ەلوردادا قازاقستان كۋبوگىنىڭ فينالى ءوتتى. قىزىلوردانىڭ «قايسار» فۋتبول كلۋبى مۇنايلى ولكەدەن كەلگەن «اتىراۋ» كومانداسىن 2:1 ەسەبىمەن جەڭىپ, ءوز تاريحىندا وسىمەن ەكىنشى مارتە قازاقستان كۋبوگىن جەڭىپ الدى.
بۇل ەكى كوماندا جاز ورتاسىندا قازاقستان كۋبوگىنىڭ فينالىنا شىققان سوڭ, چەمپيوناتتاعى ويىندارى السىرەپ كەتتى. بالكىم, وسى كۋبوكتى جەڭىپ الۋدى كوزدەسە كەرەك. «اتىراۋ» فينالدا وسىمەن ءۇشىنشى جىل قاتارىنان وينادى. بىراق كۋبوك تاعى دا بۇيىرمادى.
جالپى, ويىن سۇرەڭسىز ءوتتى. ەكى كوماندا دا ويىن باستالا سالىسىمەن وتە ساق قيمىلداپ, قورعانىستا ءجۇرىپ الدى. وتكىر شابۋىلداردى سيرەك كوردىك. اسىرەسە ءبىرىنشى تايمدا. ەكىنشى كەزەڭدە «اتىراۋ» ساپىندا وينايتىن پولشا لەگيونەرى پەتر گجەلچاك ەسەپ اشتى. ماتچتىڭ 83-مينۋتىندا «قايسار» ساپىندا الاڭعا شىققان يگور زەنكوۆيچ اراعا 4 مينۋت سالىپ تارازى باسىن تەڭەستىرىپ كەتتى. ال تورەشى قوسقان قوسىمشا ۋاقىتتىڭ سوڭعى سەكۋندىندا دۋمان نارزىلداەۆ قاقپا توعىزدىعىن ءدال كوزدەپ, كومانداسىنا جەڭىس سىيلادى. وسىلايشا اراعا 20 جىل سالىپ, «قايسار» قازاقستان كۋبوگىنا قول جەتكىزدى.
ايتا كەتەيىك, ويىننىڭ 70 مينۋتىندا اسقات تاعىبەرگەن («قايسار), 93-مينۋتتا جاك نگۆەم («اتىراۋ») الاڭنان قۋىلدى.
دايىنداعان الماس ماناپ,
«Egemen Qazaqstan»