«نۇرلى ەرتىس» پيلوتتىق جوباسى اياسىندا بيىل مامىر ايىنان باستاپ ەل استاناسىنان ەكىباستۇزعا 203 وتباسى, ياعني 1169 قونىس اۋداردى, دەپ حابارلايدى ەڭبەك جانە الەۋمەتتىك قورعاۋ مينيسترلىگىنىڭ ءباسپاسوز قىزمەتى.
نۇر-سۇلتان جۇمىس كۇشى ارتىق وڭىرلەردىڭ قاتارىندا قارالىپ, ونداعى حالىقتى ءوز ەركىمەن كەنشىلەر قالاسىنا كوشىرۋدە بارلىق قاجەتتى جاعداي قاراستىرىلعان. ءباسپاسوز قىزمەتىنىڭ حابارلاۋىنشا, قونىس اۋدارۋشىلاردى تۇرعىن ۇيمەن, جۇمىسپەن قامتاماسىز ەتەدى, ال قاجەت بولعان جاعدايدا وقۋعا جىبەرەدى.
ەكىباستۇزعا العاشقىلاردىڭ ءبىرى بولىپ بەت تۇزەگەن كوپبالالى شاپاعات پەن سالتانات ماليكوۆتار تۇرمىسى ەداۋىر تۇزەلە باستاعانىن ايتىپ قۋانۋدا. ««نۇرلى ەرتىس» جوباسىنىڭ قاتىسۋشىلارى رەتىندە ءبىز مامىر ايىندا ەلوردادان ەكىباستۇزعا كوشتىك. كەلگەننەن كەيىن بىزگە جالدامالى 3 بولمەلى پاتەر بەرىلدى. جولداسىمدى «وپتيما ترانس» جشس-عا اۆتومەحانيك رەتىندە جۇمىسقا ورنالاستىردى.ء تورت بالامىز بار. ەكى كىشكەنتايىمىز ەگىزدەر, 2 جاستا. ۇلكەندەرى ەكىنشى جانە التىنشى سىنىپتا وقيدى. بالاباقشا, مەكتەپتە تاماقتانۋ جانە بالالارعا ارنالعان قوعامدىق كولىكتەر بارلىعى تەگىن. وتباسىمىزدىڭ ءومىرى جاقساردى دەپ سەنىممەن ايتا الامىن», دەدى سالتانات ماليكوۆا.
ەلوردادان ەكىباستۇزعا كوشكەن 203 وتباسىنىڭ 122-ءسى 3 بولمەلى پاتەرگە, 69 وتباسى 2 بولمەلى پاتەرگە جانە 12 وتباسى 1 بولمەلى پاتەرگە ورنالاستىرىلعان. «نۇرلى ەرتىس» جوباسى ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى اياسىندا جۇزەگە اسىرىلۋدا. ازاماتتاردى جۇمىس كۇشى ارتىق وڭىرلەردەن جۇمىس كۇشى تاپشى وڭىرلەرگە كوشىرۋ – وسى مەملەكەتتىك باعدارلامانىڭ ماڭىزدى باعىتتارىنىڭ ءبىرى» دەلىنگەن حابارلامادا.
بۇل باعدارلاما اياسىندا كوشكەندەرگە 35 ايلىق ەسەپتىك كورسەتكىش, ياعني وتباسىنىڭ ءاربىر مۇشەسىنە 88 مىڭ تەڭگە مولشەرىندە اي سايىنعى سۋبسيديا تولەنەدى. قالالىق اۋدانداردا تۇرعىن ءۇيدى جالعا الۋعا اي سايىنعى شىعىستاردى 75 مىڭ تەڭگەگە دەيىن (30 اەك) جانە اۋىلدىق جەرلەردە وتباسى مۇشەلەرىنىڭ سانىنا بايلانىستى 53 مىڭ تەڭگەگە دەيىن (21 اەك) وتەيدى. جۇمىس بەرۋشىلەرگە كەمىندە 5 ادامنىڭ جۇمىسقا ورنالاسۋىنا ىقپال جاساعان جاعدايدا, 450 اەك نەمەسە 1 ملن 136 مىڭ تەڭگە كولەمىندە سۋبسيديا بەرىلەدى. قاجەتتى جۇمىس قۇرالدارىن, تەحنولوگيالىق جابدىقتاردى, ءۇي جانۋارلارى مەن قۇستارىن ساتىپ الۋ, جاڭا بيزنەس-يدەيالاردى ىسكە اسىرۋ ءۇشىن مەملەكەتتىك باعدارلامانىڭ قاتىسۋشىلارىنا 200 اەك-كە دەيىن قاراجات بولىنەدى. قونىس اۋدارۋشىلاردىڭ تەحنيكالىق جانە كاسىپتىك ءبىلىم الۋعا, قىسقا مەرزىمدى كۋرستارعا قاتىسۋعا مۇمكىندىكتەرى بار. سونداي-اق جۇمىسقا ورنالاسۋعا جاردەم كورسەتەدى.
«ەرىكتى قونىس اۋدارۋدىڭ ماقساتى – ەڭبەك كۇشى تاپشى وڭىرلەردى جۇمىس كۇشىمەن قامتاماسىز ەتۋ جانە وڭىرلىك سايكەسسىزدىكتەر مەن دەموگرافيالىق تەڭگەرىمسىزدىكتەردى جويۋ. ەرىكتى تۇردە قونىس اۋدارۋعا الماتى, تۇركىستان, جامبىل, قىزىلوردا, ماڭعىستاۋ وبلىستارىنىڭ جانە شىمكەنت جانە نۇر-سۇلتان قالالارىنىڭ تۇرعىندارى قاتىسا الادى. بۇگىنگى كۇنى قونىس اۋدارۋشىلاردى قابىلداۋ ءۇشىن سولتۇستىك قازاقستان, شىعىس قازاقستان وبلىستارى جانە پاۆلودار مەن قوستاناي وبلىستارى بەكىتىلگەن», دەيدى ەڭبەك جانە الەۋمەتتىك قورعا مينيسترلىگى حالىقتى جۇمىسپەن قامتۋ دەپارتامەنتىنىڭ باسقارما باسشىسى ايجان جاپالباەۆا.
بيىل سەگىز ايدا «ەڭبەك» مەملەكەتتىك باعدارلاماسىمەن ەڭبەك كۇشى تاپشى وڭىرلەردەن 1650 وتباسى, ياعني 5 918 ادام بەلگىلەنگەن وڭىرلەرگە كوشكەن.