مەملەكەت باسشىسى قاسىم-جومارت توقاەۆ «بىرگە جاسىل قازاقستان» شاراسىنىڭ اياسىندا بوتانيكالىق باقتا اعاش وتىرعىزىپ, سەنبىلىككە قاتىسۋشىلارمەن سۇحباتتاستى. بۇل تۋرالى اقوردانىڭ سايتى حابارلادى.
شاراعا پرەمەر-مينيستر اسقار مامين, ۇكىمەت مۇشەلەرى, نۇر-سۇلتان قالاسىنىڭ اكىمى التاي كولگىنوۆ, سپورتشىلار مەن وقۋشىلار قاتىستى.
كوگالداندىرۋعا ارنالعان سەنبىلىك بارىسىندا بوتانيكالىق باقتا 300 كوشەت وتىرعىزىلدى. جالپى بۇگىن ەلوردا كوشەلەرى مەن ساياباقتارىندا 5 مىڭ اعاش ەگىلىپ, قالا اجارىن ارتتىرا تۇسپەك. سونىمەن قاتار بيىل كۇزدە «ەكولوگيالىق ساعات» شاراسىنىڭ شەڭبەرىندە ەلىمىز بويىنشا قوسىمشا 1 ميلليونعا جۋىق كوشەت ەگىلەدى.