قازاق ءباسپاسوزىنىڭ قاراشاڭىراعى سانالاتىن «Egemen Qazaqstan» گازەتىنىڭ جارىق كورگەنىنە بيىل 100 جىل تولىپ وتىر. وسىناۋ ءبىر عاسىر ارالىعىندا قازاق ۇلتىنىڭ تاريحي تاعدىرىنا كۋا بولعان دا وسى باسىلىم. باس باسىلىمنىڭ عاسىرلىق مەرەيتويى ەلىمىزدىڭ بىرقاتار وڭىرلەرىندە اتالىپ وتۋدە. ەل گازەتىنىڭ 100 جىلدىق جىلناماسىنان دا حالقىمىزدىڭ بەرنياز كۇلەەۆ, بەيىمبەت مايلين, تۇرار رىسقۇلوۆ, مۇحتار اۋەزوۆ باستاعان كورنەكتى تۇلعالارىنىڭ ەڭبەك ەتكەنىن كورۋگە بولادى.
«Egemen Qazaqstan» گازەتىنىڭ عاسىرلىق مەرەيتويى جامبىل وڭىرىندە دە اتالىپ ءوتتى. اۋەلى وبلىستىق «Jambyl» تەلەارناسىندا ەل گازەتىنىڭ تاريحىنا بايلانىستى حابار ءتۇسىرىلدى. ارنايى حابارعا ءار جىلدارى باس باسىلىمدا ەڭبەك ەتكەن ارداگەرلەر قاتىسىپ, ءوز ويلارىمەن ءبولىستى. سونىمەن قاتار تاراز مەملەكەتتىك پەداگوگيكالىق ۋنيۆەرسيتەتىندە جامبىل وبلىستىق ىشكى ساياسات باسقارماسىنىڭ ۇيىمداستىرۋىمەن «ەل گازەتى «Egemen Qazaqstan» اتتى ارنايى ءىس-شارا ۇيىمداستىرىلدى. شارا بارىسىندا كوپشىلىككە LED ەكراننان باس باسىلىمنىڭ مول شەجىرەسىنەن سىر شەرتەتىن ساتتەر كورسەتىلدى. جيىندى كەزىندە باس باسىلىمدا قىزمەت اتقارعان بەلگىلى پۋبليتسيست-جۋرناليست مەيرامبەك تولەپبەرگەن جۇرگىزدى. ال, باسىلىم ارداگەرى, بەلگىلى جازۋشى-دراماتۋرگ ەلەن ءالىمجان بۇل باسىلىمدا 11 جىل بويى جامبىل وبلىسى بويىنشا مەنشىكتى ءتىلشى بولىپ قىزمەت اتقارعانىن, سول جىلداردا تالاي ماسەلە كوتەرىپ, ءبارىنىڭ دە وڭ شەشىم تاپقانىن اڭگىمەلەدى. «جالپى, «Egemen Qazaqstan» بولمىسى بولەك باسىلىم. كەزىندە پارتيانىڭ ءبىرىنشى حاتشىلارىنىڭ ءوزى بۇل گازەتتە جارىق كورگەن دۇنيەلەردى قالت جىبەرمەي وقىپ, ماسەلە كوتەرىلسە, ونى شەشۋگە تاپسىرما بەرەتىن. بۇل گازەتتە تالاي ازاماتتار ابىرويمەن ەڭبەك ەتىپ, تەر توكتى. قازاق ءباسپاسوزىنىڭ بولاشاعى ءۇشىن قىزمەت ەتتى», دەي كەلە, جاستاردىڭ قويعان سۇراقتارىنا جاۋاپ بەردى. كەزىندە باس باسىلىمنىڭ ەكى رەت جامبىل وبلىسى بويىنشا مەنشىكتى ءتىلشىسى قىزمەتىن اتقارعان, بۇگىندە وبلىستىق «Aq jol» گازەتىن باسقارىپ وتىرعان جازۋشى كوسەمالى ءساتتىباي ۇلى «بۇل گازەتتى وقۋ ءۇشىن ورە كەرەك. وعان دايىندىق كەرەك», دەي كەلىپ, قازىرگى كەزدەگى وڭىردەگى جازىلىم ناۋقانى, جالپى بارلىق گازەتتىڭ وقىلۋ دەڭگەيى تۋرالى اڭگىمە قوزعادى. ءتىپتى, كاسىبي جۋرناليست پەن بلوگەردىڭ دە اراجىگىن اجىراتىپ الۋ كەرەكتىگىن ايتتى. قوس قالامگەر دە تاۋەلسىزدىك جىلدارىندا باس باسىلىمدى باسقارعان شەرحان مۇرتازا تۋرالى جىلى ەستەلىكتەرىمەن ءبولىستى. ال, باس باسىلىمنىڭ سول كەزدەگى وڭتۇستىك قازاقستان جانە جامبىل وبلىستارىنداعى مەنشىكتى ءتىلشىسى قىزمەتىن اتقارعان, بۇگىندە رەسپۋبليكالىق «جاس الاش» گازەتى باس رەداكتورىنىڭ ورىنباسارى بولىپ قىزمەت اتقارىپ جۇرگەن ورالحان ءداۋىت 100 جىلدىق تاريحى بار گازەتتىڭ بۇگىندە جاڭا ارناعا بەت بۇرعانىن, گازەت بەتىندە كوتەرىلىپ جاتقان ماسەلەلەردىڭ وزەكتىلىگىن اڭگىمەلەدى.
وسى ۋاقىتقا دەيىن ەل گازەتىندە كوپتەگەن بىلىكتى ازاماتتار باسشىلىق جاسادى. ءبارىنىڭ دە باس باسىلىمدا قولتاڭباسى قالدى. بۇل باسىلىمدا ەڭبەك ەتكەن ارداگەرلەر سول ءبىر جىلدارعا شەگىنىس جاساپ, قىزىقتى ەستەلىكتەرىمەن دە ءبولىستى. ال, قازىرگى كەزدە «Egemen Qazaqstan» گازەتىنىڭ باسقارما توراعاسى دارحان قىدىرالىنىڭ جاستارعا ۇلكەن سەنىم ارتىپ, ولاردى جۇمىسقا قابىلداعانى تۋرالى دا ايتىلدى. جالپى, تاريحى تەرەڭ باسىلىمدا تالاي مىقتىلاردىڭ ءىزى قالعانى تاريقا ايان. جيىن بارىسىندا «Egemen Qazaqstan» گازەتىنىڭ جامبىل وبلىسى بويىنشا مەنشىكتى تىلشىلەرى بولعان, بۇگىندە ومىردەن ءوتىپ كەتكەن جاقسىلىق ساتىبەكوۆ, مۇرات سىزدىقوۆ, مەيرامباي ساتىبالديەۆ, ماقۇلبەك رىسداۋلەت سياقتى ازاماتتاردى دا ارداگەرلەر ساعىنىشپەن ەسكە الدى.