سەنات توراعاسى داريعا نازارباەۆا ارمەنيا رەسپۋبليكاسىنا رەسمي ساپارى اياسىندا ارمەنيا پرەمەر-ءمينيسترىنىڭ جۇبايى اننا اكوپيانمەن بىرگە ەرەۆانداعى بالالار ونكولوگياسى جانە گەماتولوگيا ورتالىعىندا بولدى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
ورتالىق 2018 جىلدىڭ شىلدە ايىندا «شاتتىق قالاسى» قورىنىڭ قولداۋىمەن قۇرىلعان بولاتىن. ونكولوگيالىق جانە گەماتولوگيالىق اۋرۋلارمەن سىرقاتتانعان بالالار مەن جاستارعا كومەك كورسەتەتىن قوردىڭ قامقورلىق كەڭەسىنە اننا اكوپيان باسشىلىق ەتەدى.
سەنات باسشىسى بالالارمەن جانە ولاردىڭ اتا-انالارىمەن اڭگىمەلەستى, ورتالىقتىڭ جابدىقتارىن كورىپ, جۇمىس جاعدايلارىمەن تانىستى.
قازاقستان رەسپۋبليكاسى پارلامەنتى سەناتىنىڭ دەلەگاتسياسى سول كۇنى ەرەۆان مەملەكەتتىك ۋنيۆەرسيتەتىنىڭ جانىنداعى قازاق ءتىلى, مادەنيەتى جانە تاريحى ورتالىعىندا بولدى. ورتالىق 2010 جىلى ەكى مەملەكەت اراسىنداعى ەكى جاقتى مادەني-گۋمانيتارلىق ىنتىماقتاستىقتى دامىتۋ, سونداي-اق قازاقستاننىڭ ۇلتتىق مادەنيەتىن دارىپتەۋ ماقساتىندا اشىلعان بولاتىن.
اباي قۇنانباەۆتىڭ 175 جىلدىق مەرەيتويىنا وراي 2020 جىلى ورتالىققا قازاقتىڭ ۇلى اقىنىنىڭ ەسىمىن بەرۋ جوسپارلانىپ وتىر.