اقتاۋدا وتباسىن نىعايتۋ كۋرسى ءوتتى

مەكتەپ قابىرعاسىندا ۇيىمداستىرىلعان پسيحولوگيالىق ترەنينگتەر سەرياسى قىركۇيەك ايىندا باستالىپ, قازاننىڭ سوڭىنا دەيىن جالعاسقان.

7 سەسسيادان تۇرعان ترەنينگكە 11 وتباسى قاتىستى. وتباسى قۇندىلىقتارىن قالىپتاستىرىپ, اتا-انا مەن بالانىڭ اراسىنداعى قارىم-قاتىناستى جاقسارتۋعا ارنالعان كۋرستى زياتكەرلىك مەكتەپ پسيحولوگتارى جۇرگىزگەن.

- ءبىزدىڭ ماقساتىمىز – وتباسى مۇشەلەرىنىڭ قارىم-قاتىناسىن جاقسارتىپ, اتا-انا بالانى, بالا اتا-انانى ءتۇسىنىپ, جانۇياداعى ىنتىماقتاستىق پەن بەرەكەنى يكەمدىلىك ارقىلى دامىتۋ. ويتكەنى وتباسىداعى قالىپتى احۋال, كوتەرىڭكى كوڭىل-كۇي بالانىڭ ساباقتا بەلسەندى بولۋىنا, اقپاراتتى تەز مەڭگەرۋىنە كومەكتەسەدى, دەيدى پسيحولوگ ايگۇل تاسانوۆا.

اتالمىش كۋرس بيىل ەكىنشى رەت ۇيىمداستىرىلىپ وتىر. وتكەن وقۋ جىلىندا 11 وتباسى كۋرسقا قاتىسسا, بيىل ءبىلىم ورداسىنداعى بارلىق 7-سىنىپ وقۋشىلارى مەن اتا-انالارى قاتىسادى دەپ جوسپارلانعان.

مەكتەپتەگى پسيحولوگتاردىڭ سوزىنە سەنسەك, كۋرستىڭ ەكى دارىسىنەن كەيىن-اق, توپ مۇشەلەرى اۋىزبىرشىلىك تانىتىپ, ءوزارا جاقىن ءتىل تابىسا باستاپتى. سونىمەن قاتار ساباق بارىسىندا اتا-انالار بالالارىن جاڭا قىرىنان تانىعاندارىن دا اتاپ ءوتتى.

- مەنىڭ ويىمشا, مۇنداي ترەنينگتەردى ءاربىر مەكتەپتە وتكىزۋ كەرەك. ويتكەنى جاڭا زامان تالابىنا ساي قۇندىلىقتار مەن بالا تاربيەسىندە ۇلكەن وزگەرىستەر مەن جاڭالىقتار بار. بىراق اتا-انالار ءجىتى ىزدەنبەگەندىكتەن كوپتەگەن ولقىلىقتارعا جول بەرەدى. وتباسىمىزبەن كۋرستىڭ تيىمدىلىگىن بايقادىق. ءبىر-بىرىمىزبەن قارىم-قاتىناسىمىز جاقسارىپ, تىڭداۋدى ۇيرەندىك, دەيدى ارداق سابىروۆا ەسىمدى اتا-انا.

ايتا كەتەيىك, «بەرىك وتباسى» پسيحولوگيالىق كۋرسىن ۇلىبريتانياداعى وكسفورد برۋكس ۋنيۆەرسيتەتىنىڭ ماماندارى بىرىگىپ جاساعان. قازىرگى تاڭدا جوبا الەمنىڭ 35 ەلىنە ەنگىزىلىپ, ورىس, يسپان, نەمىس, پورتۋگال, فرانتسۋز, قىتاي تىلدەرىنە اۋدارىلعان. 2018 جىلدىڭ قاراشا ايىندا اقتاۋ قالاسىنداعى نازارباەۆ زياتكەرلىك مەكتەبىنىڭ پسيحولوگى تىلەكتەس ماسكاروۆا وكسفورد برۋكس ۋنيۆەرسيتەتىنىڭ اعا مۇعالىمى, فيلوسوفيا عىلىمدارىنىڭ دوكتورى دەببي الەن جانە ليندسي كلۋبستان باعدارلاما بويىنشا ءبىلىم العان.