ءدىني راديكاليزمنىڭ الدىن الۋعا باعىتتالعان بىرەگەي جوبا – «جۋسان» وپەراتسياسى. سيريادان قايتقانداردىڭ اراسىندا 156 ايەل بارى انىقتالعان. وتانداستارىمىزدى وڭالتۋ جۇمىستارىنا اقپارات جانە قوعامدىق دامۋ مينيسترلىگى تاراپىنان 50 ميلليون تەڭگە ءبولىنىپ وتىر. بۇل تۋرالى وتكەن جۇمادا «جاستاردى رۋحاني-ادامگەرشىلىككە تاربيەلەۋدەگى جانە راديكالدى ءدىني يدەولوگياعا يممۋنيتەتتى قالىپتاستىرۋداعى ايەل ۇيىمدارىنىڭ ءرولى» تاقىرىبىندا وتكەن سەميناردا كەڭىنەن ءسوز بولدى.
جيىندا ءسوز العان اقپارات جانە قوعامدىق دامۋ ۆيتسە-ءمينيسترى مارات ءازىلحانوۆ ەلىمىزدەگى ءدىن سالاسىندا ايەلدەردەن قۇرالعان ۇيىمداردىڭ كوزگە تۇسەرلىك جۇمىسى بايقالماي وتىرعانىن مالىمدەدى.
– جالپى, ءبىزدىڭ ەلىمىزدە وتباسىلىق, گەندەرلىك ماسەلەلەرمەن اينالىساتىن 77 ۇكىمەتتىك ەمەس ۇيىم بار ەكەن. بىراق كوز جۇگىرتسەك, ءبىر-بىرەۋى ءدىن سالاسىنا ايتارلىقتاي اتسالىسىپ جاتقان جوق. وبلىستاردا ۇكىمەتتىك ەمەس ۇيىمدارعا 235 ملن تەڭگە بولىنەدى. 126 جوبا ىسكە اسىرىلىپ جاتىر. ءبىزدىڭ ورتالىقتا دا وتباسىلىق قۇندىلىقتارعا بايلانىستى بىرنەشە جوبا بار. ءبىزدىڭ ماقساتىمىز – ءدىني راديكاليزمنىڭ الدىن الۋ. بۇل سالادا ەلىمىزدە قوردالانعان ماسەلەلەر كوپ, – دەدى ۆيتسە-مينيستر. تۇيتكىلى شەشىلمەگەن ماسەلەلەردىڭ ىشىندە «جۋسان» وپەراتسياسىمەن ەلگە ورالعان ايەلدەردىڭ تاعدىرى الاڭداۋعا تۇرارلىق ەكەنىن نازارعا الدى. الداعى ۋاقىتتا بۇل باعىتتا جۇيەلى جۇمىس جۇرگىزىلۋى كەرەك.
– سيريادا قازا تاپقانداردىڭ وتباسىلارى, بالالارى مەن ايەلدەرى بار. ءارتۇرلى جاعدايمەن اباقتىعا تۇسكەندەردىڭ وتباسىلارى مەن ايەلدەرى بار. ودان قالدى ءبىزدىڭ وڭىرلەردە ايەلدەر جاماعاتى بارىن جاسىرۋدىڭ كەرەگى جوق. ايەلدەر وزدەرى بىرىگىپ, جاماعات بولىپ جاتىر. ول دا بەلگىلى جايت. بۇل كىسىلەر جابىق تۇردە ءبىر-بىرىمەن ارالاسادى. سىرتپەن بايلانىسى جوق. وزدەرىمەن وزدەرى جۇرەدى. قيىندىقتارى جوق ەمەس. جۇمىس تاپپاي, بالالارىن بالاباقشاعا ورنالاستىرا المايدى. ولارمەن دە جۇمىس جۇرگىزۋ كەرەك, – دەدى م.ءازىلحانوۆ.
سەمينارعا ارقاۋ بولعان تاقىرىپتى تارقاتقان قوعام قايراتكەرى اسىلى وسمان قازىرگى قازاق قوعامىندا ۇلتتىق رۋحاني قۇندىلىقتاردى ۇرپاققا قالاي بەرە ءبىلۋىمىز كەرەك ەكەنىن ايتتى.
– قوعامدى قۇراتىن دا, ونىڭ تىرەگى دە انالار. ءتىل مەن ءدىننىڭ ەگىز ەكەنىن ەشكىم جوققا شىعارا المايدى. ءتىل مەن ءدىن – ادامنىڭ جان دۇنيەسىندەگى رۋحاني بايلىعى. رۋحاني دۇنيەنى ۇلتتىڭ جانىنا ۇيالاتا الاتىن – انا. ال مەنىڭ قازاعىمنىڭ بۇرىنعى انالارى مەن قازىرگى انالاردى سالىستىرۋعا بولا ما؟ ەشكىمدى جاتسىنبايتىن قازاعىم ادامي اسىل قاسيەتىن بويىندا ساقتاسا دەيمىن. ونىڭ بارلىعى تەك ءتىل ارقىلى عانا ۇرپاقتىڭ جانىنا ۇيالايتىنىن ەش ۋاقىتتا ۇمىتپايىق. تاريحتى, مادەنيەتتى, ادەبيەتتى جەتكىزەتىن كومەيدەگى ءسوز بەن تاڭدايداعى ءتىل عانا, – دەدى ا.وسمان.
جيىنعا قاتىسقان تەولوگ-عالىمدار, مەملەكەتتىك ورگان وكىلدەرى, دەسترۋكتيۆتى ءدىني اعىمداردان زارداپ شەككەن تۇلعالاردى وڭالتۋ سالاسىندا قىزمەت ەتەتىن مەملەكەتتىك ەمەس ۇيىمدار تاقىرىپ توڭىرەگىندە باياندامالار جاساپ, تۋىنداعان ماسەلەلەردى شەشۋ جولدارىن ۇسىندى.