ساپاسىز سالىنعان ۇيلەردە تۇرۋ مۇمكىن ەمەس. پارلامەنت سەناتىنىڭ الەۋمەتتىك-مادەني دامۋ جانە عىلىم كوميتەتىنىڭ اتىنا دۇنيەجۇزىلىك قازاقتاردىڭ قاۋىمداستىعىنان وسىنداي حات تۇسكەن بولاتىن, دەپ حابارلايدى پارلامەنت سەناتىنىڭ ءباسپاسوز قىزمەتى.
كوميتەت توراعاسى مۇرات باقتيار ۇلى, سەناتورلار ناريمان تورەعاليەۆ راشيت اكىموۆ اقمولا وبلىسىنا ارنايى ساپارمەن بارىپ نۇرلى كوش كەشەنى تۇرعىندارىمەن كەزدەسىپ ولاردىڭ مۇڭ-مۇقتاجىمەن تانىستى.
كوكشەتاۋ قالاسى, كراسنىي يار اۋىلدىق وكرۋگى, نۇرلى كوش كەشەنى تۇرعىندارى (276 وتباسى, 1360 ادام) كوبى شەت ەلدەن تاريحي وتاندارىنا ورالعان قانداستارىمىز. تۇرعىندار سەنات دەپۋتاتتارىنا ساپاسىز سالىنعان باسپانا ماسەلەسىنىڭ ون جىلدان بەرى شەشىمىن تاپپاي كەلە جاتقانىن ايتا كەلىپ, قابىرعالارى وتە جۇقا, اراسى قۋىس بولعاندىقتان, تۇرعىندار قىستا توڭىپ اۋىرۋعا شالدىققاندارىن اشىنا ايتتى.
ء«وز قاراجاتىمىزبەن جىلدا قانشاما جوندەۋ جۇمىستارىن جاساعانىمىزبەن ۇيلەر جىلىنبايدى, سوڭعى ۋاقىتتا توبەسى, قابىرعاسى قۇلاپ, جوندەۋگە مۇلدەم كەلمەيتىن جاعدايعا جەتتى. ۇيلەردىڭ كوبى اپات جاعدايىندا», - دەيدى تۇرعىندار.
«نۇرلى كوش» باعدارلاماسىمەن, رەسپۋبليكالىق بيۋدجەت قاراجاتى ەسەبىنەن سالىنعان بۇل ۇيلەر 2010 جىلى قاڭتاردا پايدالانۋعا بەرىلگەن. سول ون جىلدان بەرى تۇرعىندار تاراپىنان ۇيلەردىڭ ساپاسىنا قاتىستى شاعىمدار مەن نارازىلىقتار ايتىلسا دا شەشىمىن تاپپاي كەلەدى.
دەپۋتاتتار ۇيلەردى ارالاپ كورىپ, جاعدايىمەن تانىسىپ, تۇرعىنداردىڭ تالاپ-تىلەكتەرىن مۇقيات تىڭداپ, ماسەلەنى شەشۋ جولدارى قاراستىرىلاتىنىن ايتتى.