قازاق تاريحى تاعى ءبىر قۇندى جادىگەرمەن تولىقتى. ابىلاي حاننىڭ زامانداسى, اتاقتى بي, ءدىلمار شەشەن قارامەندە بي شاقا ۇلىنىڭ قورامساعى تابىلدى.
جادىگەر ءبيدىڭ شوبەرەسى راحىمبەرلىنىڭ قىزى دامەتكەن انانىڭ قولىندا ساقتالىپ كەلىپتى. كەيىن قورامساق اۋلەتتىڭ بالقاشتاعى جيەندەرىنىڭ قولىنا كوشسە كەرەك.
جادىگەر تاريحى تۋرالى 73 جاستاعى ارداگەر ۇستاز, قارامەندە بابانىڭ شوبەرەسى راحىمبەرلىنىڭ جيەنى جۇماگۇل جاڭبىربايقىزىنان سۇراپ بىلگەن ەدىك.
– قازاققا باتىر مەن بي ورتاق قوي. مەن ناعاشىلارىمنىڭ تاربيەسىندە ءوستىم. بابامىزدىڭ قورامساعى ءۇشىنشى بالاسى بىقىعا بەرىلگەن. بىقى بالاسى جاناققا تابىستاپتى. جاناق بالاسى راحىمبەرلىگە تاپسىرعان كورىنەدى. راحىمبەرلىدەن ۇل جوق. داركەن, دامەتكەن, ءۇمىت ەسىمدى قىزدار تۋادى. ناعاشى اجەمىز زاعيپا ساتتىقىزى مەنىڭ انام دامەتكەنگە قورامساقتى اماناتتاپ كەتكەن ەكەن. مەن قورامساقتى ءبىر جىلداي قولىمدا ساقتادىم.
كەيىن انام ءسىڭلىمىزدىڭ قولىنا كوشىپ, قورامساقتى الا كەتتى. سول ۇيدە كوز جۇمدى. بابادان قالعان تابارىكتى قازىر قىزدىڭ بالالارى ساقتاپ وتىرمىز. بي بابامىزدىڭ «مەنىڭ اقىرىم قىزدىڭ جانە قىزدىڭ بالاسىنىڭ قولىندا قالادى» دەپ ايتقان ءسوزى بار. سوندىقتان انام قورامساقتى ساقتاۋعا ايرىقشا كوڭىل ءبولىپ كەلدى, – دەگەن جۇماگۇل اپانىڭ سوزىنشە, قورامساقتى ۇستاپ تۇراتىن كىسە قولدى بولعان.
ءۇش عاسىردان استام ۋاقىت ساقتالعان قورامساق شەبەر قولدان شىققانى كورىنىپ تۇر. قالىڭ بىلعارىدان تىگىلگەن. ەكى قايىس ىلگەگى بار. بەتىنە ويۋ-ورنەك بەدەرلەنگەن.
«ۇرپاقتارى قورامساقتى ەلدىڭ نازارىنا كوپ كورسەتە بەرمەيدى. بابا كوزى – قۇندى جادىگەردى ساقتاپ, كەلەشەككە اماناتتاۋ – ءبىزدىڭ باستى مىندەتىمىز», دەيدى ارداگەر ۇستاز.
نۇردوس كارىم