جىلدىڭ سوڭىندا بايقوڭىرداعى قازاقستان مەن رەسەيدىڭ بىرلەسكەن جوباسى ەكس-پرەزيدەنت نۇرسۇلتان نازارباەۆتىڭ اتىمەن اتالۋى مۇمكىن. بۇل تۋرالى ريا نوۆوستي حابارلادى.
بايقوڭىرداعى «سويۋز-6», «سويۋز-5» ورتاشا جانە ورتاشادان اۋىر زىمىرانداردى ۇشىرۋ ءۇشىن سالىنىپ جاتقان عارىش-زىمىران كەشەنىنە نازارباەۆ اتىن بەرۋ يدەياسى رەسەي باسشىسى ۆلاديمير پۋتينگە تيەسىلى.
«ەكى ەلدىڭ بىرلەسكەن جوباسىنىڭ اتىن اۋىستىرۋ ماسەلەسىن پرەزيدەنت اكىمشىلىگىمەن پىسىقتاپ جاتىرمىز. "بايتەرەكتى" "نازارباەۆ ستارت" دەپ اۋىستىرۋ ءۇشىن ۇكىمەتارالىق كەلىسىمگە وزگەرىس ەنگىزۋ كەرەك. پرەزيدەنت اكىمشىلىگىنەن قارسىلىق بولماسا جىل سوڭىندا پروتوكولگا قول قويىلادى», - دەدى تسيفرلىق دامۋ, قورعانىس جانە اەروعارىش ونەركاسىبى ۆيتسە-ءمينيسترى مارات نۇرعوجين.
وسىعان دەيىن قازاقستان پرەمەر-ءمينيسترى اسقار مامين بايقوڭىر قالاسىنىڭ دامۋىمەن تانىسىپ, "روسكوسموس" باسشىسى دميتري روگوزينمەن "نازارباەۆ ستارتى" جوباسىن تالقىلاعانىن پرەمەر-ءمينيستردىڭ رەسمي سايتى حابارلاعان بولاتىن.
2019 جىلى 7 قىركۇيەكتە ماسكەۋ قالاسىندا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ پەن رەسەي پرەزيدەنتى ۆلاديمير ءپۋتيننىڭ كەزدەسۋى بارىسىندا رەسەيلىك تاراپ "بايتەرەك" جوباسىن "نازارباەۆ ستارتى" دەپ قايتا اتاۋدى, سونداي-اق, ونى ءتيىمدى ىسكە اسىرۋ ءۇشىن "سويۋز-5" جانە "سويۋز-6" زىمىران تاسىعىشتارىن ۇشىرۋ ءۇشىن بىرەگەي ستارتتى, سونداي-اق پيلوتتاۋ باعدارلاماسىن الىپ تاستاۋدى قاراستىراتىن جاڭا جاعدايلاردى قاراستىرۋدى ۇسىنعان ەدى.
بايقوڭىر كەشەنى جانە نازارباەۆ ستارتى دەپ وزگەرتۋگە بايلانىستى جۇمسالاتىن شىعىنداردى قاي ەل تولەيتىنى ازىرگە بەلگىسىز.
الماتى