كەنشىلەر استاناسىندا «رۋحاني جاڭعىرۋ» باعدارلاماسى اياسىندا ۇيىمداستىرىلعان «كۇي-MIX» رەسپۋبليكالىق بايقاۋىنىڭ فينالىندا نۇر-سۇلتان, الماتى, قاراعاندى جانە كوكشەتاۋ قالالارىنان كەلگەن سەگىز ۇمىتكەر باق سىنادى.
قاراعاندى وبلىستىق جاستار ساياساتى ماسەلەلەرى جونىندەگى باسقارمانىڭ باسشىسى نۇرجان جەتپىسباەۆ بيىلعى بايقاۋدىڭ «جاستار جىلىنا» ارنالعانىن ايتتى.
– ءداستۇرلى «كۇي-MIX» رەسپۋبليكالىق بايقاۋىن قاراعاندى وبلىسىنىڭ جاستار رەسۋرستىق ورتالىعىمەن بىرلەسىپ ۇيىمداستىردىق. بايقاۋ حالىق مۋزىكاسىن تانىمال ەتۋگە, وسكەلەڭ ۇرپاقتى سالت-داستۇرگە, مادەنيەتكە جانە حالىق شىعارماشىلىعىنا باۋلۋعا باعىتتالعان, – دەپ اتاپ ءوتتى ءوڭىر جاستارىنىڭ كوشباسشىسى.
قازىلار القاسىنىڭ شەشىمى بويىنشا, بايقاۋدىڭ باس جۇلدەسىنە قاراعاندىلىق «تارلان» توبى لايىقتى دەپ تانىلدى. ءبىرىنشى جۇلدە ەلوردالىق دۋەت تەمىرلان ولجاباي مەن ەرنات ناۋرىزعا بۇيىرسا, باقىتجان جەلدەرباەۆ پەن ماقسات حاسانوۆ ەكىنشى جۇلدەنى يەلەندى. ال جۇلدەلى ءۇشىنشى ورىن جاڭاارقا اۋدانىنان كەلگەن كۇيشى ءۋاليحان شەكيموۆتىڭ قانجىعاسىندا كەتتى.
«كۇي-MIX» رەسپۋبليكالىق بايقاۋىنىڭ دومبىرانىڭ قۇلاعىندا وينايتىن جەڭىمپازدارى مەن قاتىسۋشىلارىنا ارنايى ديپلومدار, اقشالاي سەرتيفيكاتتار جانە ەستەلىك سىيلىقتار تابىس ەتىلدى.
قاراعاندى