تالدىقورعان قالاسىندا Jetisy Invest-2019 حالىقارالىق بيزنەس-فورۋمى وتكىزىلدى. فورۋمعا قاتىسۋشىلار جالپى سوماسى $859,7 ملن بولاتىن 13 جوبا بويىنشا كوممەرتسيالىق كەلىسىمدەرگە قول قويدى.
ءىس-شاراعا سىرتقى ىستەر ءمينيسترىنىڭ ورىنباسارى ەرمەك كوشەرباەۆ, الماتى وبلىسىنىڭ اكىمى اماندىق باتالوۆ, «KAZAKH INVEST» ۇك» اق باسقارما توراعاسىنىڭ ورىنباسارى ءبىرجان قانەشەۆ, سونداي-اق الەمنىڭ 7 ەلىنەن ديپلوماتيالىق كورپۋستىڭ, ءىرى وتاندىق جانە ترانسۇلتتىق كومپانيالاردىڭ, شەتەلدىك جانە وتاندىق بيزنەسمەندەردىڭ, مۇددەلى مەملەكەتتىك ورگاندار مەن قارجى ۇيىمدارىنىڭ 400-دەن اسا وكىلى قاتىستى.
ا.باتالوۆ اتاپ وتكەندەي, الەمدىك ەكونوميكالىق داعدارىس پەن جالپى ينۆەستيتسيالىق اعىننىڭ تومەندەگەنىنە قاراماستان, 2014-2016 جىلدارى الماتى وبلىسىنداعى ىشكى ينۆەستيتسيالار 27%-عا ءوستى, 2018 جىلدىڭ قورىتىندىسى بويىنشا الماتى وبلىسى شيكىزاتتىق ەمەس وڭىرلەر ىشىندە سىرتقى ينۆەستيتسيالاردى تارتۋ بويىنشا ءبىرىنشى ورىنعا شىقتى, ونىڭ كولەمى جىل سايىن 2016 جىلدان باستاپ 20%-عا وسۋدە.
ءوز كەزەگىندە ب.قانەشەۆ ەلدە ينۆەستيتسيالىق قىزمەت ءۇشىن قولايلى كليماتتى ۇستاۋدىڭ ماڭىزدىلىعى تۋرالى ايتىپ بەردى. «ەل ۇكىمەتى ۇزدىك الەمدىك تاجىريبەنى تارتۋدى جانە ەنگىزۋدى تاپسىرا وتىرىپ, مەملەكەتتەگى ينۆەستيتسيالىق كليماتتى جاقسارتۋ ءۇشىن بىرقاتار رەفورما جۇرگىزدى. قازىرگى ۋاقىتتا بىزدە شەتەلدىك بيزنەسمەندەردى سۇيەمەلدەۋدىڭ ءۇش دەڭگەيلىك جۇيەسى قىزمەت ەتەدى. سىرتقى دەڭگەيدە قازاقستاننىڭ شەتەلدىك وكىلدىكتەرى, ورتالىق دەڭگەيدە «KAZAKH INVEST» جانە ءۇشىنشى دەڭگەيدە ء«بىر تەرەزە» قاعيداتى بويىنشا قىزمەت ەتەتىن وڭىرلەردەگى فرونت-وفيستەر», دەدى ول.
سونداي-اق وڭىردەگى وزدەرىنىڭ ءساتتى تاجىريبەلەرىن Leroy-Merlin, «مارەۆەن فۋد تيان-شان», «Waste Energy KZ», «اركازينۆەست», تاعى باسقا ءىرى جانە ترانسۇلتتىق كومپانيالاردىڭ وكىلدەرى بايانداپ بەردى.
سونىمەن قاتار فورۋم بارىسىندا ءوڭىر جەك جوبالارىن ىسكە اسىرۋ ءۇشىن قولايلى ەكەنى ايتىلدى. وسىلايشا قازاقستانداعى 74 جاڭارتىلاتىن ەنەرگيا كوزدەرىنىڭ 24-ءى الماتى وبلىسىندا جۇمىس ىستەيدى. ءىرى سينگاپۋرلىق ينۆەستوردىڭ قاتىسۋىمەن Universal Energy كومپانياسى سالعان قۋاتتىلىعى 100مۆت بولاتىن قازاقستاننىڭ ءىرى كۇن ەلەكترستانسالارىنىڭ ءبىرى قىركۇيەك ايىندا ىسكە قوسىلدى. كەلەسى جىلى وسى كومپانيا ارقايسىسىنىڭ قۋاتتىلىعى 50مۆت بولاتىن ەكى كۇن جانە جەل ەلەكترستانسالارىنىڭ ىسكە قوسىلۋىن جوسپارلاۋدا. بۇدان باسقا, جەك 28 جوباسى ىسكە اسىرىلۋدىڭ ءتۇرلى كەزەڭدەرىندە.
بۇگىنگى كۇنى الماتى وبلىسى بويىنشا «KAZAKH INVEST» ۇك» اق مونيتورينگتىك جۇيەسىندە شەتەلدىك ينۆەستورلاردىڭ قاتىسۋىمەن جالپى سوماسى $3,8 ملرد قۇرايتىن 34 جوبا بار. ونىڭ ىشىندە 12 جوبا بويىنشا قۇرىلىس-مونتاجداۋ جۇمىستارى جۇرگىزىلۋدە, 12 جوبا بويىنشا جوبالىق قۇجاتتاما ازىرلەنۋدە, ال 10 جوبا وڭىردە ىسكە اسىرۋ ءۇشىن پىسىقتالۋ كەزەڭىندە. جالپى, جىل سوڭىنا دەيىن 1200 جۇمىس ورنى قۇرىلاتىن 10 جوبانىڭ ىسكە اسىرىلۋى جوسپارلانعان.