قازىر ەلىمىزدىڭ بارلىق اۋماعىندا ەكولوگيا, گەولوگيا جانە تابيعي رەسۋرستار مينيسترلىگىنىڭ باستاماسىمەن «ەكو-ساعات» اكتسياسى ءوتىپ, جاپپاي اعاش وتىرعىزۋ جۇرگىزىلىپ جاتىر.
وسى شاراعا جۋىردا پەتروپاۆلداعى رەسمي تۇردە «ابىلايحان رەزيدەنتسياسى», ال حالىق اراسىندا «ابىلايدىڭ اق ءۇيى» اتالاتىن مۋزەي-كەشەنىنىڭ قىزمەتكەرلەرى دە ءۇن قوسىپ, اۋلالارىنا وتىز ءتۇپ شىرشا وتىرعىزدى.
سول شىرشانىڭ ءبىرىن «ابىلايلىقتار» ەلىمىزدىڭ اتا گازەتى «ەگەمەننىڭ» ءجۇز جىلدىعىنا ارناپتى. ونىڭ تۇبىندەگى تاقتايشادا بىلاي دەپ جازىلعان: «بۇل شىرشا ەلىمىزدىڭ باس گازەتى «ەگەمەن قازاقستاننىڭ 100 جىلدىق مەرەيتويىنا ارناپ وتىرعىزىلدى».
مۋزەي ديرەكتورى ايان ءنابي ۇلىنىڭ ايتۋىنا قاراعاندا «ابىلاي حان مۋزەيىنىڭ اشىلۋىنا «ەگەمەننىڭ» تيگىزگەن پايداسى زور ەكەن. «وسى عيماراتتىڭ ابىلايدىڭ ءۇيى ەكەنىن دالەلدەگەن ماسكەۋدەن كەلگەن قۇجاتتى ەڭ ءبىرىنشى بولىپ 2002 جىلعى 22 قاراشادا «ەگەمەن قازاقستان» گازەتى ءبىرىنشى بەتىنە «ابىلايدىڭ اق ءۇيى – اڭىز ەمەس اقيقات!» دەگەن تاقىرىپپەن جاريالاعان ەدى. سودان كەيىن ءۇيدى قالپىنا كەلتىرۋ جۇمىستارى قاۋىرت قولعا الىندى. اقىرى ول ەلباسى ن.نازارباەۆتىڭ قاتىسۋىمەن 2008 جىلى اشىلدى. قازىر وتىزعا جۋىق ادام ناپاقاسىن ايىرىپ, جىلىنا بىرنەشە مىڭ ادامعا رۋحاني ازىق سىيلاپ, قىزىلجارداعى ەڭ باستى مادەني ورىنداردىڭ ءبىرى بولىپ وتىرعان مۋزەيدىڭ اشىلۋىنا «ەگەمەن» ءسويتىپ ۇلكەن پايداسىن تيگىزگەن. سوندىقتان ءبىز اتا گازەتكە ريزامىز. ونىڭ ۇجىمىن 100 جىلدىق مەرەيتويىمەن قۇتتىقتايمىز. مىنا شىرشانى ءبىزدىڭ سىيلىعىمىز دەپ قابىل الىڭىزدار دەمەكپىز», دەدى ول.
ايتا كەتەتىن جايت, قىزىلجاردا «ەگەمەن قازاقستاننىڭ» اتىندا ءبىر كوشە دە بار. وسىنىڭ وزىنەن ەلدىڭ تەرىستىگىندە اتا گازەتكە دەگەن قۇرمەت جوعارى ەكەنى كورىنسە كەرەك. ەندى, ابىلاي حان مۋزەيىنىڭ تۇبىندەگى «ەگەمەننىڭ» شىرشاسى دا سونى ايعاقتاپ, جىلدان جىلعا شارىقتاپ, وسە بەرۋىن تىلەيمىز.
پەتروپاۆل