قورشاعان ورتانىڭ لاستانۋى بۇگىنگى كۇننىڭ ەڭ وزەكتى ماسەلەلەرىنىڭ ءبىرى. وڭىردە اۋانى لاستاۋشى زاتتاردىڭ مولشەرى شامادان تىس اسىپ كەتەتىن اۆتوكولىكتەردىڭ كوپتىگىنەن بۇگىندە لاستانۋ فاكتىسى ءجيى تىركەلۋدە.
بۇل ورايدا جامبىل وبلىسىنىڭ اكىمى اسقار مىرزاحمەتوۆ وبلىستىق پوليتسيا دەپارتامەنتىنىڭ باستىعى ارمان ورازاليەۆكە ەكولوگيالىق نورمالاردىڭ ساقتالۋىن باقىلاۋدى كۇشەيتۋدى جانە اتموسفەراعا اۆتوكولىك قۇرالدارىنان شىعاتىن زياندى قالدىقتاردى ازايتۋ بويىنشا شارالار قابىلداۋدى تاپسىرعان ەدى. قازىرگى كەزدە اتالعان دەپارتامەنت وبلىستىق ەكولوگيا دەپارتامەنتىنىڭ زەرتحانالىق-اناليتيكالىق باقىلاۋ ءبولىمىنىڭ ماماندارىن تارتا وتىرىپ, «تازا اۋا» جەدەل-الدىن الۋ ءىس-شاراسىن ۇيىمداستىرۋدا.
تاراز قالالىق پوليتسيا باسقارماسى پاترۋلدىك پوليتسيا باتالونىنىڭ قىزمەتكەرلەرى جەدەل-الدىن الۋ ءىس-شارالارىن جۇرگىزۋدىڭ ءبىرىنشى كۇنى اكىمشىلىك قۇقىق بۇزۋشىلىق تۋرالى كودەكستىڭ 334-بابىنىڭ تالاپتارى بويىنشا 40-تان استام زاڭبۇزۋشىلىقتاردى انىقتاعان. كەيىننەن بۇل كورسەتكىش ارتا تۇسكەن. «جامبىل وبلىسىنىڭ پوليتسيا دەپارتامەنتى اۋاعا زياندى زاتتار شىعارۋ ارقىلى قورشاعان ورتاعا زالال كەلتىرەتىن اۆتوكولىكتەردى انىقتاۋ ماقساتىندا «تازا اۋا» جەدەل-الدىن الۋ ءىس-شاراسىن ۇيىمداستىرۋدا. بۇگىنگى تاڭدا مۇنداي كولىكتەر اتموسفەرانى لاستاۋدىڭ جانە وڭىردەگى ەكولوگيالىق جاعدايدىڭ ناشارلاۋىنىڭ نەگىزگى سەبەپتەرى بولىپ تابىلادى. وكىنىشكە قاراي, تالاپتارعا ساي كەلمەيتىن كولىك قۇرالدارى ءالى دە كوپ. جەدەل-الدىن الۋ ءىس-شاراسىنىڭ العاشقى ءۇش كۇنى ىشىندە قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 334-بابى بويىنشا 200-دەن استام جۇرگىزۋشى اكىمشىلىك جاۋاپكەرشىلىككە تارتىلدى. اتالعان باپقا سايكەس ەكى ايلىق ەسەپتىك كورسەتكىش مولشەرىندە ايىپپۇل قاراستىرىلادى, ال قۇقىق بۇزۋشىلىق ەكىنشى رەت قايتالانعان جاعدايدا ايىپپۇل مولشەرى بەس ايلىق ەسەپتىك كورسەتكىشكە دەيىن ارتادى. سونداي-اق مەملەكەتتىك ءنومىردى الىپ قويۋ كوزدەلگەن», دەيدى جامبىل وبلىستىق پوليتسيا دەپارتامەنتىنىڭ باستىعى, پوليتسيا پولكوۆنيگى ارمان ورازاليەۆ.
سونىمەن قاتار ءوڭىردىڭ باس پوليتسەيى بۇگىندە وبلىس ورتالىعىنىڭ جولدارىندا قوعامدىق كولىكتەردىڭ سانى ارتۋدا ەكەنىن, ونىڭ باسىم بولىگى ەكولوگيالىق نورمالارعا سايكەس كەلمەيتىنىن دە ايتادى. زاڭ بۇزۋشىلىقتاردىڭ كوپشىلىگى جولاۋشىلار اۆتوبۋستارىنا قاتىستى بولىپ وتىر ەكەن. سوندىقتان دا قازىرگى ۋاقىتتا اتموسفەراعا زياندى زاتتار شىعاراتىن وسى ساناتتاعى كولىكتەردى ازايتۋ بويىنشا اۋقىمدى جۇمىستار جۇرگىزىلىپ جاتقانىن, جۇرگىزۋشىلەرمەن قاتار اۆتوبۋس پاركتەرىنىڭ يەلەرى دە قاتاڭ جاۋاپكەرشىلىككە تارتىلاتىنىن جەتكىزدى.