەگەن ەدى. بۇل شەشىمدى سەنات توراعاسى ادريانا سالۆاتەررا دا قولدادى. وسىلايشا, مەملەكەت ساياسي كوشباسشىلارىنان ءبىر-اق كۇندە ايىرىلدى. دەگەنمەن الەم ساراپشىلارى مورالەستىڭ وڭاي جەڭىلە سالعانىنا سەنبەيدى.
ەۋروپا وداعى سەكىلدى حالىقارالىق ۇيىمدار ەۆو مورالەسكە قولداۋ بىلدىرە قويعان جوق. برازيليا, كولۋمبيا, پەرۋ, گۆاتەمالا, اقش, كانادا ەلدەرى تەز ارادا كەزەكتەن تىس سايلاۋ ۇيىمداستىرىپ, جاعدايدى رەتتەۋدى ۇسىندى.