قازاقستاننىڭ تۇڭعىش پرەزيدەنتى – ەلباسى قورىنىڭ قولداۋىمەن «جاسىل ەل» ەڭبەك جاساقتارى باس شاھاردا ەكولوگيالىق ناۋقان وتكىزدى. جاستار ECO Pack جوباسى اياسىندا حالىقتى پوليەتيلەن پاكەتتىڭ ورنىنا ەكولوگيالىق تازا دوربا قولدانۋعا شاقىردى.
ECO Pack – بۇل قورشاعان ورتانى قورعاۋ ماسەلەسىنە قوعامنىڭ نازارىن اۋدارتۋعا باعىتتالعان ەكولوگيالىق ناۋقان. وسى ارقىلى جاس بەلسەندىلەر تۇرعىنداردىڭ ەكولوگيالىق مادەنيەتىن قالىپتاستىرۋدى, قورشاعان ورتامەن ۇيلەسىمدى ءومىر سۇرۋگە داعدىلاندىرۋدى, سونداي-اق تابيعي رەسۋرستاردى ءتيىمدى پايدالانۋعا شاقىرىپ ءجۇر.
– بيىل ءبىز ECO Pack جوباسىن العاش رەت ۇيىمداستىرىپ وتىرمىز. ەكولوگيالىق اكتسيانى ۇيىمداستىرۋداعى ماقساتىمىز – جاھاندىق جىلىنۋ, قورشاعان ورتانىڭ لاستانۋى, قوقىستاردىڭ تابيعاتقا زيانى سىندى ەكولوگيالىق ماسەلەلەرگە جۇرتشىلىقتىڭ نازارىن بۇرعىمىز كەلەدى. ەكودوربا پلانەتامىزدىڭ ەكولوگياسىن جاقسارتۋعا كوپ ۇلەس تيگىزەدى. تابيعي ماتادان جاسالعان دوربالار بىرنەشە ايدىڭ ىشىندە ىدىراپ, توپىراقتى ورگانيكامەن بايىتادى. وسى سىندى ەكولوگيالىق ناۋقان ەلوردامەن قاتار قازاقستاننىڭ بارلىق وڭىرىندە جۇزەگە اسىپ كەلەدى, – دەيدى «جاسىل ەل» ەڭبەك جاساقتارى رەسپۋبليكالىق شتابىنىڭ جەتەكشىسى ازامات دانيار.
اتالعان شارانىڭ ماڭىزىن وتاندىق بلوگەرلەر مەن ەسترادا انشىلەرى ارتتىرا ءتۇستى. ونەر جۇلدىزدارى حالىقتى قورشاعان ورتاعا بەيجاي قاراماۋعا شاقىرىپ, ازاماتتىق ۇستانىمدارىن ءبىلدىردى. بۇدان كەيىن اكتسيا كونتسەرتتىك باعدارلاماعا جالعاستى. ۇيىمداستىرۋشىلار ءتۇرلى ويىن وتكىزىپ, باعالى سىيلىقتار تاراتتى.