ەل ىشىندە وتكەنىڭمەن ماقتانا بەرگەنشە, ەرتەڭگى كۇنىڭنىڭ قامىن جاساعان الدەقايدا قايىرلى بولماق دەگەن ەستى پىكىردى ەستىپ قالىپ جۇرەمىز. دەگەنمەن باعزى زاماندا بابالارىڭنىڭ كىم بولعانىن, ولار قۇرعان قاعاناتتار مەن حاندىقتاردىڭ وركەنيەت ولكەسىندە قانداي ورىن العانىن بىلۋگە دەگەن قۇشتارلىقتى قالايشا تۇنشىقتىرىپ قويۋعا بولادى؟!
تاريحىڭنان ءىلىپ العان تۇيىردەي عيبراتىڭ بولماسا, الداعى كۇندەرىمدە ارمان اتاۋلىنىڭ نەبىر عاجابىن ىسكە اسىرامىن دەپ استامشىلىققا بارۋ تىم اعاتتىق بولار ەدى. ماسەلەن, كەشەگى قازاقستان حالقىنا ارناعان جولداۋىندا مەملەكەت باسشىسى قاسىم-جومارت توقاەۆ ۇلىق ۇلىس – التىن وردانىڭ 750 جىلدىق مەرەيتويىن لايىقتى تۇردە اتاپ ءوتۋ كەرەكتىگىنە ەرەكشە ءمان بەردى. بۇدان ءسال بۇرىن ەل پرەزيدەنتى قاراعاندى وبلىسىنا جۇمىس ساپارىمەن كەلىپ, « ۇلىتاۋ-2019» حالىقارالىق تۋريستىك فورۋمعا قاتىسقاندا التىن وردانىڭ نەگىزىن قالاعان جوشى حاننىڭ ەسىمىن ۇلىقتاۋدى, كەسەنەسىن مادەني تۋريزم نىسانىنا اينالدىرۋدى ايرىقشا تاپسىرعان ەدى.
ءيا, ءدال قازىرگى ۋاقىت – ەكى بىلەكتى سىبانىپ, ەرتەڭگى كۇننىڭ قامى ءۇشىن جان اياماي ەڭبەك ەتەتىن كەز. الايدا تابان استىنداعى تاريحىمىزدى اتتاپ ءوتىپ, جوعالعانىمىزدى ىزدەمەسەك, وشكەنىمىزدى جاندىرۋعا ۇمتىلماساق, ءبىزدىڭ بولاشاققا دەگەن كوپ ءىسىمىزدىڭ ءتۇبى باياندى بولارىنا كىم كەپىلدىك بەرەر ەكەن؟ ال پرەزيدەنت بولسا, «اتا-بابا اماناتىنا ادال بولۋ – بىزگە سىن», دەپ بۇل تاقىرىپ توڭىرەگىندەگى پىكىرتالاسقا قاپىسىز تورەلىگىن ايتتى.
«ەل امان, جۇرت تىنىش» زامانىمىز ۇزاعىنان سۇيىندىرسە, مەملەكەتىمىزدەگى شەتىن ماسەلەلەر رەتىمەن شەشىلە بەرەرىنە كۇمان جوق. قازىردىڭ وزىندە بۇل باعىتتاعى جۇمىستاردىڭ جەمىسىن كورە باستادىق. جولداۋدا ايتىلعانداي, ۇستازدار مەن مادەنيەت سالاسى قىزمەتكەرلەرى ەڭبەكاقىلارىنىڭ كوتەرىلۋى, جالپى حالىقتىڭ ءال-اۋقاتىن جاقسارتۋ, ول كوكسەگەن مۇراتتاردى, اسىرەسە انا ءتىلىمىزدى ۇلتارالىق قاتىناس ءتىلى دارەجەسىنە جەتكىزۋدى ىسكە اسىرۋ جولىنداعى يگى قادامداردى ەكونوميكالىق تۇرعىدا دامۋ داڭعىلىنا تۇسكەن مەملەكەتىمىز نازاردان تىس قالدىرمايدى دەگەن سەنىمدەمىز.
وسى تۇرعىدان كەلگەندە, عالاماتتىعى تالاس تۋدىرمايتىن تاريحىمىزعا تەرەڭ ءۇڭىلىپ, وركەنيەت كوشىندە تۇعىرى بيىك بولعان داڭقتى بابالارىمىزدى دۇنيە ءجۇزى مويىندايتىن دەڭگەيدە ۇلىقتاي الساق, بۇل دا مەملەكەتىمىزدىڭ الەمدىك قوعامداستىق الدىنداعى ابىروي-بەدەلىنىڭ اسقاقتاۋىنا, كەشەگى مەن بۇگىنگىسىنىڭ تىزگىنىن تەڭ ۇستاعان ءيميدجىنىڭ تارتىمدىلىعى ارتا تۇسۋىنە ۇلەسىن اياماي قوساتىن تاعىلىمدى ءىس بولماق.
دۋمان ءابدىرامانوۆ,
«كازتسينك» جشس اشىق تاۋ-كەن جۇمىستارى بويىنشا باس كەنشى, قاراعاندى وبلىستىق ءماسليحاتىنىڭ دەپۋتاتى
قاراعاندى وبلىسى