ايەلدەر كۇرەسىنەن قازاقستان كومانداسىنىڭ باس باپكەرى نۇرلان امانقوسوۆ نۇر-سۇلتانداعى الەم بىرىنشىلىگىن قورىتىندىلاپ, بالۋاندارعا ءوز باعاسىن بەردى. بۇل تۋرالى Olympic.kz حابارلادى.
«الەم چەمپيوناتى قارساڭىندا ءبىر ليتسەنزيا, ءبىر مەدال الامىز دەپ ۋادە بەرگەنمىن. قۇدايعا شۇكىر, جولداما سانىن ەكەۋگە جەتكىزدىك. ۆالەنتينا يسلاموۆا 50 كەلىدە قولا جۇلدەگەر اتانىپ, توكيو ويىندارىنا جولداما السا, 76 كەلىدەگى ەلميرا سىزدىقوۆاعا دا ليتسەنزيا بۇيىردى. ەكى ۇزدىك بالۋانىمىزدان كوبىرەك ءۇمىت كۇتىپ ەم, ەكەۋى دە جاقسى ناتيجە كورسەتتى. كوماندانىڭ كورسەتكىشى جالپى العاندا جامان ەمەس. قۇراماداعى سپورتشىلاردىڭ 80 پايىزى جاستار كومانداسىنان قوسىلعان. ءۇش بالۋانىمىز الەم بىرىنشىلىگىنىڭ جارتىلاي فينالىندا كۇرەستى. وسىعان دەيىن بىزدە مۇنداي جاعداي بولماعان.
ال سپورتشىلارعا توقتالار بولسام, ۆالەنتينا يسلاموۆا 2016 جىلى ءبىزدىڭ كومانداعا قوسىلدى. بۇعان دەيىن ول الەمدىك سىنداردا جۇلدە الماعان. قازاقستان ساپىندا العاش رەت الەم چەمپيوناتىنىڭ قولا جۇلدەگەرى اتانىپ وتىر. مارينا سەدنەۆا جاستار قۇراماسىنان كەشە عانا كەلگەن بالۋان. ول جارتىلاي فينالدا تازا ۇتىلدى, ال قولا مەدال ءۇشىن كۇرەستە پسيحولوگيالىق تۇرعىدان دايىن بولمادى. ءجاميلا باقبەرگەنوۆا ءۇشىنشى ورىنعا تالاس كەزىندە باياۋ قيمىلدادى.
سوڭعى ءبىر مينۋتتا بەلدەسۋ تاعدىرىن شەشەمىن دەپ ويلاسا كەرەك. بىراق ەرتەرەك قوزعالۋ كەرەك ەدى. ال ەلميرا سىزدىقوۆا ءبىرىنشى بەلدەسۋدە ەكى دۇركىن الەم چەمپيونى اتانعان امەريكالىق سپورتشىدان ۇتىلسا, قولا ءۇشىن كۇرەستە نەمىس قىزىنا جول بەردى. ەندى دايىندىقتى ارتتىرىپ, وليمپيادا ويىندارىندا قاتەلىك جىبەرمەۋگە تىرىسۋ كەرەك. جالپى العاندا, بۇل الەم چەمپيوناتى ۇلكەن سەنىمدىلىك سىيلادى», دەيدى باس باپكەر.