الماتىدا «بيزنەس باستاۋ» جوباسى بويىنشا تاعى 15 كوپ بالالى اناعا سەرتيفيكات تاپسىرىلدى. كوپ بالالى انالاردى وقىتۋدى العاش بولىپ باستاعان جەتىسۋ اۋدانىندا بۇل جوبا ءالى جالعاسىپ جاتىر. از ۋاقىت ىشىندە كوپتەگەن ايەل شاشتاراز ءىسى, ۆيزاج, تاعام ءپىسىرۋ, ءپىشۋ مەن تىگۋ سەكىلدى ماماندىقتاردى يگەرىپ شىققان.
«مەن – جاس انامىن. كوپبالالى وتباسىلارعا ارنالعان «باقىتتى وتباسى» ورتالىعىندا «بيزنەس باستاۋ» باعدارلاماسىندا وقىپ جانە ءوز بيزنەسىمدى باستاۋ مۇمكىندىگىن الدىم. قازىر SMM كۋرسىندا ءبىلىم الىپ جاتىرمىن. كوپتەگەن وسىنداي كوپبالالى انالارعا, اسىرەسە, ءبىز سياقتى جاس انالارعا وسى «بيزنەس باستاۋ» باعدارلاماسى جارقىن بولاشاققا قول جەتكىزۋ مۇمكىندىگىن سىيلادى», – دەدى كوپ بالالى انا اينۇر تەمىروۆا
جوبا ترەنينگى بارىسىندا كۋرستىڭ ءاربىر قاتىسۋشىسى جاتتىقتىرۋشىنىڭ كومەگىمەن كوزدەگەن ىستەرىن يدەيادان دايىن بيزنەس-جوسپارعا دەيىن دامىتۋىنا مۇمكىندىكتەرى بار. بىتىرۋشىلەر كۋرستى تامامداعان سوڭ 505 مىڭ تەڭگە جانە 3 ميلليون تەڭگە كولەمىندە مەملەكەتتىك گرانتتاردى الۋ ءۇشىن باقتارىن سىناي الادى.
«بۇگىندە وسى جوبا بويىنشا 154 ادام وقۋدى ءتامامدادى. ونىڭ ىشىندە 36 كوپبالالى انا دا بار. بۇل باعدارلامالار ارقىلى ءبىز تۇرعىنداردىڭ جۇمىسقا ورنالاسۋىنا, ءوز جوبالارىن ىسكە اسىرۋلارىنا كومەكتەسەمىز. مينيسترلىكتىڭ تاپسىرماسى بويىنشا «مەنىڭ كاسىبىم» اتتى 10 جوبانى ىسكە اسىردىق. اسىرەسە, تاعام ازىرلەۋ نەمەسە ۆيزاج سەكىلدى جەكە ىستەرىن اشۋى ءۇشىن قارجى قاجەتتىلىگى تۋىنداعاندا ءبىز ولاردى وقىتامىز. بۇل جوبادا كوپ بالالى انالارعا شاعىن نەسيە بەرۋ دە قاراستىرىلعان», – دەدى الماتى قالاسى جەتىسۋ اۋدانىنىڭ اكىمى ماقسات قيقىموۆ.
الماتى