17-18قازان كۇندەرى الماتىدا تۇركى الەمى دەرەكتى فيلمدەرى IV حالىقارالىق فەستيۆالىنىڭ قازاقستاندىق باعدارلاماسى ءوتتى. ءىس-شارانى ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ قولداۋىمەن تۇركى الەمى جۋرناليستەرى فەدەراتسياسى مەن ءال-فارابي اتىنداعى قازاق ۇلتتىق ۋنيۆەرسيتەتى ۇيىمداستىردى.
قازان ايىنىڭ باسىندا ىستامبۇلدا اشىلعان كينوفەستيۆال بيىل توعىز قاتىسۋشى ەلدىڭ جەتەكشى سەرىكتەس-ۋنيۆەرسيتەتتەرىندە وتۋدە. كينوفەستيۆالدىڭ تۇركى ەلدەرى ءۇشىن قوعامدىق جانە مادەني ماڭىزى اسا زور. وعان تۇركيا, قازاقستان, تۇركىمەنستان, بوسنيا جانە گەرتسەگوۆينا, قىرعىزستان, ءازىربايجان, وزبەكستان, ۆەنگريا, ماكەدونيا, كيپر ەلدەرىنىڭ ۇزدىك جۇمىستارى ۇسىنىلدى. فيلمدەر الەۋمەتتىك, مادەني, رۋحاني جانە قوعامدىق ماڭىزدى تاقىرىپتار مەن جاستار تاربيەسىن قامتىعان.
«كەرەمەت» ستۋدەنتتەرگە قىزمەت كورسەتۋ ورتالىعىنىڭ كينوتەاترىندا اشىلعان دەرەكتى فيلمدەر كورسەتىلىمىنە تۇركى الەمى جۋرناليستەر فەدەراتسياسىنىڭ پرەزيدەنتى مەندەرەس دەمير جانە باسقا دا شەتەلدىك قۇرمەتتى قوناقتار, سونداي-اق كينودوكۋمەنتاليستتەر مەن فيلم اۆتورلارى, قوعام مەن ماسس-مەديا وكىلدەرى, جوعارى وقۋ ورىندارىنىڭ ستۋدەنتتەرى قاتىستى. كينوفەستيۆالدىڭ اشىلۋىندا كينەماتوگرافتىڭ اڭىزىنا اينالعان, تۇركى الەمىنىڭ تانىمال اكتەرى مەن رەجيسسەرى ءاسانالى اشىموۆكە ارنايى ماراپات تاپسىرىلدى.