قارجى مينيسترلىگىنىڭ مەملەكەتتىك كىرىستەر كوميتەتى حالىقپەن كەرى بايلانىس ورناتۋ جولدارىن كەڭەيتۋدە. كوميتەتتىڭ ناۋرىز ايىندا ىسكە قوسىلعان «بايلانىس ورتالىعى» 7 ايعا جۋىق ۋاقىتتا ازاماتتاردان تۇسكەن 190 مىڭ 773 ءوتىنىشتى قارادى.
اتالعان ورگاننىڭ ءباسپاسوز قىزمەتىنىڭ حابارلاۋىنشا, ورتالىق قىزمەتىنە جۇگىنگەن ازاماتتاردىڭ باسىم بولىگى ونىڭ جۇمىسىن جاقسى باعالاعان.
– ءبىزدىڭ ورتالىقتاعى كەڭەسشىلەردىڭ جۇمىسى ازاماتتاردىڭ كوڭىلىنەن شىقتى دەپ ەسەپتەيمىز. جاقىندا ورتالىق جۇمىسىنا 36 مىڭ 760 ادام باعا بەردى. ولاردىڭ 32 مىڭنان استامى «5», ياعني «وتە جاقسى» دەگەن باعا قويدى. 1 233 ادام, ياعني قاتىسۋشىلاردىڭ 3,4 پايىزى «4» قويدى, – دەيدى كوميتەتتىڭ ءباسپاسوز وكىلى.
مەملەكەتتىك كىرىستەر قىزمەتىنىڭ ورتالىعىنا ءتۇرلى ماسەلە بويىنشا حابارلاسقانداردىڭ سانى بويىنشا نۇر-سۇلتان قالاسى الدىڭعى ورىندا تۇر. ودان كەيىنگى ورىندار الماتى مەن شىمكەنتكە, الماتى جانە قاراعاندى وبلىستارىنا تيەسىلى. قىزىلوردا مەن سولتۇستىك قازاقستان وبلىستارىنان حزابارلاساتىنداردىڭ سانى باسقا وڭىرلەرمەن سالىستىرعاندا الدەقايدا از.
– سالىق تولەۋشىلەر تاراپىنان نەگىزىنەن سالىقتىق بەرەشەكتەر, سالىق تولەۋشىلەردى نەمەسە رەزيدەنت ەمەستەردى تىركەۋ, كولىك قۇرالىنا تولەيتىن سالىق كولەمى مەن قارىز, جەر سالىعى مەن م ۇلىك سالىعى, ەلەكتروندى شوت-فاكتۋرالار تۋرالى ماسەلەلەر بويىنشا حابارلاسادى,– دەيدى كوميتەتتىڭ ءباسپاسوز قىزمەتى.
بۇگىندە كىرىستەر كوميتەتىنىڭ سالىق پەن كەدەندىك رەتتەۋ ماسەلەلەرى بويىنشا https://t.me/KGDMFRK1414 سىلتەمەسىندە ارنايى تەلەگرامم چاتى بار ەكەنىن ايتا كەتەيىك.